Javascript DHTML Drop Down Menu Powered by dhtml-menu-builder.com

ARXİV

1 Fevral 2013 - №04

 

Naxçıvan Dövlət Universiteti üçün elektron təhsil şəbəkəsi və
rəqəmsal multimedia infrastrukturunun yaradılmasına dair Qrant Sazişi imzalandı

 

Yanvarın 29-da  Azərbaycan Respublikası  Təhsil Nazirliyi ilə Koreya Respublikasının  Xarici İşlər və Ticarət Nazirliyi arasında  Naxçıvan Dövlət Universiteti  üçün  elektron təhsil  şəbəkəsi və rəqəmsal multimedia infrastrukturunun yaradılmasına dair Qrant Sazişinin imzalanması mərasimi keçirildi. Təhsil Nazirliyində keçirilən tədbirdə Azərbaycan Respublikasının təhsil naziri Misir Mərdanov, Koreya Respublikasının ölkəmizdəki fövqəladə  və səlahiyyətli səfiri  Çoi Suk-in, nazirliyin Aparat rəhbəri, şöbə müdirləri, Koreya Beynəlxalq Əməkdaşlıq  Agentliyinin (KOİCA) nümayəndələri və digər qonaqlar iştirak edirdilər.

Məlum olduğu kimi, müasir təhsil  texnologiyalarının  genişmiqyaslı tətbiqi, ilk növbədə, təhsil müəssisələrinin kompüter avadanlıqları  ilə təminatının köklü şəkildə yaxşılaşdırılmasını nəzərdə tutur. İnformasiya-kommunikasiya texnologiyalarının tətbiqi üzrə  elmi-metodik bazanın təkmilləşdirilməsi, ümummilli səviyyədə vahid elektron təhsil məkanının təşəkkül  tapması  günün əsas tələbi olaraq qalır. Son dövrlərdə təhsil sistemində İKT infrastrukturunun inkişaf etdirilməsi və təhsildə İKT-nin tətbiqinin  dünya standartları  səviyyəsinə  çatdırılması ölkəmizdə prioritet istiqamətlərdən birinə çevrilmişdir.

Azərbaycan sürətli iqtisadi artım,  zəngin təbii ehtiyatlar və bazar sərmayəsi vasitəsilə qlobal iqisadiyyatda təmsil olunur. Neft sahəsinə əsaslanan iqtisadi inkişafdan əlavə, Azərbaycanda qeyri-neft sektoru, həmçinin İKT də daxil olmaqla  digər sosial kapitalın da inkişafına xüsusi önəm verilir.

Buna görə də Azərbaycan hökuməti İKT  sahəsinin inkişaf etdirilməsi məqsədilə  Azərbaycan Respublikasının inkişafı naminə informasiya və kommunikasiya  texnologiyaları üzrə uzunmüddətli Milli Strategiya həyata keçirməkdədir. Bu çərçivədə Koreya Beynəlxalq Əməkdaşlıq Agentliyi ( KOİCA) Azərbaycanda ali təhsil müəssisələrində elektron təhsil sisteminin yaradılması və potensialın gücləndirilməsinə dəstək verir.  

Təhsil naziri Misir Mərdanov  mərasimi açaraq iştirakçıları  salamladı və Azərbaycana dost olan bir ölkənin səfirinin xoş məramla Təhsil Nazirliyinə gəlməsini yüksək dəyərləndirdiyini vurğuladı.

Nazir qeyd etdi ki, Koreya Azərbaycanda başqa sahələrlə yanaşı, təhsillə  bağlı da bir sıra əhəmiyyətli layihələr həyata keçirib və keçirməkdədir. Bunlara misal olaraq Bakı Dövlət Universitetində  və Azərbaycan Texniki Universitetində reallaşdırılan layihələri, Bakı şəhərində  ali peşə təhsili mərkəzinin  yaradılması  ilə bağlı  həyata keçirilən layihəni göstərmək olar. Naxçıvan Dövlət Universiteti  üçün elektron təhsil  şəbəkəsi  və rəqəmsal  multimedia  infrastrukturunun yaradılmasının da  belə mühüm  işlərdən biri olduğunu deyən nazir  həm Koreya, həm də Azərbaycan tərəfdən bu layihənin hazırlanmasında əməyi  olan hər kəsə  təşəkkürünü bildirdi.

Azərbaycan  Respublikasının Prezidenti cənab İlham Əliyevin sərəncamına əsasən, 2013-cü ilin  "İnformasiya-kommunikasiya   texnologiyaları ili" elan olunduğunu, məhz  bu səbəbdən  Naxçıvan Dövlət Universitetində  reallaşdırılacaq  layihənin bu günümüzlə  səsləşən bir layihə  olduğunu vurğulayan  Misir Mərdanov qeyd etdi ki, ümumiyyətlə, dövlət başçısının  siyasətində  İKT  prioritet sahə hesab olunur. Son illər Azərbaycanda təhsil sahəsində İKT-nin  tətbiqi ilə bağlı çox mühüm nailiyyətlər əldə olunub. Təhsil müəssisələrinin kompüterlərlə təchiz olunması, müəllimlərin İKT bacarıqlarının artırılması, təhsil sisteminin idarə edilməsi  və digər sahələrdə  İKT vasitələrindən geniş  istifadə olunmasında böyük uğurlar qazanılıb.

Təhsil naziri cənab səfirin və digər koreyalı qonaqların diqqətinə çatdırdı ki, Naxçıvan Muxtar  Respublikası  Azərbaycanın blokadada  olan bir bölgəsidir, bu regionla yalnız hava yolu ilə  əlaqə saxlamaq mümkündür. Ancaq bütün bunlara baxmayaraq, ölkə başçısının və yerli rəhbərliyin ciddi səyləri nəticəsində bu gün Naxçıvan ölkənin inkişaf etmiş bölgələrindən birinə çevrilmişdir.

"Naxçıvan Dövlət Universiteti  üçün elektron təhsil  şəbəkəsi  və rəqəmsal  multimedia  infrastrukturunun yaradılması" layihəsinin  reallaşdırılması nəticəsində bu təhsil ocağında elektron ali məktəbin yaradılması  sahəsində çox böyük nailiyyətlərin əldə olunacağına ümid etdiyini deyən Misir Mərdanov çıxışının sonunda layihənin uğurla həyata keçiriləcəyinə inamını ifadə etdi. Nazir həmçinin cənab Çoi  Suk-inə Azərbaycandakı  gələcək diplomatik fəaliyyətində uğurlar arzuladı.

Koreya Respublikasının ölkəmizdəki fövqəladə və səlahiyyətli səfiri Çoi Suk-in  çıxışında qeyd etdi ki, Azərbaycanla Koreya arasında bir çox sahələrdə layihələr həyata keçirilir. Sevindirici haldır ki, onlardan ən vacibi olan  təhsil sahəsində  daha çox əməkdaşlıq əlaqələri mövcuddur.

Koreyanın İKT ölkəsi kimi bu sahədə çox rəqabətəqabil bir ölkə olduğunu deyən  diplomat Azərbaycan Respublikasının Prezidenti cənab İlham Əliyevin 2013-cü ili "İnformasiya-kommunikasiya texnologiyaları ili" elan etməsini təqdirəlayiq fakt kimi dəyərləndirdi.

Səfir Azərbaycanda fəaliyyət göstərdiyi müddətdə ölkələrimiz arasında təhsil sahəsində əməkdaşlıq əlaqələrinin daha da inkişaf etdirilməsinə çalışacağını bildirərək  gələcəkdə bu sahədə  böyük uğurların qazanılmasını arzuladı.

Sonra çıxış üçün söz Naxçıvan Dövlət Universitetinin rektoru, akademik İsa Həbibbəyliyə verildi. Rektor məlumat verdi ki, Naxçıvan Dövlət Universitetinin dünyanın dörd qitəsindən səksəndən çox ali təhsil müəssisəsi ilə əməkdaşlıq əlaqələri mövcuddur ki,  onların da arasında Cənubi Koreya xüsusi yer tutur. NDU bu ölkə ilə bir neçə istiqamətdə əməkdaşlıq edir.  Universitetdə 10 ölkədən 324 tələbə təhsil alır. Bu tələbələrdən yeddisi koreyalıdır.

