Azərbaycan  Dövlət Rəssamlıq Akademiyasının sərgi salonunda  bu ali təhsil  ocağının tələbələrinin əsərlərindən ibarət "İşıq" adlı fotosərgi nümayiş olunub. Tədbirdə iştirak edən akademiyanın prorektoru, xalq rəssamı Səlhab Məmmədov, professor Validə Məmmədova yaradıcılıq nümunələri sərgilənən tələbələri təbrik edərək fotosərginin əhəmiyyətindən bəhs ediblər. Qeyd olunub ki, tələbələrin  əsərlərindən ibarət  fotosərginin təşkil edilməsi yaxın vaxtlarda yubileyini qeyd edəcək akademiyanın bütün sahələr üzrə inkişafını təsdiq edir. Əməkdar rəssam, akademiyanın dosenti  Tahir Məmmədovun rəhbərliyi ilə  təşkil edilmiş fotosərgi ADRA-nın fotoqrafiya  sənəti üzrə  fəaliyyətinin yalnız bir hissəsini əks etdirir. Məqsəd istedadlı gənclərin, həvəskar fotoqrafların tanınması ilə bərabər onların bu peşəyə olan maraqlarını artırmaqdır. Fotosərgidə  tələbələrin müxtəlif mövzularda 160-dək yaradıcı işləri nümayiş olunub.

Sifai SƏFƏROVA