Dekabrın 12-də Bakıdakı 267 nömrəli məktəb-liseydə
ümummilli lider Heydər Əliyevin anım gününə həsr olunmuş
tədbir keçirildi. İştirakçılar əvvəlcə məktəbin
foyesində şagirdlərin ulu öndərə həsr etdikləri rəsm və
əl işlərindən ibarət sərgi ilə tanış oldular. Akt
zalında təşkil olunmuş tədbir ulu öndər Heydər Əliyevin
əziz xatirəsinin bir dəqiqəlik sükutla yad edilməsi ilə
başladı. Tədbiri giriş sözü ilə məktəb-liseyin direktoru
Adilə Orucova açaraq Heydər Əliyevin Azərbaycan xalqına
göstərdiyi misilsiz xidmətlərdən danışdı. Ulu öndərin
daxili və xarici siyasətindən söz açan A.Orucova
bildirdi ki, bu gün Azərbaycanın qazandığı bütün
uğurların əsası məhz Heydər Əliyev tərəfindən
qoyulmuşdur. Dahi rəhbərin bütün fəaliyyəti yalnız öz
xalqına xidmətə yönəlmişdi. Onun ideyaları, siyasət,
iqtisadiyyat, elm, təhsil və digər sahələrdə həyata
keçirdiyi islahatlar, möhtəşəm layihələr xalqımızın
rifahına, işıqlı gələcəyinə xidmət etmişdir. Hər bir
azərbaycanlı onun zəngin irsini öyrənməli, gələcək
nəsillərə çatdırmalıdır.
Sonra müəllimlərdən Nailə Cəlilova, Valya Bağırova və
Şəfaqət Ələkbərova ümummilli liderimizin ömür yoluna
nəzər salaraq bildirdilər ki, xoşbəxt o xalqdır ki,
onun Heydər Əliyev kimi ümummilli lideri var. Heydər
Əliyevin elmin, təhsilin inkişafına hər zaman böyük
diqqət və qayğı ilə yanaşdığı, ulu öndərin siyasi
kursunun Azərbaycan Prezidenti İlham Əliyev tərəfindən
uğurla davam etdirildiyi diqqətə çatdırıldı. Qeyd olundu
ki, ulu öndər Heydər Əliyev tərəfindən milli
ideologiyamızın mükəmməl konsepsiyası işlənib
hazırlanmışdır. Onun daxili və xarici siyasəti
nəticəsində dövlətçilik konsepsiyası uğurla həyata
keçirilmişdir. Azərbaycanda sabitliyin qorunub
saxlanılması, ölkənin bütün sahələrində tətbiq olunan
uğurlu islahatlar onun dövlətçilik konsepsiyasının
ideyaları sayəsində gerçəkləşmişdir.
Çıxış edən qonaqlar da ulu öndər Heydər Əliyevin
xalqımız qarşısında misilsiz xidmətlərindən danışdılar.
Şagirdlərdən Azad Abdullayev, Nigar Həsənova, Ramilə
Kərimli, Ağahüseyn Cavadov və başqaları Zəlimxan
Yaqubun, digər şairlərin ulu öndərimizə həsr etdikləri
şeirlərdən nümunələr söylədilər.
Sonda ümummilli lider Heydər Əliyevə həsr olunmuş
videoçarx nümayiş etdirildi.
Rəşad ZİYADOV |