Javascript DHTML Drop Down Menu Powered by dhtml-menu-builder.com

ARXİV

11 Yanvar 2013 - №01

 

AMİ-də tələbələr arasında keçirilmiş müsabiqənin qaliblərinə diplomlar verildi

 

 Dekabrın 29-da Azərbaycan Müəllimlər İnstitutunda 31 dekabr - Dünya Azərbaycanlılarının Həmrəylik Günü münasibətilə tədbir keçirildi. Tədbirin əvvəlində Dövlət himni səsləndirildi. İnstitutun tədris işləri üzrə prorektoru, dosent Razim Məmmədov giriş sözü ilə çıxış edərək ümummilli lider Heydər Əliyevin dünya azərbaycanlılarının birliyinin zəruriliyini nəzərə alaraq dekabrın 31-ni Dünya Azərbaycanlılarının Həmrəylik Günü kimi elan etməsindən danışdı. Artıq 21 ildir ki, 31 dekabr tarixi Dünya Azərbaycanlılarının Həmrəylik Günü kimi bayram olaraq qeyd edilir. Dosent R.Məmmədov əsas məqsədi azərbaycançılıq ideologiyası, Vətənə bağlılıq duyğularının daha da genişlənməsi və dərinləşməsindən ibarət olan və ulu öndər Heydər Əliyev tərəfindən təsis olunmuş bu əlamətdar gün və yeni, 2013-cü ilin gəlişi münasibətilə institutun rektoru, Milli Məclisin deputatı, professor Aqiyə Naxçıvanlının adından tədbir iştirakçılarını təbrik etdi.

İxtisasartırma və yenidənhazırlanma fakültəsinin dekanı  Telman Haqverdiyev, təhsilin idarə edilməsi kafedrasının müdiri, professor Ramiz Məmmədzadə, ibtidai və məktəbəqədər təhsilin metodikası kafedrasının müdiri, YAP-ın AMİ ilk partiya təşkilatının sədri, professor Mircəfər Həsənov tədbirdə çıxış etdilər. Professor M.Həsənov Yeni Azərbaycan Partiyasının yeni üzvlərinə partiya biletlərini təqdim etdi.

Çıxışlarda  qeyd edildi ki, bu tarixi hadisənin əsası 1989-cu il dekabrın sonunda Naxçıvanda SSRİ-İran sərhədlərinin dağılması ilə qoyulmuşdur. Dünya azərbaycanlılarının birliyini yaratmağın əhəmiyyətini nəzərə alaraq 1991-ci il dekabr ayının 16-da Naxçıvan Muxtar Respublikası Ali Məclisinin sədri Heydər Əliyev 31 dekabr tarixini Dünya Azərbaycanlılarının Həmrəylik Günü elan etmişdir. Həmçinin çıxışlarda bu bayramın dünyanın müxtəlif ölkələrində yaşayan azərbaycanlılarla əlaqələrin yaradılmasında, onların birləşməsində, ümummilli liderimizin daim diqqət yetirdiyi xarici ölkələrdə yaşayan soydaşlarımızın cəmləşdiyi Azərbaycan diasporunun fəaliyyətində əhəmiyyətli rol oynadığı bildirildi. Hər il 31 dekabr bütün dünyada yaşayan soydaşlarımız tərəfindən milli birlik və həmrəylik günü kimi qeyd olunur.

Sonra 31 dekabr - Dünya Azərbaycanlılarının Həmrəylik Günü münasibətilə AMİ-nin tələbələri arasında "Ana yurdum - Azərbaycan" mövzusunda keçirilmiş fotoşəkil müsabiqəsinin qalibləri təltif olundu. Qeyd edək ki, şərtlərə görə müsabiqəyə təqdim olunan fotoşəkillər tarix, ənənə, şəhər, bölgə, təbiət, millilik, müasirlik və s. səpgili olmaqla Azərbaycanı tərənnüm edən və müəllifin özü tərəfindən çəkilmiş orijinal fotoşəkillər təqdim olunmalı idi. Tələbələr tərəfindən müsabiqəyə təqdim olunmuş 50-yə yaxın fotoşəkildən təşkilat komitəsi tərəfindən müsbət rəy almış 30-a qədəri institutda ayrılmış xüsusi yerdə sərgi şəklində nümayiş olundu. Təşkilat komitəsinin ümumi rəyinə əsasən I yerin qalibi  pedaqoji fakültənin III kurs tələbəsi Gulnarə Həsənova, II yerin qalibi filologiya və təhsildə sosial-psixoloji xidmət fakültəsinin III kurs tələbəsi Dürrü Əliyeva və III yerin qalibi isə pedaqoji fakültənin IV kurs tələbəsi Aynurə Hüseynli oldu. Qaliblərə diplom və hədiyyələr təqdim olundu.

Daha sonra Yeni il bayramı münasibətilə AMİ-nin yataqxanasında yaşayan tələbələr arasında keçirilmiş "Ən gözəl bəzədilmiş otaq" müsabiqəsinin qalibləri elan olundu. Belə ki, müsabiqənin şərtlərinə görə yeni, 2013-cü ilin gəlişi münasibətilə institutun yataqxanasında yaşayan tələbələr otaqlarını daha gözəl, tam səliqəli, fərqli şəkildə bəzəməli idi. Dekabrın 24-25-də Təşkilat komitəsinin üzvləri tərəfindən bütün otaqlara baxış keçirildi və qaliblər aşağıdakı kimi müəyyənləşdirildi: I yer - IV kurs tələbəsi Nübar Tağıyeva və Aynurə Məcidli, II yer - I kurs tələbəsi Dürdanə İbrahimli, III yer - I kurs tələbəsi Əli Həsənov və III kurs tələbəsi Ramil Balayev. Müsabiqənin qaliblərinə müvafiq diplom və hədiyyələr təqdim edildi.

Qalib olmuş tələbələr hər iki müsabiqənin keçirilməsinə yaratdığı şəraitə görə institutun rektoruna öz minnətdarlıqlarını bildirdilər, tədbir iştirakçılarını bayram münasibətilə təbrik etdilər.   

Rəşad SADIQOV,
AMİ-nin tərbiyə işləri üzrə prorektoru

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov