Dekabrın 21-də Bakıdakı 9 nömrəli tam orta məktəbdə
tarix aylığına həsr olunmuş "Azərbaycan bu gün və dünən"
adlı tədbir keçirildi. Əvvəlcə qonaqlar məktəbin
girişində, sinif otaqlarında aylığın keçirilməsi
barədə elanlar, plakatlar, Azərbaycan tarixinə həsr
olunmuş divar qəzetləri, bülletenlər və referatlarla
tanış oldular. "Açıq dərs"lər dinlənildikdən sonra
akt zalında tədbirin bədii hissəsi başladı. Şagirdlərin
təqdimatında Dövlət himni ifa olundu. Hər bir
azərbaycanlı üçün müqəddəs sayılan üçrəngli Dövlət
bayrağımız Üzeyir Hacıbəylinin "Koroğlu" uvertürasının
sədaları altında səhnəyə gətirildi. Tədbiri giriş sözü
ilə təhsil ocağının direktoru Zinyət Əhmədova açaraq
Azərbaycan tarixinin çox qədim, möhkəm köklərə bağlı və
keşməkeşli olduğunu diqqətə çatdırdı. O, tarix aylığı
çərçivəsində məktəbdə görülən işlərdən danışdı,
iştirakçılara fənn aylığının məqsədi və
nominasiyalar barədə məlumat verdi. Gecənin aparıcıları
xalqımızın keçdiyi tarixi inkişaf yolundan söz
açdılar. Şagirdlər Nizami Gəncəvinin, Bəxtiyar
Vahabzadənin, Süleyman Rüstəmin, Hüseyn Cavidin vətənə
həsr etdikləri şeirlər söylədilər. Oğuz ağsaqqalı Dədə
Qorqudun nəsihətlərindən danışdılar. Maraqlı rəqs
nömrələri ilə iştirakçıların diqqətini cəlb etdilər.
Tədbirdə iştirak edən Bakı Şəhəri üzrə Təhsil İdarəsinin
Nəsimi rayonu üzrə məsləhətçisi Yaqut Məmmədova və digər
qonaqlar gecənin yüksək səviyyədə təşkil
olunmasına görə məktəb kollektivinə təşəkkürlərini
bildirdilər. Onlar şagirdlərə həmişə dərslərindən yaxşı
qiymət almağı, tariximizi unutmamağı, Azərbaycan xalqına
layiq vətəndaş olmağı tövsiyə etdilər. Tədbirin sonunda
tariximizi əks etdirən film nümayiş olundu.
Rəşad ZİYADOV |