|
Bakı Şəhəri üzrə Təhsil İdarəsinin elan etdiyi
"Azərbaycan tarixi fənn aylığı" çərçivəsində 20 dekabr
tarixində Xəzər rayonu 124 nömrəli tam orta məktəbdə
"Azərbaycan-Qarabağ" adlı tədbir keçirildi. Tarix
müəllimi Zülfiyyə Niftaliyevanın IX "b" sinfi ilə
hazırladığı tədbir məktəbin müəllim və şagird
kollektivinin böyük marağına səbəb oldu.
Ssenari, əsasən, Azərbaycan həqiqəti ilə erməni
yalanının dialoqu əsasında hazırlanmışdı. Tariximizin
müxtəlif dövrləri - Ağqoyunlu dövləti, Səfəvilər dövləti
ilə bağlı səhnəciklər, vətənpərvərlik ruhlu şeirlər və
mahnılar dialoqda səslənən fikirləri canlı şəkildə
tamaşaçıya çatdırırdı. Azərbaycanın qədim tarixi
olan Qarabağın keşməkeşli yoluna müxtəlif tarixi
şəkillər, videogörüntülər vasitəsilə nəzər salınaraq
Qarabağda erməni vandalizminin qurbanı olan tarixi
abidələr, kəndlər, şəhərlər göstərildi. "Sülh
istəyiriksə, müharibəyə hazır olmalıyıq" (Azərbaycan
əsgərinin öz nişanlısıyla söhbəti) adlı səhnəcik nümayiş
olundu. Səhnəcik "Qarabağı xilas etməliyik" harayı
ilə coşub-daşan əsgərin monoloqu ilə başa çatdı.
Mirzəcan Mövliyevin (V sinif) "Segah" muğamı,
Aydan Məhərrəmovanın (IX "b") "Sarı gəlin" mahnısı,
Ayda Yusifovanın (IX "b") "Qələbə" və digər ifalar
tamaşaçıların fasiləsiz alqışlarına səbəb oldu.
Tarixin bir üzü var. Qalib olansa gec-tez həqiqət olur!
Azərbaycan həqiqəti ilə erməni yalanının dialoqu
tədbirin sonunda erməni yalanının ifşası, yalan rolunda
çıxış edən şagirdin yıxılması ilə bitdi. Şagirdlər
dünyada erməni yalanının nə qədər tüğyan etməsinə
baxmayaraq, Azərbaycan həqiqətinin bu mübarizədə öz
sözünü deyəcəyinə əmin olduqlarını bildirdilər.
Arizə MAHMUDOVA,
Bakıdakı 124 nömrəli tam orta məktəbin təlim-tərbiyə
işləri üzrə direktor müavini |
