Köklü
islahatların həyata keçirildiyi təhsil sektorunda baş
verən yeniliklər daim dövlətin diqqət mərkəzindədir.
Azərbaycan Respublikası Prezidentinin imzaladığı çoxlu
sayda fərman və sərəncamları, dövlət proqramları
təhsilin müasir və beynəlxalq standartlara
uyğunlaşdırılmasını, milli və mənəvi dəyərlərə
söykənməklə dünya təhsilinə inteqrasiya olunmasını
prioritet sahə kimi irəli sürür. Təhsilin keyfiyyətinin
yüksəldilməsində ən başlıca amil təhsil sahəsində
çalışan rəhbər və pedaqoji kadrların peşəkarlıq
səviyyəsinin artırılmasıdır. Bu vacib məsələyə diqqət
yetirilərək əlavə təhsillə bağlı bir çox ciddi
məsələlərin araşdırılmasını və qarşıya çıxan
problemlərin aradan qaldırılmasını tələb edən sənədlər
hazırlanmışdır.
Qarşıya qoyulan vəzifələrin yerinə yetirilməsi, əlavə
təhsilin keyfiyyətinin yüksəldilməsi və bu sahədə
görülən işlərin təhsilin bütün pillələrini əhatə etməsi
məqsədi ilə hazırlanan sənədlər sırasında Azərbaycan
Respublikası Nazirlər Kabinetinin 2010-cu il 06 sentyabr
tarixli 163 nömrəli qərarı, Azərbaycan Respublikası
təhsil nazirinin 18 aprel 2012-ci il tarixli 597 nömrəli
"İxtisasartırma təhsili proqramlarının
qiymətləndirilməsinə dair təlimatın təsdiq edilməsi
barədə" əmri xüsusi əhəmiyyət kəsb edir. Təhsil
sahəsində çalışan rəhbər və pedaqoji kadrların
ixtisasının artırılmasına milli məsələ kimi baxılmasını
tələb edən bu sənəd hər bir vətəndaşın fasiləsiz təhsil
almaq imkanını təmin edir və potensialının inkişafının,
kadrların intellektual və peşə hazırlığı səviyyəsinin
yüksəldilməsini və təkmilləşdirilməsinin, onların daim
dəyişən və yeniləşən əmək şəraitinə
uyğunlaşdırılmasının, yaşlı vətəndaşların ölkənin
sosial, iqtisadi, siyasi və mədəni həyatında fəal və
səmərəli iştirakının təmin edilməsi vəzifəsini
daşıyır.
Əlavə təhsilin dərəcələrin yüksəldilməsi,
yenidənhazırlanma, stajkeçmə və kadrların
təkmilləşdirilməsi istiqaməti üzrə də yeni mexanizmlərin
tətbiq edilməsi üçün müvafiq təşkilati işlər həyata
keçirilməkdədir.
Əlavə təhsil sahəsində xüsusi fəaliyyəti olan Azərbaycan
Müəllimlər İnstitutunda əlavə təhsilin
müasirləşdirilməsi və yeni metodların tətbiqi
istiqamətində xeyli uğur qazanılmışdır. Yeni pedaqoji
tələblər və gözlənilən nəticələr əsas meyar kimi
qiymətləndirilir.
Qeyd olunan məsələlərin həlli istiqamətində təhsil
müəssisələri ilə əlaqələrin yeni tələblər səviyyəsində
qurulması, pedaqoji kadrların ixtisasartırma və
təkmilləşdirilməsi təhsili daha çevik formada və yeni
metodlarla həyata keçirilməsi əlavə təhsil
müəssisələrinin üzərinə mühüm vəzifələr qoyur. Bununla
əlaqədar olaraq AMİ-nin təşəbbüsü və Təhsil Nazirliyinin
razılığı ilə institutun Sumqayıt, Gəncə, Mingəçevir,
Şəki və Salyan filiallarında zonalar üzrə işgüzar
seminar-müşavirələrin təşkil edilməsi nəzərdə
tutulmuşdur. Bu məqsədlə Azərbaycan Müəllimlər
İnstitutunun əmrinə əsasən 3-4 dekabr 2012-ci il
tarixində AMİ-nin Şəki filialında seminar-müşavirə
keçirilmişdir.
