Lalə Yusifova Bakıdakı 236 nömrəli tam orta məktəbin X "e" sinif şagirdidir. O, neçə illərdir ki, bədii gimnastika ilə məşğul olur. İştirak etdiyi rayon, şəhər və beynəlxalq turnirlərdə medallarının sayını artırmaqda davam edir.

Bu günlərdə Azərbaycan Gimnastika Federasiyasından aldığımız məlumatda bildirilir ki, Lalə Yusifova Çexiyanın Brno şəhərində keçirilən Qran-pri yarışlarında iştirak edib. Bakı gimnastı burada iki gümüş medala sahib olub. Lalənin birinci gün keçirilən çoxnövçülük yarışında fəxri kürsiyə qalxmaq üçün cəmi yarım balı çatmayıb. Final turnirinin ikinci günü isə gürz və lentlə hərəkətlərdə qazandığı medallar və diplomlarla yanaşı, ona "Bohema" büllur kuboku da təqdim edilib.

Bu yarışın nəticəsindən razı qalan bədii gimnastika üzrə milli komandanın baş məşqçisi Mariya Vasilyeva bildirib ki, Lalə son dörd yarışda sabit olaraq yaxşı nəticələr göstərib. O, inkişaf edir, daim qələbə qazanmaq əzmini artırır. Bu, əsl idmançı üçün çox yaxşı haldır.   

Hazırladılar: Ədalət DAŞDƏMİRLİ,
Şakir CƏFƏROV,
Rəşad ZİYADOV