Noyabrın 26-da Azərbaycan Dillər Universitetində (ADU) 1
dekabr - Qazanılmış İmmun Çatışmazlığı Sindromu (QİÇS)
ilə Mübarizə Gününə həsr olunmuş tədbir keçirilmişdir.
ADU-dan AzərTAc-a bildirmişlər ki, tədbirdə prorektor
Ələddin Əliyev universitetdə bu cür tədbirlərin
keçirilməsinin ənənə halını almasından, belə görüşlərin
tələbələrin sağlam həyat anlayışlarının düzgün
istiqamətdə formalaşmasına zəmin yaratmasından
danışmışdır.
Respublika QİÇS-lə Mübarizə Mərkəzinin həkimi Dilşad
Mahmudova geniş yayılmış müxtəlif mənşəli infeksion
xəstəliklərdən biri olan QİÇS barədə ətraflı məlumat
vermişdir. Statistik göstəricilərə əsasən, son illər
insan sağlamlığı əleyhinə olan zərərli vərdişlərdən
istifadə nəticəsində xəstəliklərə yoluxanların sayının
artdığı diqqətə çatdırılmışdır. D.Mahmudova əsas
məqsədin gəncləri bu cür pis vərdişlərdən uzaqlaşdırmaq
olduğunu qeyd etmiş, epidemiyanın yaranma səbəbləri,
yoluxma şəraitləri, ondan qorunmağın yolları barədə
geniş məlumat vermişdir. O, tələbələrə sağlamlıqlarının
qeydinə qalmağı, pis vərdişlərdən uzaq olmağı tövsiyə
etmişdir.
Respublika Narkoloji Mərkəzinin narkoloqu Asif Kəngərli,
Elmi-Tədqiqat Mamalıq və Ginekologiya İnstitutunun
mama-ginekoloqu Səidə Məmmədli bu cür tədbirlərin
keçirilməsinin gənclərin düzgün istiqamətləndirilməsində
mühüm addım olduğunu vurğulamışlar. Hazırda yeni ailə
quracaq gənclərimiz üçün ailə paketlərinin hazırlandığı
diqqətə çatdırılmışdır.
Sonda tələbələri maraqlandıran suallar
cavablandırılmışdır. |