Dekabrın 24-də Bakıdakı 276 nömrəli tam orta məktəbdə keçirilən tədbirdə "Tariximiz - dünənimiz, bu günümüz və gələcəyimizdir" adlı "Azərbaycan tarixi fənn aylığı"na yekun vuruldu. Tədbirdə məktəbin müəllim-şagird kollektivi, Bakı Şəhəri üzrə Təhsil İdarəsi Metodik Mərkəzinin nümayəndələri Allahverdi Qədirov, Zabit Yunusov, valideynlər və digər şəxslər iştirak edirdilər.

Tədbiri giriş sözü ilə açan məktəbin direktoru Bəhram Şiriyev iştirakçıları salamlayaraq qeyd etdi ki, təhsil ocağında ənənəvi olaraq müxtəlif fənlərin aylıqları təşkil olunur. Bu da həmin fənlərə olan marağı artırmağa, istedadlı şagirdləri aşkara çıxarmağa və tədrisin keyfiyyətini yüksəltməyə xidmət edir. Bildirildi ki, tarix aylığı ərzində divar qəzetləri, xüsusi bülletenlər buraxılmış, testlər vasitəsilə fənnin tədrisi vəziyyəti yoxlanılmışdır. Tarix müəllimləri Mehriban Vəliyeva, Afət Cəfərova, Sevinc Əliyeva, Sevil Hümbətova, Solmaz Məhərrəmova və Elxan Quliyevin "acıq dərs"ləri keçirilmişdir. Belə tədbirlərin şagirdlərin əqli inkişafına, potensiallarının üzə çıxarılmasına müsbət təsir etdiyi, aylıqda müxtəlif nominasiyalar üzrə müsabiqələrin keçirildiyi qeyd edildi. Rəhbərlik etdiyi məktəbin "Ən yaxşı ümumtəhsil məktəbi" müsabiqəsinin qalibi olduğunu qürur hissi ilə vurğulayan B.Şiriyev dövlət başçısı cənab İlham Əliyevin təhsilə göstərdiyi diqqət və qayğıdan söz açdı.

Digər çıxış edənlər də tədbirin əhəmiyyətindən bəhs etdilər.

Tədbirdə şagirdlərin ifasında şeirlər söyləndi, mahnılar səsləndirildi. Şagirdlər tərəfindən təşkil olunan və tariximizin müəyyən dövrlərini əhatə edən səhnəciklər iştirakçılara xoş ovqat bəxş etdi. 

Niyazi RƏHİMOV