Noyabrın 8-də Bakıdakı E.Məmmədov adına 21 nömrəli tam orta məktəbdə Yasamal rayonu Gənclər  və İdman İdarəsinin dəstəyi ilə 9  noyabr Dövlət Bayrağı Gününə həsr olunmuş yuxarı sinif şagirdləri arasında idmanın stend atıcılığı növü üzrə yarış keçirildi. Dövlət himninin səsləndirilməsi və dövlət bayrağının qaldırılması ilə başlanan tədbirdə Yasamal Rayon İcra Hakimiyyətinin ictimai-siyasi və humanitar məsələlər şöbəsinin baş məsləhətçisi Elçin Əhmədov, rayon Gənclər və İdman İdarəsinin rəisi İlham Səfərov,  məktəbin direktoru Ceyhun Bayramlı və digər qonaqlar çıxış edərək şagirdlərin milli vətənpərvərlik ruhunda tərbiyəsi və idmanın növlərinə həvəs yaratmaq baxımından yarışın əhəmiyyətindən danışdılar. Bu cür tədbirlərin təhsil ocaqlarında müntəzəm keçirilməsinin vacibliyini qeyd etdilər.  Məktəbin şagirdləri dövlət bayrağına aid  şeir söylədilər və mahnı ifa etdilər. Tədbirin əsas hissəsində məktəbin yuxarı sinif şagirdləri stend atıcılığı üzrə öz qüvvələrini sınadılar. Yarışda fərqlənən şagirdlər diplom və mükafatlarla təltif olundular.  Sonda şagirdlər məktəb rəhbərliyinin iştirakı ilə  Dövlət Bayrağı Meydanını ziyarət etdilər.

Bakıdakı 308 nömrəli tam orta məktəbdə Dövlət Bayrağı Gününə  həsr olunmuş tədbir  keçirilib. Tədbirə başlamazdan əvvəl Dövlət himni səslənib.   

Məktəbin direktoru Təranə Məmmədova tədbir iştirakçılarını bayram münasibətilə  təbrik edib. Şagirdləri Vətəni sevməyə, vətənin atributları olan gerbə, bayrağa hörmət və ehtiram bəsləməyə çağırıb.  Bildirib ki, ölkə başçısı 2009-cu il  noyabrın 17-də Dövlət Bayrağı Cününün təsis edilməsi haqqında sərəncam imzalamışdır. Həmin ildən də  noyabrın  9-u Azərbaycanda  Dövlət Bayrağı Cünü kimi qeyd olunur. Dövlət atributu olaraq Azərbaycan bayrağına ehtiram  göstərilməsi ölkə  vətəndaşlarının hər birinin  borcudur.

Tədbirdə müəllimlərdən  Pəri Qasımova, Günel İbrahimova və başqaları  Dövlət Bayrağı Günü haqqında çıxış ediblər. Şagirdlər Vətənə, Dövlət Bayrağına aid şeir söyləyib,  mahnı oxuyub  və rəqs ediblər.

Noyabrın 8-də Bakıdakı Ə.Abbasov adına 257 nömrəli tam orta məktəbdə Dövlət Bayrağı Gününə həsr olunmuş tədbir keçirildi. Tədbirdə Xətai Rayon İcra Hakimiyyətinin, Bakı Şəhəri üzrə Təhsil İdarəsinin nümayəndələri, pedaqoji heyət, valideynlər və şagirdlər iştirak edirdilər. Tədbir Dövlət himninin səslənməsi ilə başladı.  Sonra məktəbin direktoru Qarat Qaratov tədbir iştirakçılarını bayram münasibəti ilə təbrik etdi.  O, bayrağımızın tarixi haqqında məlumat verdi. Qeyd olundu ki, belə tədbirlərin keçirilməsi şagirdlərimizdə dövlətimizə, vətənimizə olan dərin məhəbbətlərindən irəli gəlir. 

Müəllimlərdən Şəhla Xəlilova və  Svetlana Məmmədova  şagirdlərin tədbirə böyük həvəslə hazırlaşdıqlarını vurğuladılar. Bildirildi ki, bütün müəllimlər şagirdlərində vətəndaşlıq hissinin üzə çıxmasına səy göstərirlər.

