Regionların sosial-iqtisadi inkişafı Dövlət Proqramına müvafiq olaraq Cəlilabad rayonunda yeni məktəb binalarının tikintisi davam etdirilir.

Təhsil şöbəsindən bildirmişlər ki,  rayonda inşa edilən yeddi yeni məktəb binasının ikisi bu il istifadəyə verilmişdir. İlin sonuna kimi daha iki təhsil ocağının tikintisi başa çatdırılacaqdır.  320 şagird yerlik Həziabad və 220 şagird yerlik Soltankənd kənd məktəblərinin yeni binalarının tikintisi üçün hazırlıq işləri başa çatdırılmışdır. Zəhmətabad kəndində 80 yerlik yeni məktəb binasının tikintisi davam etdirilir.

***

Samux rayonunun 3 kəndində qəzalı vəziyyətdə olan məktəblər üçün yeni binalar inşa edilir.  Rayon təhsil şöbəsindən bildirmişlər ki, hazırda Lək kəndində 220 yerlik, Seyidlər kəndində 180 yerlik, Qiyaslı kəndində isə 80 yerlik orta məktəb binalarının tikintisi sürətlə aparılır. Məktəb binalarının 2012-ci ilin sonuna kimi istifadəyə verilməsi nəzərdə tutulmuşdur.

***

Ağstafa Rayon Təhsil Şöbəsindən bildirmişlər ki, hazırda Soyuqbulaq qəsəbəsində 220, Göycəli kəndində 360 yerlik məktəb binalarının və Köçəsgər kəndində 1 nömrəli tam orta məktəb üçün 200 yerlik yeni tədris korpusunun tikintisi davam etdirilir.

İlin sonunadək Soyuqbulaq və Köçəsgər kənd məktəblərinin istifadəyə verilməsi nəzərdə tutulmuşdur. 

Rəşad ZİYADOV