Haqqında
söhbət açmaq istədiyimiz Nicat Niftəliyev 1996-cı ildə
Bakıda anadan olub. 2002-ci ildə paytaxtda fəaliyyət
göstərən 264 nömrəli tam orta məktəbin birinci sinfinə
qəbul edilib. IX sinfi bitirdikdən sonra Bakı Sənaye
Pedaqoji Kollecinə qaxil olub. Hazıda həmin kollecin
ikinci kursunda təhsil alır. 2008-ci ildə Bakı şəhəri 8
nömrəli Üşaq-Gənclər İdman Məktəbinin məşqçi müəllimi,
idman ustası Əbülfəz Məmmədovun təşəbbüsü ilə Nicat
burada velosiped bölməsinə yazılıb. O, bir il məşq
etdikdən sonra Bakıda və rayonlarda keçirilən velosiped
yarışlarında müntəzəm iştirak etməyə başlayıb.
Nicat Quba, Qəbələ və Masallı rayonlarında keçirilən
respublika çempionatlarında Azərbaycan birincisi olub.
Medallar, fəxri fərmanlar və diplomlarla təltif olunub.
2011-ci ildən isə beynəlxalq yarışlara Türkiyənin Konya
şəhərindən başlayıb. Həmin ilin aprelində burada "1-ci
uluslararası RUMİ cocuq yarışı"nda dünyanın müxtəlif
ölkələrindən gəlmiş ağır atletika, cüdo, böyük tennis və
başqa idman növləri üzrə yarışlar keçirilirdi. Eyni
zamanda 8 ölkənin iştirak etdiyi velosiped yarışında
UGİM-nin də 4 idmançısı - Nicat Niftəliyev, Elgün
Əlizadə, Zöhrab Məmmədov və Elman İlyasov da var idi. Bu
qrup yürüşündə 60 kilometr məsafə qət edilməli idi.
Yarış Konya şəhərinin mərkəzi küçəsindən başlayıb.
Türkiyənin, Rumıniyanın, Bolqarıstanın, Moldovanın və
başqa ölkələrin 60-a yaxın seçmə velosipedçilərinin
iştirak etdiyi bu yarışda Nicat Niftəliyev finiş xəttinə
2-ci çatıb və gümüş medal qazanıb.
8 nömrəli UGİM-nin direktoru Kamran Qasımovla görüşümüz
zamanı bildirdi ki, velosiped idmanı üzrə gənclərdən
ibarət Azərbaycanın milli komandası baş məşqçi Əbülfəz
Məmmədovun rəhbərliyi altında 2012-ci il iyulun 9-dan
avqustun 20-nə qədər Avropanın bir sıra şəhərlərində
hazırlıq məşq toplantısı keçirib. Bu səfərdə əsas məqsəd
milli komandamızın Niderlandda təşkil olunan 48-ci
Avropa Velosiped Turunda və avqustda keçirilən Avropa
çempionatında iştirak etməkdən ibarət olub. Beş nəfərdən
ibarət olan milli komandanın tərkibində 8 nömrəli
UGİM-nin yetirmələrindən Nicat Niftəliyev, Elgün Əlizadə
və Sirac Hüseynzadə də olub.
İlk təlim məşq toplantısı Belçikada keçirilib. Milli
komandamız Belçikada olduğu müddətdə intensiv olaraq
məşqlərdə iştirak edib. Onlar velosiped idmanının həm
şose, həm də trek növündə təcrübələrini artırıblar.
Respublikamızda əsasən, düz və enli şoselərdə velosiped
sürməyi öyrənmiş idmançılarımız üçün Belçikada keçirilən
təlim məşq hazırlıqları öz vərdiş və bacarıqlarını
artırmağa çox böyük imkanlar yaradıb.
Kamran müəllimin sözlərinə görə, milli komandamız
Niderlandda təşkil olunan iki yarışda uğurla iştirak
edib. Niderlandın Assen şəhərində keçirilən 48-ci Avropa
velosiped turunda iştirak edən Azərbaycan milli
komandasının üzvü Nicat Niftəliyev Kriterium yarışında
III yeri tutaraq bürünc medalla təltif edilib. Həmin
yarışda milli komandanın digər üzvləri ümumi nəticədə
ilk iyirmiliyə düşüblər.
Nicat hazırda ölkə və beynəlxalq yarışlara çox ciddi
hazırlaşır. Onun ən böyük arzusu isə velosipedçilər
arasında dünya birincisi olmaqdır. Nicatın məşqçisi
Mübariz Məmmədov da onun bu arzusunun reallığa
çevriləcəyinə inanır. |