İsmayıl
Şahəliyev 1999-cu il mayın 29-da Bakı şəhərində anadan
olub. Onda şahmata həvəs 4 yaşından babası ilə bu müdrik
oyunu oynamaqdan başlayıb. İsmayılın şahmata olan
marağını görən valideynləri 7 yaşından onu 2 nömrəli
UGŞİM-nin baş məşqçisi, idman ustalığına namizəd Valeriy
Suselinin rəhbərlik etdiyi təlim-məşq qrupuna
yazdırıblar. O, hazırda Bakının Səbail rayonundakı
M.Rahim adına 7 nömrəli tam orta məktəbin VII sinfində
oxuyur, dərs əlaçısıdır. Çoxlu bədii kitab oxumağı,
şəkil çəkməyi, rəqs etməyi də sevir. Şahmata olan sonsuz
marağı isə onu iştirak etdiyi yarışlarda daha yüksək
nəticələr əldə etməyə gətirib çıxarıb.
İsmayıl 2007-ci ildə Bilik gününə həsr olunmuş şahmat
üzrə respublika miqyaslı turnirdə III yerə, 8 yaşadək
oğlanlar arasında XVIII Bakı kuboku uğrunda açıq
turnirdə III yerə, 2008-ci ildə IX əsr dahi Azərbaycan
şahmatçısı Cəlaləddin Naxçıvaninin xatirəsinə həsr
olunmuş respublika şahmat turnirində II yerə, şahmat
üzrə UGŞİM-i arasında keçirilən respublika
birinciliyinin zona yarışlarında II yerə, Azərbaycan
Xalq Cümhuriyyətinin 90 illiyi münasibəti ilə keçirilən
açıq birincilikdə III yerə, 2009-cu ildə UGŞİM-nin yığma
komandalarının respublika birinciliyinin Dəvəçi
rayonunda keçirilən şahmat üzrə Bakı şəhər
birinciliyində I yerə, 10 yaşadək oğlanlar arasında
respublika çempionatında II yerə, 2010-cu ildə
"Baku-Open" beynəlxalq şahmat turnirində 12 yaşadək
oğlanlar arasında III yerə, 2011-ci ildə şahmat üzrə
Bakı şəhər komanda çempionatında II yerə, 12 yaşadək
oğlanlar arasında Bakı şəhər çempionatında I yerə çıxıb.
Elə həmin ilin iyun ayında 12 yaşadək oğlanlar arasında
respublika çempionatında I yeri tutaraq Azərbaycan
çempionu olub. Dünya birinciliyinə vəsiqə qazanıb. O,
iyul ayında 12 yaşadək yeniyetmələrin Respublika Şahmat
Olimpiadasında II yeri, həmin ilin avqustunda isə
"Baku-Open 2011" Beynəlxalq şahmat turnirində I yerin
sahibi olub.
Uğurlarının sayını artırmaqda davam edən İsmayıl
Şahəliyev 2012-ci ilin martında 14 yaşadək oğlanlar
arasında keçirilən respublika çempionatında III yerə,
apreldə "Gənclik-Open 2012" Beynəlxalq Şahmat turnirində
II yerə çıxıb.
Həmin ilin aprel və mayında isə Rumıniyanın Yassi
şəhərində məktəblilərin şahmat üzrə Dünya çempionatında
14 yaşlı oğlanlar arasında dünya ikincisi olub.
Bakı Şəhəri üzrə Təhsil İdarəsinin 2 nömrəli Uşaq
Gənclər Şahmat İdman Məktəbinin yetirməsi olan İsmayıl
bundan sonra da qələbələri ilə Azərbaycanın və doğma
məktəblərinin adını ucaltmaq üçün var qüvvəsini
əsirgəməyəcəkdir. İnanırıq ki, o, şahmat oyununun
sirlərini daha da dərindən öyrənərək gələcək yarışlarda
dünya birincisi olacaqdır. Bu çətin və şərəfli yolda
İsmayıl Şahəliyevə biz də uğurlar diləyirik. |