Javascript DHTML Drop Down Menu Powered by dhtml-menu-builder.com

Ana səhifə Seçilmişlərə əlavə et Bizə yazın

 

ARXİV

19 Oktyabr 2012 - №41

 

"Ən yaxşı ümumi təhsil müəssisəsi" və "Ən yaxşı müəllim" müsabiqələrinin Təşkilat Komitəsinin yekun iclası

 

Oktyabrın 13-də Təhsil Nazirliyində "Ən yaxşı ümumi təhsil müəssisəsi" və "Ən yaxşı müəllim" müsabiqələrinin Təşkilat Komitəsinin yekun iclası oldu.

İclası açan təhsil naziri, Təşkilat Komitəsinin sədri Misir Mərdanov son beş ildə hər iki müsabiqənin uğurla keçirildiyini diqqətə çatdırıb. Bu il də həmin işin öhdəsindən layiqincə gəldiklərinə, müəyyən olunmuş qaydaya əsasən müsabiqə qaliblərinin seçilməsi prosesinin obyektivlik və şəffaflıq şəraitində həyata keçirilməsinə görə Təşkilat Komitəsinin üzvlərinə təşəkkürünü bildirən nazir onların bir neçəsinin adını xüsusi qeyd edib zəhmətlərini yüksək qiymətləndirdi.

Təhsil naziri qeyd etdi ki, hər bir müsabiqə 3 mərhələdən ibarət olmaqla sonda Təşkilat Komitəsinin iclasında təqdimatının qiymətləndirilməsi ilə başa çatıb. Bildirildi ki, bu müsabiqələr ölkə Prezidenti cənab İlham Əliyev tərəfindən imzalanmış çoxsaylı təhsil layihələrindən biri olmaqla yüksək qiymətə layiq bir layihədir. Ona görə ki, bu layihənin həyata keçirilməsi müəllimlər və məktəb direktorları arasında inkişafa yönəlmiş rəqabəti  artırmışdır.

Təşkilat Komitəsinin üzvlərindən birinin Azərbaycan Milli Elmlər Akademiyasının müxbir üzvü, kimya elmləri doktoru, professor Vaqif Abbasovun bu günlərdə 60 yaşının tamam olduğunu xüsusi diqqətə çatdıran nazir onu nazirliyin bütün heyəti adından təbrik etdi.

Sonra təhsil naziri ötən dərs ili üzrə keçirilən "Ən yaxşı ümumi təhsil müəssisəsi" və "Ən yaxşı müəllim" müsabiqələrinin yekunlarını, seçimlə bağlı məqamları ekranda əks olunan görüntülər vasitəsi ilə tədbir iştirakçılarının diqqətinə çatdırdı.

Nazir əvvəlcə "Ən yaxşı ümumi təhsil müəssisəsi" müsabiqəsinin yekunları barədə məlumat verdi. Qeyd etdi ki, müsabiqədə iştirak üçün respublikanın əksər bölgələrini təmsil edən 151 məktəb Təşkilat Komitəsinə müraciət etmişdir. Əvvəlki illərdə olduğu kimi, bu il də iştirakçılar arasında Bakı şəhərinin məktəbləri üstünlük təşkil etmiş, 151 məktəbdən 53-ü (35,1 faiz) Bakı şəhərinin məktəbləri olmuşdur. Qalan 98 məktəb isə 42 kənd rayonu (88 məktəb) və 3 şəhəri (10 məktəb) təmsil etmişdir.

Sonra məktəbləri müsabiqədə iştirak üçün müraciət edən rayonların adları açıqlandı. Qeyd olundu ki, 151 məktəbin təqdim etdiyi sənədlər ekspertizadan keçirildikdən sonra 111 məktəb müsabiqənin II mərhələsinə buraxılmışdır. Onlardan da 45-i Bakı şəhərinin, qalanları isə respublikanın digər şəhər və rayonlarının məktəbləridir.