Azərbaycan Müəllimlər İnstitutunun rektorunun müvafiq
əmrinə əsasən Təhsildə İnnovasiya kabinetinin müdiri
Dilguşə Süleymanova və kabinetin metodisti Eldəniz
İsmayılov 3-4 dekabr 2012-ci il tarixlərində Şəki və
Zaqatala filiallarının dislokasiyasına daxil olan
RTŞ-ləri və filialların metodik kabinetinin müdirləri və
metodistləri üçün "Dayaq məntəqələrinin təşkili, onun
fəaliyyətinin forma və məzmununa qoyulan tələblər",
"İxtisasartırma təhsilindən əvvəl müəllimin
özünüqiymətləndirmə kriteriyaları və onların ixtisasının
artırılmasına fərdi tələbatların müəyyənləşdirilməsi",
"İxtisasartırma təhsilində çevik proqramların tətbiqi"
mövzularında seminar-müşavirə iştirakçıları qarşısında
çıxış etmişlər və bu mövzular ətrafında müzakirələr
aparılmışdır.
AMİ-nin Şəki filialında keçirilmiş seminar-müşavirəni
filialın direktoru R.Rəsulov açaraq ixtisasartırma
təhsilinin təşkilində RTŞ-nin və filialların qarşısında
duran vəzifələri, problemləri və bunun həlli yolları,
kredit-modul sisteminə keçidin zəruriliyindən
danışmışdır.
Sonra seminar-müşavirə iştirakçılarının tələbatını
öyrənmək məqsədilə anket sorğu keçirilərək gündəlik
təsdiq edilmişdir. Gündəliyə daxil olan birinci məsələ
ilə əlaqədar hazırlanmış slaydlar vasitəsilə
dinləyicilərə ətraflı məlumat verilmiş, onlar praktik
işə cəlb edilmiş, tapşırıqları yerinə yetirməklə qarşıya
qoyulan məsələ - ixtisasartırma təhsilinin
səmərəliliyini artırmaq və müdavimlərin maraqlarının
öyrənilməsi və ödənilməsi üçün görüləcək işlər geniş və
ətraflı şərh edilmişdir. Müzakirələrdə dinləyicilər
fəal iştirak edərək qoyulmuş məsələyə öz fikirlərini,
irad və təkliflərini bildirmişlər. İştirakçıların yekdil
rəyi ondan ibarət olmuşdur ki, dayaq məntəqələrinin
işinin gücləndirilməsində R(Ş)TŞ-ləri, ixtisasartırma
təhsil müəssisələri və metodkabinetlər təhsilin
sistemləşdirilmiş bilik, bacarıq, vərdiş, dəyər və
keyfiyyətlərin mənimsədilməsi prosesi və nəticəsi
olduğunu əldə rəhbər tutaraq problemlərin aradan
qaldırılmasına nail olmalı, müəllim əməyini
stimullaşdırmaqla müsbət nəticəyə nail olmalıdırlar.
Dinləyicilərin tələbat və ehtiyaclarının öyrənilməsi
nəticəsində gündəliyə daxil edilmiş "Təhsildə alman
texnologiyası" mövzusunda E.İsmayılov hazırladığı
slaydlar vasitəsi ilə "İlkin şərt və şəraitin qabaqcadan
qiymətləndirilməsi", "Ünvanların təhlili üçün
indikator", "Vaxt keçdikcə diqqət və yorğunluq
mərhələləri", "Vaxt seçiminə uyğun yaddaşda biliklərin
saxlanılması", "Göndərən-qəbul edən kommunikasiya
modeli", "Spiralvari konvergensiyanın modeli" və
"Kommunikasiyanın aksiomaları" yarım mövzularını
ətraflı izah etdi.
Sözügedən məsələlər ətrafında geniş müzakirələr aparıldı
və iştirakçıların rəy və təklifləri qeyd olunaraq nəzərə
alındı.
Sonda seminar-müşavirənin qiymətləndirilməsi üçün
hazırlanmış indikator blanklar dinləyicilərə paylandı və
aparılmış təhlil göstərdi ki, belə tədbirlərə yerlərdə
ehtiyac var və iştirakçılar gələcəkdə bunun davamlı
olması təkliflərini irəli sürdülər.
Seminar-müşavirəni filialın direktoru dosent R.Rəsulov
yekunlaşdıraraq qeyd olunmuş rəy və təkliflərin nəzərə
alınmasını və vacibliyini bildirdi.
Zonalarda seminar-müşavirələr davam edir. Növbəti
müşavirələrin Mingəçevir, Gəncə, Salyan və Sumqayıt
filiallarında keçiriləcəyi nəzərdə tutulur.
Dilguşə SÜLEYMANOVA,
AMİ-nin Təhsildə İnnovasiya Kabinetinin müdiri,
"Ən yaxşı müəllim" müsabiqəsinin qalibi |