NDU-da Koreya dili hazırlıq mərkəzinin fəaliyyət göstərdiyini deyən İsa Həbibbəyli bildirdi  ki,  magistr olan Koreya vətəndaşı bu mərkəzdə azərbaycanlı tələbələrə Koreya dilini öyrədir. Hazırda belə tələbələrin sayı 30-dan artıqdır. İl ərzində  Koreya dilini ən yaxşı öyrənən gənclərin Cənubi Koreyaya yay məktəbinə göndərilməsi nəzərdə tutulub. Koreya dili hazırlıq mərkəzi  Koreya ilə tələbə mübadiləsi sahəsində də xüsusi rol oynayır. Çünki  Koreyaya göndərilən tələbələrin ingilis dili ilə yanaşı, Koreya dilini bilməsi də böyük əhəmiyyət kəsb edir. Beynəlxalq münasibətlər fakültəsində Koreya ilə bağlı seçmə fənn tədris olunur. Bütün bunlardan əlavə, Naxçıvan Dövlət Universiteti ilə  Koreyanın 3  universiteti arasında ikitərəfli əməkdaşlıq müqavilələri imzalanmışdır.

Daha sonra sözügedən  layihə haqqında danışan rektor tədbir iştirakçılarının diqqətinə çatdırdı ki, universitetdə bununla bağlı 2010-cu ildən  bir sıra mühüm işlər görülməyə başlanmış, ciddi tədbirlər həyata  keçirilmişdir. 27 mart- 2 aprel və  3-7 dekabr 2012-ci il tarixlərində  Cənubi Koreyanın Koreya Beynəlxalq Əməkdaşlıq Agentliyinin rəhbəri və ekspertləri 2 dəfə Naxçıvan Dövlət Universitetində olmuşlar. Burada layihəyə qoşulmaq üçün maddi-texniki təminat və müvafiq kadr potensialı imkanı araşdırılmış, əməkdaşlığın davam etdirilməsinə qərar verilmişdir.

Daha sonra NDU-nun  rektoru İsa Həbibbəyli layihə çərçivəsində ayrı-ayrı  istiqamətlər üzrə həyata keçiriləcək  tədbirlərdən söz açdı.

Sonra Azərbaycan Respublikası Təhsil Nazirliyi ilə Koreya Respublikasının Xarici İşlər və Ticarət Nazirliyi arasında Naxçıvan Dövlət Universiteti üçün elektron təhsil şəbəkəsi və rəqəmsal multimedia infrastrukturunun yaradılmasına dair  Qrant Sazişi imzalandı. Sazişi Azərbaycan Respublikasının təhsil naziri Misir Mərdanov və Koreya Respublikasının Azərbaycandakı fövqəladə və səlahiyyətli səfiri Çoi Suk-in imzaladılar.

Qeyd edək ki, bu layihənin  həyata keçirilməsində əsas məqsəd tələbələrə onlayn  təhsil xidmətinin göstərilməsi üçün portal, distant təhsil, akademik işlər,  elektron kitabxana və sairənin daxil olduğu elektron  təhsil şəbəkəsinin yaradılması və yüksək keyfiyyətli  təhsil mühiti üçün müasir informasiya-kommunikasiya  texnologiyaları avadanlıqlarının yaradılması ilə rəqəmsal multimedia infrastrukturunun təkmilləşdirilməsidir.

"Naxçıvan Dövlət Universiteti üçün elektron təhsil şəbəkəsi və rəqəmsal multimedia infrastrukturunun yaradılması" layihəsi milli təhsil siyasətinə uyğun olaraq hazırlanmış  və ehtiyacın qiymətləndirilməsi  təhlilinə əsaslanır.  Verilən məlumata görə, layihənin büdcəsi 3.5 milyon ABŞ dolları təşkil edir və layihəyə qoşulmaq üçün aidiyyəti  qurumların rəyləri  alınmışdır. Koreya tərəfindən KOİCA və Azərbaycan tərəfindən NDU-nun həyata keçirəcəyi layihə başlanmasından etibarən 36 ay müddətində davam edəcəkdir və qarşılıqlı razılaşma əsasında dəyişdirilə bilər.

Mərasimdə  Koreya Beynəlxalq  Əməkdaşlıq  Agentliyinin  (KOİCA) Azərbaycan  ofisinin rezident nümayəndəsi Kim Eun Suk da iştirak edirdi. 

Hicran ƏKBƏROVA

 
 
 
Səhifənin başına qalx "Təhsil nazirliyində" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov