Javascript DHTML Drop Down Menu Powered by dhtml-menu-builder.com

Ana səhifə Seçilmişlərə əlavə et Bizə yazın

 

ARXİV

12 Oktyabr 2012 - №40

 

Görkəmli şərqşünas alim Aida İmanquliyevanın zəngin ədəbi irsi öyrənilir, tədqiq olunur

 

Oktyabrın 10-da Ailə, Qadın və Uşaq Problemləri üzrə Dövlət Komitəsi (AQUPDK) Bakı Dövlət Universiteti ilə birlikdə görkəmli şərqşünas alim Aida xanım İmanquliyevanın anadan olmasının 73-cü ildönümü ilə əlaqədar ərəb filologiyası sahəsində məqalə müsabiqəsinin yekunlarına həsr edilmiş tədbir keçirmişdir.

AzərTAc xəbər verir ki, tədbiri giriş sözü ilə açan BDU-nun rektoru, akademik Abel Məhərrəmov Aida İmanquliyevanın zəngin elmi fəaliyyətindən, şərqşünaslığın inkişafındakı müstəsna xidmətlərindən danışmışdır. Bildirmişdir ki, alimin əsərləri dünya şərqşünaslığı xəzinəsinə daxil olan çox dəyərli araşdırmalardır.

Ailə, Qadın və Uşaq Problemləri üzrə Dövlət Komitəsinin sədri Hicran Hüseynova 20 il bundan əvvəl dünyasını dəyişmiş böyük alimin keçdiyi 53 illik həyat yolundan, zəngin və dəyərli elmi fəaliyyətindən bəhs etmişdir.

H.Hüseynova bildirmişdir ki, bu gün Aida xanımın ədəbi irsi onun məktəbinin davamçıları tərəfindən layiqincə tədqiq olunur. Artıq bir neçə ildir ki, AQUPDK böyük alimin doğum günü ərəfəsində ərəb filologiyası sahəsində məqalə müsabiqəsi təşkil edir. Builki müsabiqə də olduqca məhsuldar keçmişdir. Aydındır ki, hər müsabiqə yeni-yeni istedadlı mütəxəssisləri üzə çıxarır. Tədbirimizin əsas məqsədi Aida xanımın zəngin ədəbi irsinin dərindən öyrənilməsi və qorunmasıdır. Aida xanım bir alim kimi ömrünü elmi axtarışlara sərf etsə də, onun həyatda əsas amalı gənc alimlərə yol göstərmək, onlara dəstək olmaq idi. Bu gün yeni şərqşünaslar nəsli yetişdikcə onun qoyduğu ənənələr də davam edir, arzuları həyata keçir.

Bakı Dövlət Universitetinin şərqşünaslıq fakültəsinin dekanı Elxan Əzizov professor Aida İmanquliyevanın özündən sonra Azərbaycan şərqşünaslığını zənginləşdirən qiymətli elmi irs qoyduğunu xatırlatmışdır. O demişdir ki, Aida İmanquliyeva yeni və müasir ərəb ədəbiyyatının ən nüfuzlu, ən fundamental tədqiqatçılarından biri kimi şərqşünaslıq tarixinə əbədi daxil olan azsaylı mütəxəssislərdəndir. Onun ərəb-məhcər ədəbiyyatının görkəmli nümayəndələrinin həyat və yaradıcılığına həsr etdiyi tədqiqatlar öz orijinallığını, zənginliyini, nəzəri dərinliyini, konseptuallığını daim qoruyub saxlayan, buna görə də mütəxəssislərin stolüstü kitablarına çevrilən əsərlərdir.

M.V.Lomonosov adına Moskva Dövlət Universitetinin Bakı filialının rektoru, professor Nərgiz Paşayeva Aida İmanquliyevanın elmi fəaliyyətindən danışmışdır. N.Paşayeva bildirmişdir ki, ərəb ədəbiyyatı sovetlər dövründə heç də ənənəvi olmayan mövzulardan biri idi. Çünki ərəb-məhcər ədəbiyyatı sosializm-realizm prinsiplərindən uzaq və eyni zamanda, bir çox mətləbləri açan böyük bir ədəbiyyat idi. A.İmanquliyeva tərəfindən müvəffəqiyyətlə işlənən bu mövzu elmi dərəcəyə malik əsərlər ərsəyə gətirə bilmişdir. Bu mənada Aida xanım uğurlu və xoşbəxt alim sayıla bilər. Etiraf edək ki, Aida xanımın boya-başa çatdığı mötəbər ziyalı mühitinin təsiri onun ədəbi-elmi yaradıcılıqla dərindən məşğul olması üçün mənəvi zəmin yaratmışdır. Aida xanım əhatəsində olan hər bir insanın problemləri ilə maraqlanır, nəvaziş və qayğısını əsirgəmirdi. Azərbaycan Elmlər Akademiyasının Şərqşünaslıq İnstitutunda kiçik elmi işçilikdən bu elm ocağının direktoru vəzifəsinədək yüksələn A.İmanquliyeva əməkdaşlara qarşı analıq qayğısı göstərmiş, heç kəsə biganə qalmamışdır.

N.Paşayeva qeyd etmişdir ki, müasir tələbələr A.İmanquliyevanı görməsələr də, onun yazdığı elmi kitabları, əsərləri oxumaqla Azərbaycanın elm, mədəniyyət, təfəkkür tarixində yeri olan belə əvəzsiz alim haqqında geniş məlumat əldə edə biləcəklər. Gələcək nəsillər, xüsusilə də şərqşünaslıq elmi ilə məşğul olan hər bir tədqiqatçı A.İmanquliyevanın zəngin elmi irsindən istifadə edəcək və onun əsl alim kimi keçdiyi şərəfli ömür yolunu yenidən öyrənəcəklər.

Professor Nərgiz Paşayeva bu cür müsabiqənin keçirilməsinin gənc alimlərə müsbət təsir göstərdiyini, Aida xanım İmanquliyevanın həyat və fəaliyyətinin onlar üçün yaxşı nümunə olduğunu bildirmişdir.

Tədbirdə görkəmli alimin həyatına həsr olunmuş film nümayiş etdirilmişdir.

Sonda Aida İmanquliyevanın anadan olmasının 73-cü ildönümünə həsr edilmiş ərəb filologiyası sahəsində məqalə müsabiqəsinin qalibləri mükafatlandırılmışlar.

 
 
 
Səhifənin başına qalx "Xəbərlər" bölməsinə get Nömrənin müdəricatına dön

Səhifənin başına qalx

 
 

 
 
 
 
 
 
 

 
 

İnternet və ya sayt daxilində  axtarmaq istədiyiniz sözü xanaya yazıb "Axtar" düyməsini sıxın

internetdə

saytda

 
 

AZƏRBAYCAN
RESPUBLİKASI
TƏHSİL
QANUNU

ƏN YAXŞI
MÜƏLLİMLƏR

ƏN YAXŞI
MƏKTƏBLƏR

700 BAL
TOPLAYANLAR

 
Heydər Əliyev
İlham Əliyev
Heydər Əliyev Fondu

Təhsil Nazirliyi

 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

ELANLAR

       
 

Copyright  ©  All Rights Reserved.
Created and supported by Mehman Shafagatov