Oktyabrın 10-da Azərbaycan Respublikasının Prezidenti yanında Dövlət İdarəçilik Akademiyasında ABŞ-da fəaliyyət göstərən "Qarabağ Fondu"nun icraçı direktoru xanım Diana Altman Kohenlə görüş keçirilib. Akademiyanın rektoru, akademik Urxan Ələkbərov tədbiri açaraq ümummilli lider Heydər Əliyevin ölkə rəhbərliyinə gəldiyi ilk günlərdən dünya ictimaiyyətinə Azərbaycan həqiqətləri, xüsusilə  Qarabağ problemi ilə əlaqədar obyektiv məlumat verilməsini hər zaman diqqət mərkəzində saxlamasından və bu sahədə göstərdiyi xidmətlərdən bəhs edib. Natiq  bu siyasətin davamı kimi Azərbaycanda əldə olunan nailiyyətlərin, o cümlədən  ölkənin beynəlxalq nüfuzunun artmasının dövlət başçısı cənab İlham Əliyevin uğurlu inkişaf strategiyasının nəticəsi olduğunu bildirib. Rektor daha sonra "Qarabağ Fondu" barədə ətraflı məlumat verib. Qeyd edib ki, ABŞ-da yaradılan və qeyri-hökumət təşkilatlarına verilən yüksək statusa malik olan "Qarabağ Fondu"nun məqsədi Azərbaycanı, onun Qarabağ bölgəsini amerikalılara tanıtmaq, Azərbaycan mədəniyyəti və incəsənətini bu ölkədə tərənnüm və təbliğ etməkdən ibarətdir. Akademik bu məqsədlə həyata keçirilən müxtəlif mədəni-kütləvi tədbirlərin böyük əhəmiyyət kəsb etdiyini vurğulayıb.

Tədbirdə çıxış edən "Qarabağ Fondu"nun icraçı direktoru xanım Diana Altman Kohen rəhbərlik etdiyi təşkilatın missiyasının Azərbaycan və Amerika Birləşmiş Ştatları arasında mədəni körpünun yaradılmasından ibarət olduğunu bildirərək həyata keçirilən tədbirlərdən söz açıb. Diana Kohen fondun Ermənistan-Azərbaycan, Dağlıq Qarabağ münaqişəsi ilə bağlı amerikalıların maarifləndirilməsi istiqamətində bir sıra mühüm işlər görməsindən bəhs edib. O bu qurumun Azərbaycanın mədəni irsi və adət-ənənələrini yüksək səviyyədə təbliğ etməyə çalışdığını söyləyıb. Bakıya artıq ikinci dəfə, Dövlət İdarəçilik Akademiyasına isə ilk dəfə gəldiyini deyən qonaq gördüyü dəyişiklikləri yüksək dəyərləndirərək ölkəmizin sürətli inkişafından heyrətləndiyini bildirib.

Sonra maraqlı diskussiya şəklində davam edən görüş zamanı xanım Diana Altman Kohen müəllim və tələbələrin suallarını cavablandırıb. 

Hicran ƏKBƏROVA