Noyabrın 30-da Azərbaycan Dövlət Pedaqoji Universitetində böyük sənətkar  Hüseyn Cavidin 130 illik  yubileyinə həsr olunmuş tədbir keçirildi.  ADPU-nun filologiya fakültəsinin dekanı, filologiya elmləri doktoru, professor Buludxan Xəlilov çıxış edərək    tədbirin Azərbaycan Respublikasının  Prezidenti  İlham Əliyevin "Hüseyn Cavidin 130 illik yubileyinin keçirilməsi haqqında" 2012-ci il 16 fevral tarixli sərəncamına əsasən təşkil edildiyini diqqətə çatdırdı.

B.Xəlilov H.Cavidin Azərbaycan dramaturgiyası və realist ədəbiyyatının inkişafındakı  xidmətlərindən danışdı. Bildirdi ki,  cavidsevərlər, onun yaradıcılığına yaxından bələd olanlar bilirlər ki, islami dəyərlərə sadiq olan, öz qələmi, düşüncəsi və məfkurəsi ilə türkçülüyə xidmət edən H.Cavid  son ana qədər türkçülük ideologiyası uğrunda mübarizə aparmışdır. O, türklərin tarixini, bütövlükdə bəşəriyyəti düşünür, cəmiyyətin nicat yolunu axtarırdı. Bu mənada H.Cavid yalnız Azərbaycan ədəbiyyatının deyil, dünya ədəbiyyatının görkəmli nümayəndəsidir.

Sonra ADPU-nun elmi işlər üzrə prorektoru, professor Vilayət Əliyev, Azərbaycan və dünya ədəbiyyatı tarixi kafedrasının müdiri, filologiya elmləri doktoru, professor Himalay Qasımov,  həmin kafedranın  müəllimi, filologiya elmləri doktoru  Ramin Əhmədov,   şair Oqtay Rza Hüseyn Cavidin yaradıcılığı və fəaliyyətindən söz açdılar.

Tədbirdə filologiya fakültəsi tələbələrinin ifasında H.Cavidin ədəbi irsindən nümunələr oxundu və əsərlərindən müəyyən hissələr söylənildi.

Tədbir diskussiya şəklində başa çatdı.

Şakir CƏFƏROV