Naxçıvan Dövlət Universitetində 18 oktyabr Dövlət
Müstəqilliyi Günü ilə bağlı mərasim keçirildi. Tədbiri
giriş sözü ilə açan rektor, akademik İsa Həbibbəyli
Azərbaycan xalqının milli müstəqillik uğrunda əsrlər
boyu apardığı şərəfli mübarizədən, Şərqdə ilk dəfə məhz
Azərbaycanda, 1918-ci ildə yaradılan demokratik
respublikanın fəaliyyətindən bəhs etdi. Qeyd olundu ki,
XX əsrin sonlarında keçmiş SSRİ-də və dünyada baş verən
ictimai-siyasi proseslər, getdikcə güclənən
milli-azadlıq hərəkatı nəticəsində 1991-ci il oktyabrın
18-də Azərbaycanın keçmiş Ali Sovetinin sessiyasında
mühüm tarixi sənəd - Dövlət Müstəqilliyi haqqında
Konstitusiya Aktı qəbul edilməklə Azərbaycanın dövlət
müstəqilliyi uzun illərdən sonra yenidən bərpa edildi.
Lakin məşəqqətli mübarizələr və minlərlə qurbanlar
bahasına başa gələn müstəqilliyimiz ölkədə baş verən
siyasi çəkişmələr, vətəndaş qarşıdurması, hətta
Azərbaycanın regionlara parçalanması kimi təhlükənin
mövcud olduğu bir şəraitdə yenidən təhlükə altına
düşmüşdü. Məhz belə bir dövrdə yenidən siyasi
hakimiyyətə gələn ümummilli lider Heydər Əliyev milli
həmrəyliyə nail olmaqla, müstəqil dövlət quruculuğuna
yönəlmiş uzaqgörən siyasətilə ölkəmizin dövlət
müstəqilliyinin qarantına çevrildi. Azərbaycan xalqını
bu əlamətdar bayram münasibətilə təbrik edən rektor,
akademik İsa Həbibbəyli vurğuladı ki, bu gün Azərbaycan
Respublikası Prezidenti İlham Əliyev tərəfindən
ümummilli lider Heydər Əliyevin siyasi ideyalarının
uğurla davam etdirilməsinin nəticəsidir ki, Azərbaycan
müstəqil dövlət kimi inkişaf etməkdə olan dünya
dövlətləri ilə bir sırada addımlayır, öz qətiyyətli
siyasi mövqeyi, nüfuzu ilə bütün dünyada tanınır.
"Qeyrət" nəşriyyatının direktoru, tarix üzrə fəlsəfə
doktoru, dosent, Azərbaycan Yazıçılar Birliyinin üzvü
Vaqif Məmmədov "Heydər Əliyev şəxsiyyəti müstəqillik
tarixində" mövzusunda məruzə edərək ümummilli liderin XX
əsrin sonlarında ölkədə siyasi sabitliyin yaradılması,
iqtisadi, siyasi dirçəliş, elm, təhsil və mədəniyyətin,
habelə beynəlxalq diplomatik əlaqələrin inkişafı
istiqamətindəki böyük siyasi xidmətlərindən bəhs etdi.
Sonra universitetin incəsənət fakültəsinin kamera
ansamblının bayram konserti təqdim olundu. Fakültənin
baş müəllimi, Azərbaycan Respublikasının xalq artisti
Çingiz Axundovun bədii rəhbərlik və dirijorluq etdiyi
kamera ansamblının premyerasında dünya bəstəkarlarının
və Azərbaycan klassiklərinin operalarından parçalar,
kamera musiqiləri ifa olundu. Universitet
müəllimlərindən Azərbaycan Respublikasının əməkdar
artisti Gülyanaq Fərzəliyeva, Naxçıvan MR əməkdar
artisti Mübariz Əsgərov, Əli Davudi müstəqillik
bayramını mahnı ərməğanı ilə təbrik etdilər.
Mehriban SULTAN,
NDU-nun Mətbuat şöbəsinin müdiri |