Oktyabrın 25-də Litva Dövlət İdarəçilik İnstitutunun
direktoru, professor Romualdas Povilas Petraitis və onu
müşayiət edən nümayəndə heyəti Azərbaycan
Respublikasının Prezidenti yanında Dövlət İdarəçilik
Akademiyasında olublar.
Qonaqları salamlayan rektor, akademik Urxan Ələkbərov
akademiyanın yaranma və inkişaf tarixindən, beynəlxalq
əlaqələrindən danışıb. Rektor həmçinin ölkədə əldə
edilmiş nailiyyətlərdən ətraflı söz açıb, Azərbaycan
Respublikasının Prezidenti cənab İlham Əliyevin həyata
keçirdiyi uğurlu siyasətin tərkib hissəsi kimi qara
qızılın insan kapitalına çevirmək strategiyasının
önəmini qeyd edib. Qloballaşan dünyada kadr
potensialının davamlı inkişafının təmin edilməsində
inteqrasiyanın əhəmiyyətini vurğulayan Urxan Ələkbərov
bunun reallaşması istiqamətində hər iki qurum arasında
əməkdaşlığın vacib olduğunu bildirib. Rektor Dövlət
İdarəçilik Akademiyası ilə Litva Dövlət İdarəçilik
İnstitutu arasında imzalanacaq memorandumun dövlət
qulluqçularının ixtisasının artırılması, yenidən
hazırlanması, elmi tədqiqatların aparılması, təcrübə və
informasiya mübadiləsi sahəsində əməkdaşlıq baxımından
əhəmiyyətini vurğulayıb və belə əlaqələrin kadr
potensialının artırılmasına və onların idarəetmə
vərdişlərinin təkmilləşdirilməsinə xidmət etdiyini qeyd
edib.
Litva Dövlət İdarəçilik İnstitutunun direktoru,
professor Romualdas Povilas Petraitis çıxış edərək hər
iki dövlət qurumunun oxşar vəzifələrin həlli ilə məşğul
olduğunu, onların hər birində dövlət qulluğu kadrlarının
yenidən hazırlanması və ixtisasartırılması, dövlət
idarəçiliyinin səmərəliliyinin yüksəldilməsi
istiqamətində, elmi-analitik iş sahəsində müəyyən
təcrübə əldə edildiyini və bu təcrübəni bölüşməkdə
maraqlı olduqlarını söyləyib.
Sonda Azərbaycan Respublikasının Prezidenti yanında
Dövlət İdarəçilik Akademiyasının rektoru, akademik Urxan
Ələkbərov və Litva Dövlət İdarəçilik İnstitutunun
direktoru Romualdas Povilas Petraitis memorandum
imzalayıblar.
Tədbirdə Litva Respublikasının ölkəmizdəki fövqəladə və
səlahiyyətli səfiri Arturas Zuraukas iştirak edib.
Samirə KƏRİMOVA |