Azərbaycan Diplomatik Akademiyasının (ADA) nümayəndə heyəti NATO-nun İctimai Diplomatiya Şöbəsinin proqramında iştirak etmək üçün oktyabrın 18-19-da Şimali Atlantika Alyansının Brüsseldəki iqamətgahında olmuşdur.

AzərTAc Azərbaycanın NATO-dakı nümayəndəliyinin mətbuat xidmətinə istinadla xəbər verir ki, ADA-nın nümayəndə heyətinə diplomatiya və beynəlxalq münasibətlər üzrə magistr proqramının (MADIA) 27 tələbəsi daxildir.

NATO ekspertləri səfərin ilk günü tələbələr üçün NATO-nun tərəfdaşları, əməliyyatları, enerji təhlükəsizliyi, müdafiə islahatları sahələri üzrə brifinq keçirmişlər. Azərbaycanın NATO-dakı nümayəndəliyinin əməkdaşları ilə görüş olmuşdur.

Səfərin ikinci günü ADA-nın nümayəndə heyəti üçün NATO-nun hərbi iqamətgahında brifinqlər keçirilmişdir. Sonra nümayəndə heyəti Azərbaycanın Belçikadakı səfirliyi tərəfindən təşkil edilmiş Avropa Parlamentinin deputatları ilə görüşdə iştirak etmişdir.

Tələbələr brifinq və görüşlərə maraq göstərmiş, interaktiv sessiyalarda fəal iştirak etmiş, NATO-nun fəaliyyəti ilə bağlı biliklərin səviyyəsinin artırılması baxımından belə görüşlərin əhəmiyyətini vurğulamışlar.

Qeyd edək ki, ADA-nın nümayəndə heyətinin Brüsselə səfəri NATO-nun İctimai Diplomatiya Şöbəsinin və Azərbaycanın NATO-dakı nümayəndəliyinin sıx əməkdaşlığı və dəstəyi sayəsində mümkün olmuşdur.