Oktyabrın 30-da Xaçmaz Rayon Təhsil Şöbəsinin yeni inzibati binası istifadəyə verilmişdir. Bu münasibətlə keçirilən mərasimdə çıxış edənlər bildirmişlər ki, Prezident İlham Əliyevin ötən il Xaçmaza səfərindən sonra rayonda abadlıq-quruculuq işləri daha böyük vüsət almışdır.

Qeyd edilmişdir ki, dövlətin təhsilə qayğısı nəticəsində son illər rayonda çoxlu sayda yeni, müasir tələblərə uyğun məktəb binaları tikilmişdir. Bu il rayonda ümumi şagird sayı 1120 nəfər olan iki məktəb binası istifadəyə verilmişdir. Hazırda Müzəffəroba kəndində 180 şagird yerlik məktəbin tikintisi davam etdirilir. Müasir üslubda inşa olunmuş rayon təhsil şöbəsinin yeni inzibati binasının istifadəyə verilməsi təhsil işçilərinin iş şəraitinin yaxşılaşdırılması istiqamətində atılmış növbəti addım kimi qiymətləndirilmişdir.

Yeni inzibati binanın açılışını bildirən rəmzi lent kəsildikdən sonra iştirakçılar burada yaradılan şəraitlə tanış olmuşlar. Müasir istilik sistemi ilə təmin edilmiş inzibati bina ümumilikdə 20 iş otağından ibarətdir. Yeni inzibati bina ikimərtəbəlidir, 1000 kvadratmetr sahəyə malikdir və lazımi texniki avadanlıq, inventarla təchiz olunmuşdur, bütün otaqlardakı kompüterlər İnternetə qoşulmuşdur. 

Rəşad ZİYADOV