MDB ölkələrindən olan 100-dən artıq təhsil sahəsi üzrə
mütəxəssis 28-29 noyabr tarixlərində Moskvada mövcud
təhsil problemlərinə ümumi baxış keçirmək, bu işdə
"Intel" və tərəfdaş təşkilatların təqdim etdiyi təhsil
həllərinin necə faydalı olacağını müzakirə etmək
məqsədilə bir araya gəliblər. "Intel", PH International
Inc., "Microsoft" və "Polymedia" şirkətlərinin
təşkilatçılığı ilə keçirilən bu tədbir hər il təhsil
mütəxəssisləri və yüksək vəzifəli rəsmi nümayəndələrin
iştirakı ilə baş tutur. "Mədəd-Azərbaycan" təşkilatını
konfransda təşkilatın icraçı direktoru, "Intel"in təhsil
layihələri üzrə məsul şəxs və təşkilatın baş
təlimçilərindən ibarət nümayəndə heyəti təmsil edib.
İnternet vasitəsilə onlayn yayımlanan konfransın
iştirakçıları qabaqcıl təhsil yanaşmaları və
standartları, məktəblərin yenilənməsi və müəllimlərin
yeni rolu, mobil təhsil və sosial media, məlumatın
idarəolunması, bacarıq, əsaslı yanaşma və formativ
qiymətləndirmə, formal və informal təhsil, müəllimlərin
peşəkarlıq səviyyəsinin təkmilləşdirilməsi kimi
mövzular ətrafında müzakirələr aparıblar.
Konfrans zamanı Azərbaycanın İKT-nin təhsildə tətbiqi
modeli nümunə olaraq təqdim olunub və Azərbaycanda
müəllim və şagirdlərin inkişafında ən müasir
texnologiyaların tətbiqi və uğurlu nəticələrin
öyrənilməsinə xüsusi bir sessiya həsr olunub. "Mədəd-Azərbaycan"
təşkilatının icraçı direktoru Vüsal Xanlarov və baş
təlimçisi Bəyaz Novruzova "Azərbaycanda elektron təhsil
mühitinin formalaşması" adlanan sessiya təqdim ediblər.
Konfrans iştirakçıları Azərbaycanda İKT-nin təhsilə
tətbiqi üzrə Dövlət Proqramının əsas komponentləri və
ölkənin XXI əsr təhsil standartlarına uyğunlaşdırılması
sahəsində görülən işlər haqqında məlumat əldə etmişlər.
Konfransın sonunda "Mədəd-Azərbaycan" təşkilatının
"Intel" korporasiyası ilə əməkdaşlıq çərçivəsində uğurla
həyata keçirdiyi təhsil layihələrinə qiymət verilib və
təşkilat xüsusi mükafata layiq görülüb. Növbəti
konfransın 2013-cü ilin sonunda Moskvada keçirilməsi
nəzərdə tutulub.
Sifai SƏFƏROVA |