Müsabiqənin hər üç mərhələsinin yekunlarına görə 47 məktəbin qalib hesab edildiyini söyləyən təhsil naziri onlardan 20-nin Bakı şəhərinin, 3-nün Sumqayıt şəhərinin, 3-nün İsmayıllı rayonunun, hər birindən 2 məktəb olmaqla Gəncə, Şəki, Bərdə, Şirvan, hər birindən 1 məktəb olmaqla Tovuz, İmişli, Zaqatala, Qazax, Qax, Quba, Abşeron rayonlarının məktəbləri olduğunu bildirdi.

İclasda həmçinin qaliblərin siyahısında toplanmış ballara görə ilk 10 yeri tutan məktəblərin adları açıqlandı, qalib məktəblərin göstərdiyi nəticələr diqqətə çatdırıldı. Bildirildi ki, II mərhələdə Sumqayıt şəhərindən 24, 15, 14 nömrəli tam orta məktəblər, Bakı şəhərindən 189, 9 nömrəli tam orta məktəblər, Xaçmaz şəhər akademik Zərifə Əliyeva adına 8 nömrəli məktəb-lisey, Şəki şəhər 10, 5 nömrəli tam orta məktəblər, Ağstafa şəhər texniki-humanitar təmayüllü lisey, Zaqatala rayon Aşağı Tala kənd 1 nömrəli tam orta məktəbləri fərqlənmişdir.

Nazir dedi ki, Bakı şəhər 16, 36, 60, 266, Ağstafa şəhər texniki-humanitar təmayüllü lisey, Şəki şəhər 5, Gəncə şəhər 44 nömrəli ingilis dili təmayüllü bağça-məktəb-lisey kompleksi, Gəncə şəhər 21 nömrəli, İsmayıllı rayonu S.Həsənov adına Qubaxəlilli kənd, Sumqayıt şəhər M.Füzuli adına 15 nömrəli tam orta məktəblərin direktorlarının təqdimatları maraqla qarşılanmış və onlara yüksək bal verilmişdir.

Nazir eyni zamanda builki müsabiqədə Mingəçevir və Naftalan şəhərlərindən, Lənkəran, Ağdam, Balakən, Qobustan, Qubadlı, Daşkəsən, Zəngilan, Yardımlı, Kəlbəcər, Goranboy, Laçın, Lerik, Tərtər, Saatlı, Xocalı, Xocavənd, Şuşa rayonlarından iştirak üçün müraciət edən məktəblərin olmamasını təəssüf doğuran hal sayıb bu barədə düşünmək lazım gəldiyini söylədi.

Daha sonra təhsil naziri Misir Mərdanov "Ən yaxşı müəllim" müsabiqəsi üzrə bir sıra məlumatları diqqətə çatdırdı. Bildirdi ki, müsabiqədə iştirak etmək üçün 464 nəfər müəllim sənəd təqdim etmişdir ki, bu da ötən ilə nisbətən 39 nəfər çoxdur. Müsabiqə şərtlərinə uyğun gəlmədiyi üçün 8 nəfərin sənədləri qəbul edilməmişdir. Nəticədə 456 nəfərin sənədləri ekspertizadan keçirilmiş, daha çox bal toplayan 231 nəfər növbəti mərhələdə iştirak etmək hüququ qazanmışdır. Obyektiv səbəblərdən 3 nəfər ikinci mərhələyə gələ bilməmişdir.

Təhsil naziri müsabiqələrin ikinci mərhələsinin gedişi barədə də məlumat verərək bildirdi ki, bu mərhələdə müəllimlərin sınaq dərslərinin təşkili üçün Bakı şəhərində 21 məktəb müəyyənləşdirilmiş, nazirliyin müvafiq əmri ilə fənlər üzrə müəllimlərin say nisbəti nəzərə alınmaqla 88 nəfərdən ibarət 17 fənn komissiyası yaradılmışdır.

Müsabiqənin ikinci mərhələsi 2012-ci il fevralın 21-də başlanıb aprelin 9-da yekunlaşdırılmışdır. Hər bir sınaq dərsi videolentə alınmış, dərs bitdikdən dərhal sonra onun müzakirəsi aparılmış, Təşkilat Komitəsində razılaşdırılmış 12 göstərici üzrə qiymətləndirilmişdir.

