Naxçıvan Müəllimlər İnstitutunun professor-müəllim heyətinin təbiət və incəsənət fakültəsinin I kurs tələbələrinin valideynləri ilə görüşü keçirilmişdir. Görüşdə institutun tədris işləri üzrə prorektoru, professor Akif İmanlı çıxış edərək bildirmişdir ki, müəllim əməyinin nəticəsində cəmiyyət formalaşır, savadlı, bilikli, geniş dünyagörüşlü, nümunəvi əxlaqa malik insanlar yetişir.

Bu insanlar isə cəmiyyəti daha da inkişaf etdirir. Hazırda ölkəmizin müstəqilliyinin möhkəmlənməsində fəal iştirak edən insanlar məhz müəllim əməyinin yetirmələridir. Hər birimizin layiqli vətəndaş kimi yetişməyində müəllimlərimizin əvəzsiz xidmətləri olmuşdur. Ümummilli liderimiz Heydər Əliyev həmişə müəllim əməyini yüksək qiymətləndirmiş, müəllim haqqında xoş sözlər söyləmişdir. O, öz müəllimlərini minnətdarlıqla xatırlayar, onların xidmətləri haqqında ürəkdolusu danışardı. Ulu öndər Heydər Əliyev ölkəmizə rəhbərlik etdiyi bütün dövrlərdə həmişə müəllimə hörmət və ehtiramla yanaşmış, onların maddi vəziyyətinin, rifah halının yaxşılaşdırılması qayğısına qalmışdır. Ümummilli lider deyirdi: "Hər birimizdə müəllimin hərarətli qəlbinin bir zərrəciyi vardır. Məhz müəllim doğma yurdumuzu sevməyi, hamının rifahı namınə vicdanla işləməyi müdrikliklə və səbirlə bizə öyrətmiş və öyrədir".

Tədbirdə fakültə dekanı İsa Əliyev tələbələr üçün yaradılmış hərtərəfli şəraitdən danışmış, fakültənin strukturu haqqında valideynlərə məlumat vermişdir. İnstitutun kafedra müdirləri Miryasin Eminov, Rövşən Vəliyev çıxış ediblər. Valideynlər adından Həsən Əliyev çıxışında göstərilən qayğıya görə minnətdarlığını bildirmişdir.  

Naxçıvan Müəllimlər İnstitutunun Mətbuat xidməti