Tədbir şagirdlərin hazırladığı musiqili kompozisiya ilə davam etdi. Dövlət Bayrağı Gününə həsr olunmuş videoçarx nümayiş olundu.

Şagirdlər vətənimiz Azərbaycan haqqında şeirlər söylədilər.

 Tədbir  ulu öndərimiz Heydər Əliyevin məktəblilərə verdiyi tövsiyə ilə başa çatdı: "Vətən torpağı bizə ata-babalarımızdan qalan mirasdır. Biz onu qorumalıyıq". 

Bakıdakı 263 nömrəli tam orta məktəbin pedaqoji və şagird kollektivi Dövlət Bayrağı Gününü noyabrın 8-də keçirdiyi maraqlı ədəbi-bədii tədbirlə qeyd etdi. Tədbirdə Prezident təqaüdçüsü, tanınmış şair İlyas Tapdıq, şair Hacı Loğman, Bakı Şəhəri üzrə Təhsil İdarəsi Metod Mərkəzinin Xətai-Suraxanı metodiki bölməsinin müdiri Firduz Əhmədov, "Savalan" qəzetinin baş redaktoru Eldar Əliyev və başqa qonaqlar iştirak edirdilər.

Tədbir ölkəmizin azadlığı uğrunda mübarizələrdə şəhid olan vətən oğullarının xatirəsinin 1 dəqiqəlik sükutla yad olunması və Dövlət himnimizin ifası ilə başladı. Sonra məktəbin III "E" sinif şagirdləri müəllimləri Yeganə Ağayevanın rəhbərliyi ilə hazırladıqları ədəbi-bədii kompozisiyanı nümayiş etdirdilər. Şagirdlərdən biri tədbiri açıb bayraq haqqında şeir söylədikdən sonra ibtidai sinif müəllimi Yeganə Ağayeva bu günün əhəmiyyətindən, təsis olunma tarixindən söz açdı, bayram münasibətilə tədbir iştirakçılarını təbrik etdi. Üçüncülər iki bir, üç bir səhnəyə çıxıb dövlət bayrağımız, onun rənglərinin mənası, bayrağın dövlət bayrağı kimi qəbul olunmasında ulu öndərimiz Heydər Əliyevin xidmətləri haqqında danışdılar, eləcə də vətənpərvərlik ruhlu digər şeirlər söylədilər, xorla mahnılar ifa etdilər, maraqlı səhnəciklər nümayiş etdirdilər. Tədbirdə Dövlət Bayrağı Meydanından bəhs edən film, Azərbaycanın tarixi, görməli yerlərindən videogörüntülər nümayiş olundu, Azərbaycan dövlətinin qurucusu, ümummilli lider Heydər Əliyevin, ölkə Prezidenti İlham Əliyevin Dövlət bayrağı haqqında dedikləri fikirlər səsləndirildi.

Tədbir üçüncülərin mahnı sədaları altında yallı getmələri ilə başa çatdı. Sonra məktəbin direktoru Nəsimi Abbasov çıxış edərək Dövlət Bayrağı Gününün əhəmiyyətindən, bayrağımızın hər bir Azərbaycan vətəndaşı üçün qürur mənbəyi olmasından söz açdı, son illər məktəbdə görülən inkişaf yönümlü işlərə toxundu. Direktor şagirdlərin hazırladıqları ədəbi-bədii proqramın çox maraqlı olduğunu qeyd edib, tədbirin təşkili və keçirilməsində əməyi olanlara minnətdarlığını bildirdi.

Tədbirdə qonaqlara da söz verildi. Tanınmış şair İlyas Tapdıq, şair Hacı Loğman  tədbiri yüksək qiymətləndirib, məktəblilərin əsl istedad nümayiş etdirdiklərini vurğuladılar, Dövlət bayrağına həsr olunmuş şeirlərini oxudular.

Bakı Şəhəri üzrə Təhsil İdarəsi Metod Mərkəzinin Xətai-Suraxanı metodiki bölməsinin müdiri Firduz Əhmədov isə çıxışında məktəbdə görülən işləri, qazanılan uğurları, şagirdlərin nümayiş etdirdikləri yüksək hazırlığı xüsusilə diqqətə çatdırıb, kollektivə uğurlar arzuladı, bayram münasibətilə təbriklərini çatdırdı. 

"Azərbaycan müəllimi"