İstedadlı
gənc, gözəl skripka ifaçısı Həmidə Ağasoy haqqında ilk
dəfə bu yaxınlarda - Azərbaycan Milli Konservatoriyası
nəzdində Musiqi Kollecində keçirilən gənc ifaçıların
Respublika müsabiqəsində eşitdim. Musiqi Kollecinin
direktoru, əməkdar incəsənət xadimi, professor Nazim
Kazımov müsabiqənin açılış mərasimində iştirakçılara
belə bir xoş xəbər çatdırdı ki, tələbələri Həmidə Ağasoy
bu yaxınlarda Macarıstanın paytaxtı Budapeştdə
keçirilmiş beynəlxalq müsabiqənin laureatı olub.
Əlavə etdi ki, bu, Həmidənin beynəlxalq arenada
qazandığı ən böyük uğurlardan biridir. Bu məlumatdan
sonra Nazim müəllim mərasim iştirakçılarının alqış
sədaları altında gənc skripkaçıya diplom təqdim etdi.
Elə həmin gün Həmidənin digər bir uğuruna da şahid
olduq. O, böyük Azərbaycan bəstəkarı Fikrət Əmirovun 90
illik yubileyinə həsr olunmuş gənc ifaçıların
Respublika müsabiqəsinin də qalibi oldu. Müsabiqənin
açılış mərasiminin konsert proqramına Həmidənin də
çıxışı daxil edilmişdi və biz böyük məmnuniyyət hissi
ilə onun ifasını dinlədik. Həmin müsabiqədə ölkə üzrə
10 orta ixtisas musiqi təhsili müəssisəsindən 60-dək
iddiaçı mübarizə aparırdı.
Həmidə ilə növbəti görüşüm də müsabiqədən bir neçə gün
sonra Musiqi Kollecində oldu. Onunla sevib-seçdiyi
sənət, iştirakçısı olduğu müsabiqə və konsertlər,
gələcək arzuları barədə söhbət etdik.
Həmidə Ağasoy 1995-ci ildə Naxçıvan Muxtar
Respublikasının Culfa rayonunda anadan olub. Onda
musiqiyə həvəsi musiqiçi olan anası oyadıb. Böyük
bacısı İlahə də həyatını musiqiyə həsr edib.
Fortepianoda çalır. Hazırda Ü.Hacıbəyli adına Bakı
Musiqi Akademiyasında təhsil alır.
Həmidə skripkanı da anasının istəyi ilə seçib. Həssas
ana qızının bu sahədəki istedadını öncədən duya bilib.
Bir il Naxçıvanda musiqi məktəbində oxuyub. Sonra
ailələri Bakıya köçdüyündən 2003-cü ildən təhsilini
burada davam etdirib. 16, 15, 21, 12 nömrəli musiqi
məktəblərində oxuyub. 15 nömrəli musiqi məktəbində
oxuyarkən müəllimi olmuş Aida İmişovanı özünün ustadı
hesab edir. Skripkanın - bu möcüzəli alətin sirlərini
məhz ondan öyrəndiyini vurğulayır.
Həmidə Ağasoy eyni zamanda Bakıdakı 20 nömrəli
məktəb-liseydə oxuyub, 229 nömrəli məktəbdə ümumi orta
təhsilini başa vurub. Gənc istedad 2010-cu ildə
müvəffəqiyyətlə imtahan verərək Azərbaycan Milli
Konservatoriyası nəzdində Musiqi Kollecinə daxil olub.
Hazırda III kursda təhsil alır.
H.Ağasoyun böyük səhnəyə gedən yolu II sinifdə
başlayıb. Belə ki, məhz II sinifdə oxuyarkən ilk dəfə
müsabiqədə iştirak edib. 2005-ci ildə bacısı İlahə ilə
birlikdə okompaniment müsabiqəsinə qatılıb və hər ikisi
diplomla təltif olunub. 2008-ci ildə musiqi məktəbləri
şagirdlərinin Respublika ifa müsabiqəsində iştirak
edərək qaliblər sırasında olub. 2006-cı ildə Heydər
Əliyev Fondunun prezidenti, YUNESKO-nun və İSESKO-nun
xoşməramlı səfiri, Milli Məclisin deputatı Mehriban
xanım Əliyevanın təşəbbüsü ilə ABŞ-da təşkil olunmuş
konsertdə çıxış edib. Müslüm Maqomayev adına Azərbaycan
Dövlət Filarmoniyasında Teymur Göyçayevin rəhbərliyi
altında kamera orkestri ilə çıxışını isə Həmidə böyük
səhnədəki ilk ciddi addımlarından sayır. Sonralar belə
çıxışları çox olub. Beynəlxalq aləmdə ilk böyük
qələbəsini isə Macarıstanın paytaxtı Budapeştdə
qazanıb. Bu il oktyabrın 25-dən 31-dək burada
keçirilmiş "Budapeşt ulduzları" adlı XI Beynəlxalq
müsabiqədə 12 ölkədən 600-dən çox gənc musiqiçi iştirak
edib. Bu mötəbər yarışmada ölkəmizi Həmidə, bacısı
İlahə və bir-iki nəfər digər ifaçı təmsil edib. Bacısı
II, Həmidə isə III yeri tutub.
Bu günlərdə isə təhsil aldığı kollecdə təşkil olunmuş
Həmidənin solo konserti çox uğurla keçib.
Hazırda müəllim Ağahüseyn Hüseynovun sinfində oxuyan
Həmidə kollecdə gənc istedadların inkişafı üçün
yaradılan şəraitdən, kollec rəhbərliyinin tələbələrə
göstərdiyi qayğı və diqqətdən çox razıdır. Arzusu
kolleci bitirdikdən sonra Musiqi Akademiyasında oxumaq,
Koreyada musiqi təhsilini davam etdirmək, məşhur italyan
skripkaçısı Paqanininin konsertlərini ifa etmək,
tanınmış skripkaçı olmaqdır.
Gənc istedada bu yolda böyük uğurlar diləyirik.
Yusif ƏLİYEV |