Nazir onu da diqqətə çatdırdı ki, müsabiqələrin üçüncü mərhələsində üzürlü  səbəbdən 13 nəfər iştirak edə bilməmiş, yekun mərhələdə 214 müəllimin təqdimatı dinlənilib qiymətləndirilmişdir. Hər üç mərhələnin balları əsasında müəllimlərin yekun balı müəyyən edilmiş və ən yüksək nəticə göstərən 95 nəfər müəllim qalib hesab olunmuşdur.

Qaliblərdən 51-i (53,58 faiz) Bakı şəhəri, 15-i nazirlik nəzdindəki müəssisələr, 3-ü Sumqayıt şəhəri, 3-ü İsmayıllı, 2-si BSU nəzdindəki məktəb-lisey kompleksi, hər birindən 2 nəfər olmaqla Mingəçevir şəhəri, Qusar, Bərdə rayonları və hər birindən 1 nəfər olmaqla Abşeron, Qazax, Tovuz, Zaqatala, Astara, Ucar, Şəmkir, Şamaxı, Ağdam, Cəlilabad, Tərtər rayonları, Gəncə şəhəri, Avropa-Azərbaycan məktəbi, Bakı xoreoqrafiya məktəbi və Bülbül adına orta ixtisas musiqi məktəbini təmsil edir. Onlardan 29-u ibtidai sinif, 19-u Azərbaycan dili və ədəbiyyat, 11-i ingilis dili, 7-si kimya, 6-sı biologiya, 5-i riyaziyyat, 4-ü informatika, 3-ü tarix, 3-ü musiqi, 2-si rus dili və ədəbiyyatı, hər birindən bir nəfər olmaqla fizika, coğrafiya, fransız dili, çağırışaqədər hazırlıq, fiziki tərbiyə və təsviri incəsənət müəllimləridir.

Nazir həmçinin sınaq dərsləri və təqdimatları ən yüksək balla qiymətləndirilmiş müəllimlərin də adlarını çəkdi.

Tədbirdə "Ən yaxşı ümumi təhsil müəssisəsi" müsabiqəsinin qalibi olmuş 47 məktəbin rəhbərinə sertifikatlar, "Ən yaxşı müəllim" müsabiqəsində qalib gəlmiş 95 müəllimə isə vəsiqələr təqdim edildi.

Sonda təhsil naziri tədbir iştirakçılarına daha bir sevindirici xəbər verərək bildirdi ki, oktyabrın 1-dən 6-a kimi Rusiya Federasiyasının Anapa şəhərində boks üzrə məktəblilərin Avropa çempionatı keçirilib. Yarışda 25 ölkə üzrə 200-ə qədər boksçu mübarizə aparıb. Yarışda müxtəlif çəki dərəcəsində qüvvəsini sınayan 13 boksçumuzdan 5-i medal qazanıb.

Nazir qalib şagirdləri və onların məşqçilərini təbrik edərək onlara daha böyük uğurlar arzuladı. 

Ədalət DAŞDƏMİRLİ

 
 
 
Səhifənin başına qalx "Təhsil nazirliyində" bölməsinə get Nömrənin müdəricatına dön

Səhifənin başına qalx

 
 

 
 
 
 
 
 
 

 
 

İnternet və ya sayt daxilində  axtarmaq istədiyiniz sözü xanaya yazıb "Axtar" düyməsini sıxın

internetdə

saytda

 
 

AZƏRBAYCAN
RESPUBLİKASI
TƏHSİL
QANUNU

ƏN YAXŞI
MÜƏLLİMLƏR

ƏN YAXŞI
MƏKTƏBLƏR

700 BAL
TOPLAYANLAR

 
Heydər Əliyev
İlham Əliyev
Heydər Əliyev Fondu

Təhsil Nazirliyi

 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

ELANLAR

       
 

Copyright  ©  All Rights Reserved.
Created and supported by Mehman Shafagatov