Bu günlərdə İmişli rayon sakini Ellada Bəhlulqızından aldığımız məktubda bildirilir ki, şəhər A.Eminov adına 7 nömrəli tam orta məktəbdə "Əhməd Cavad-120" adlı ədəbi-bədii gecə keçirilib.

Tədbiri giriş sözü ilə açan məktəbin direktoru Ə.İbrahimov müəllimləri, şagirdləri və valideynləri salamlayaraq bildirib ki, 2012-ci ildə unudulmaz Azərbaycan şairi, maarifçi, ictimai xadim, Azərbaycan Dövlət himninin sözlərinin müəllifi olan Əhməd Cavadın anadan olmasının 120 ili tamam olur. Ölməz şairin həyatı və yaradıcılığı ilə bağlı ölkəmizdə, eləcə də bütün türk dünyasında bir-birindən maraqlı tədbirlər həyata keçirilir. Məktəbimizdə  təşkil olunmuş bu tədbir də böyük şairə, onun yaradıcılığına olan hörmət və ehtiramın nümunəsidir.

Sonra məktəbin ədəbiyyat müəllimi  L.İbişova şairin əzablı həyat yolundan, dəhşətli 1937-ci ilin qurbanı olması, əsərlərinin nəşrinə və oxunmasına uzun illər qadağa qoyulması barədə tədbir iştirakçılarına ətraflı məlumat verərək Ə.Cavadın XX əsr Azərbaycan ədəbiyyatının, poeziyasının təkrarolunmaz simalarından biri və onun türk dünyasının, Turan elinin böyük şairi olduğunu diqqətə çatdırıb.

Gecənin sonunda məktəbin şagirdləri ölməz şairin "Nə gördümsə", "Bismillah", "Qalx" və s. şeirlərindən nümunələr söyləyiblər.

ƏDALƏT