Yanvarın
11-də Naxçıvan Müəllimlər İnstitutunda dördüncü çağırış
Naxçıvan MR Ali Məclisinin altıncı sessiyasında qarşıya
qoyulan vəzifələr müzakirə edilmişdir.
İclasda çıxış edən institutun rektoru, professor
O.Həsənli qeyd etdi ki, 22 dekabr 2012-ci il tarixdə
dördüncü çağırış Naxçıvan MR Ali Məclisinin altıncı
sessiyası keçirilmişdir. Sessiyada Naxçıvan Muxtar
Respublikası Ali Məclisinin sədri Vasif Talıbov 2012-ci
ildə Naxçıvan Muxtar Respublikasının sosial-iqtisadi
inkişafının yekunları ilə əlaqədar məruzə etmişdir.
Həyatımızın bütün inkişaf sahələri məruzədə əhatəli
təhlil edilmişdir. Sessiyada elm və təhsil sahəsinə də
geniş yer ayrılmışdır. Göstərilmişdir ki, 2012-ci ildə 4
nəfər elmlər doktoru, 19 nəfər fəlsəfə doktoru alimlik
dərəcəsi adını almış, ali təhsil və elm mərkəzlərində 8
beynəlxalq əhəmiyyətli konfrans keçirilmiş, alim və
tədqiqatçılar tərəfindən 70 kitab və monoqrafiya, 97
metodik vəsait, 1000-dən çox elmi məqalə və tezis çap
olunmuşdur. Rektor demişdir:
"Bildirmək istəyirəm ki, yuxarıda göstərilən faktları
analiz etsək, görərik ki, 4 elmlər doktorundan 1 nəfəri,
19 fəlsəfə doktorundan 4 nəfəri bizim institutun payına
düşür. Eyni zamanda 8 beynəlxalq əhəmiyyətli konfransdan
2-si bizim institutun iştirakı ilə keçirilmiş, 70 kitab
və monoqrafiyadan 14-ü, 97 metodik vəsaitdən 16-sı,
1000-dək məqalədən 171-i bizim müəllim-professor heyəti
tərəfindən yazılıb çap olunmuşdur".
Məruzədə
o da qeyd olunmuşdur ki, ötən illərlə müqayisədə çap
olunan kitabların, monoqrafiyaların, metodik vəsaitlərin
və məqalələrin keyfiyyəti də diqqətdə saxlanılmış və
müsbət irəliləyişlər əldə olunmuşdur.
Qeyd olunmuşdur ki, institut tərəfindən yazıçı və
şairlərimizin yubileylərinə həsr olunmuş tədbirlərin
keçirilməsi də diqqət mərkəzində saxlanılır. Ötən il həm
Azərbaycan ali təhsil müəssisələri, həm də qardaş
Türkiyənin "Qafqaz" Universiteti və Kuzey Kıprıs Türk
Cümhuriyyətindəki Doğu Ağdəniz Universiteti ilə dostluq
və qarşılıqlı təcrübə mübadiləsi məqsədi ilə yaradılan
əlaqələr və bağlanan müqavilələr qarşıya qoyulan
tələblərin həyata keçirilməsi yolunda atılan addım kimi
dəyərləndirilməlidir. İstər tədrisin keyfiyyəti, istərsə
də kadr hazırlığının müxtəlif sahələrində institutun
uğurları getdikcə artır.
Dördüncü çağırış Naxçıvan Muxtar Respublikası Ali
Məclisinin altıncı sessiyasının qəbul etdiyi qərarların
həyata keçirilməsi ilə əlaqədar institutun tədris işləri
üzrə prorektoru, professor A.İmanlı, tərbiyə işləri üzrə
prorektoru, professor S.Həsənova, riyaziyyatın tədrisi
metodikası kafedrasının müdiri, pedaqogika üzrə fəlsəfə
doktoru R.Vəliyev, xarici əlaqələr şöbəsinin müdiri,
filologiya üzrə fəlsəfə doktoru H.Eyvazlı çıxış
etmişlər.
İnstitutun rektoru, professor O.Həsənli eimi şuranın
iclasına yekun vuraraq dördüncü çağırış Naxçıvan Muxtar
Respublikası Ali Məclisinin altıncı sessiyasında qəbul
olunan qərarların həyata keçirilməsinə səylə
çalışacaqlarını vurğuladı.
Naxçıvan Müəllimlər İnstitutunun Mətbuat xidməti |