Dekabrın 1-də Astara Pedaqoji Kollecində valideynlər
yığıncağı keçirildi. Artıq ənənə halını alan yığıncaqda
200-dən artıq valideyn iştirak edirdi. Yığıncaqda
kollecin direktoru, əməkdar müəllim Əlihəsən Həmzəyev
məruzə-təqdimatla çıxış etdi. Məruzə-təqdimatda ulu
öndər Heydər Əliyevin müstəqil Azərbaycan
Respublikasında təhsil sisteminin inkişafındakı misilsiz
rolu, ölkə Prezidenti cənab İlham Əliyevin bu gün təhsil
sahəsində apardığı islahatlar, Heydər Əliyev Fondunun
prezidenti, Milli Məclisin deputatı Mehriban Əliyevanın
təşəbbüsü və rəhbərliyi ilə həyata keçirilən layihələrin
ölkə təhsilinin tərəqqisinə müsbət təsiri haqqında
valideynlərə geniş məlumat verən Ə.Həmzəyev sonra
kollecin 20 illik tarixinə nəzər saldı. Bu barədə
hazırlanmış video və fotolar səhnədə nümayiş etdirildi
və valideynlər əyani olaraq kollecin nailiyyətləri ilə
tanış oldular. Respublikamızın əksər rayonlarında,
xüsusən cənub bölgəsində olan təhsil müəssisələrində
kollecin məzunlarına rast gəlinir. Kollecin rəhbərliyi
valideynlərlə sıx əlaqə saxlamağı və fəaliyyət zamanı
onların təkliflərini nəzərə almağı iş prinsipinə
çevirmişdir.
Hörmətli təhsil naziri Misir Mərdanov təhsil
müəssisələrində valideynlərin məktəblə əlaqələrinin
artırılmasına xüsusi diqqət verdiyini və bunun
əhəmiyyətli bir iş olduğunu daim vurğulayıb.
Ə.Həmzəyev məruzə-təqdimatda valideynlərə tələbələrin
təlim, tərbiyə, idman və musiqi müsabiqələrində
uğurlarından, dərsə davamiyyətindən, vahid geyim
formasından, mədəni davranışdan, böyüklərə hörmət və
kiçiklərə qayğıdan, elmi-kütləvi, mədəni tədbirlərdə
iştirakdan, verilmiş proqram materiallarının,
müəllimlərin tapşırıqlarının yerinə yetirilməsindən,
dərsliklər, ədəbiyyat və metodik nəşrlərdən, yeni təlim
texnologiyalarından, İKT-dən istifadədən və müasir
dövrün digər problemlərindən səmimi söhbət açdı. O,
valideynləri də öz növbəsində açıq dialoqa çağırdı. Qeyd
edildi ki, son vaxtlarda gənclər arasında bir sıra
neqativ halların artması müşahidə edilir. Odur ki,
valideynlər bu sahədə daha diqqətli olmalı və təhsil
müəssisəsi ilə əlaqəni gücləndirməlidirlər.
Valideynlərdən Sabir Quliyev, Mürvət Abbaszadə, Maqsud
Şirəliyev, Nazimə Rzayeva və başqaları çıxış edərək belə
görüşlərin böyük əhəmiyyət daşıdığını vurğuladılar.
Yığıncağı yekunlaşdıran Ə.Həmzəyev valideynləri gənc
nəslin tərbiyəsi və onların intellektual səviyyəsinin
yüksəldilməsi məqsədilə pedaqoji kollektivlə daha sıx
əlaqə saxlamağa və bu prosesdə yaxından iştirak etməyə
çağırdı.
Azad ABDULLAYEV |