Nicat Quliyevlə Yeni il ərəfəsində təhsil aldığı Bakıdakı 141 nömrəli tam orta məktəbdə tanış olduq. Öyrəndik ki, o, 2004-cü ildə Bakı şəhərində dünyaya göz açıb. 2010-cu ildə birinci sinfə gedib. Hazırda da həmin məktəbin 3-cü sinfində oxuyur. Nicat birinci sinifdə oxuduğu vaxtdan da idmanın karate növü ilə məşğul olur. Onun məşqçi-müəllimi qara kəmər ustası İlqar Hüseynovdur. O, artıq üç ildir ki, "Kentavr" İdman Klubunda məşqlər edir.

2011-ci il Nicat üçün daha uğurlu il olub. O, həmin ilin mayında Türkiyənin İstanbul şəhərində BUDO üzrə keçirilən dünya çempionatında uğurla çıxış edərək I yeri tutub və dünya çempionu olub.

Nicat ölkəmizdə idman ili olan 2012-ci ildə Azərbaycanda BUDO döyüş növü üzrə keçirilən yarışda da I yeri tutaraq Azərbaycan Respublikası "Kyokuşinkaykan" (Macushima) Kantakt Karate təşkilatının fəxri fərmanına və mükafatına layiq görülüb.

N.Quliyevin arzusu isə cəmisi 2-3 gündən sonra qarşılayacağımız yeni -2013-cü ildə keçiriləcək yarışlarda uğurla çıxış edərək Avropa çempionu olmaqdır.

Biz də bu balaca çempiona daha böyük uğurlar diləyirik.  

R.ZİYADOV