Noyabrın
17-də Azərbaycan Müəllimlər İnstitutunda "Nə? Harada?
Nə zaman?" intellektual oyunu üzrə tələbələrarası
respublika çempionatının seçim turu keçirildi.
İnstitutun tərbiyə işləri üzrə prorektoru s.e.f.d. Rəşad
Sadıqov çıxış edərək, ilk növbədə, AMİ-nin rektoru,
Milli Məclisin deputatı, professor Aqiyə Naxçıvanlının
adından yarış iştirakçılarını salamladı. Tədbirin
əhəmiyyətindən, son aylarda tələbələrin müxtəlif
yarışlarda əldə etdikləri nailiyyətlərdən danışan
R.Sadıqov yarışın keçirilmə tarixinin çox əlamətdar günə
təsadüf etdiyini də vurğuladı. 17 noyabr Milli Dirçəliş
Günü və eyni zamanda Beynəlxalq Tələbə Günü münasibətilə
bütün tələbələri təbrik etdi, yüksək intellektual
yarışın seçim turunda və qarşıdakı final mərhələsində
onlara müvəffəqiyyətlər arzuladı. O, bu cür yarışların
tələbələrin öz asudə vaxtlarını keyfiyyətli
dəyərləndirməsinə və elmi-məntiqi qabiliyyətlərini
ortaya çıxarmasına, onların intellektual potensialının
mübarizədə qiymətləndirilməsinə imkan yaratdığını qeyd
etdi. Bildirdi ki, AMİ-nin hər biri 6 nəfərdən ibarət
olmaqla, 22 komanda heyəti ilə bu oyunda iştirak edir.
İnstitutun filialları ilə 79 komandanın yarışda iştirak
etməsi o deməkdir ki, ümumilikdə çempionatda mübarizə
aparan 2800-dən çox tələbədən 474-ü məhz Azərbaycan
Müəllimlər İnstitutu və onun filiallarında təhsil alan
tələbələrdir.
Xəzər İntellektuallar Klubunun rəhbəri Seymur Teymurov
intellektual oyunların inkişafı üçün yaradılmış şəraitə,
yüksək təşkilatçılığa görə institutun rektoru, professor
A.Naxçıvanlıya öz minnətdarlığını bildirdi. Bildirdi
ki, bu çempionat Xəzər İntellektual Gənclər Klubu,
İrəli İctimai Birliyi, Azərbaycan İntellektual Oyunlar
Federasiyası, Azərbaycan Respublikası Gənclər Fondunun
dəstəyi ilə Beynəlxalq Klublar Assosiasiyasının
lisenziyası əsasında təşkil edilmişdir. Nəticədə,
institutun Ağcabədi, Zaqatala, Sumqayıt, Gəncə, Quba,
Şamaxı filiallarından hərəsindən bir, Şəki və Salyan
filiallarından iki komanda finala vəsiqə qazanıb.
Daha sonra oyun meydanında tədbirin aparıcısı
Tələbələrarası Azərbaycan Çempionatı təşkilat
komitəsinin üzvü, Turan İntellektual Oyunlar Klubunun
prezidenti Vüqar Zeynalov yarışın qaydaları haqqında
ətraflı məlumat verdi, iştirakçıları maraqlandıran
sualları cavablandırdı.
Oyun şəffaf şəraitdə keçdi və komandalar bacardıqları
qədər öz intellektual və məntiqi potensiallarını nümayiş
etdirdilər. Yarışda xal hesabına görə "Kristal",
"Mirvari", "Mübarizlər" və "Gənc müəllimlər" komandaları
bir-birlərinə çox yaxın idilər. Sonda "Kristal"
komandası xal və reytinq hesabına görə çempionatın final
mərhələsinə vəsiqə qazandı.
Bildirək ki, "Nə? Harada? Nə zaman?" oyunu
tələbələrarası respublika çempionatının final mərhələsi
noyabrın 25-də keçiriləcək.
Azərbaycan Müəllimlər İnstitutunun
Tələbə Gənclər Təşkilatı |