F.Köçərli adına  Respublika Uşaq  kitabxanasında Azərbaycanın görkəmli şairi Xurşudbanu Natəvanın anadan olmasının 180 illiyinə həsr edilmiş tədbir keçirilib. Bakıdakı 189 nömrəli tam orta məktəbin təşkilatçılığı ilə keçirilən tədbiri kitabxananın direktoru Fizurə Quliyeva açaraq Xan qızınının həyat və yaradıcılığından ətraflı bəhs edib. Onun şairliklə yanaşı, rəssam, tikmə ustası kimi böyük istedad sahibi olduğunu, Qarabağ torpağının yetişdirdiyi  sənətkarlar arasında  özünəməxsus yer tutduğunu vurğulayıb.

Sonra yazıçı Mustafa Çəmənli X.Natəvanın 180 illik yubileyi ilə əlaqədar  danışaraq görkəmli ədibə həsr etdiyi "Neçin gəlməz" adlı kitabını iştirakçılara təqdim edib. Yazıçı kitabda  Xan qızının həyat və yaradıcılığı ilə bağlı oxucu kütləsinə məlum olmayan bir çox maraqlı faktların olduğunu söyləyib. Müəllif  Natəvanın irsinin gənc nəsillərə təbliğini yüksək dəyərləndirib.

Tədbirin sonunda şagirdlərin ifasında Xan qızının yaradıcılığından təqdim olunan nümunələr iştirakçılar tərəfindən maraqla qarşılanıb. Xurşudbanu Natəvanın yubileyinə həsr edilən rəsm müsabiqəsində fərqlənən şagirdlər kitablar və  digər hədiyyələrlə mükafatlandırılıb. 

Sifai SƏFƏROVA