Yanvarın
29-da Azərbaycan Dillər Universitetinin rektoru, Milli
Məclisin deputatı, professor Səməd Seyidov Türkiyənin
Azərbaycandakı fövqəladə və səlahiyyətli səfiri Alper
Coşkunu qəbul etdi. Qonağı salamlayan rektor Səməd
Seyidov onu universitetdə görməkdən məmnun olduğunu
bildirdi. Rektor Türkiyə ilə Azərbaycan arasında
əlaqələrin dostluq və qardaşlıq münasibətləri
müstəvisində inkişaf etdiyini vurğuladı. Ümummilli lider
Heydər Əliyevin "Bir millət, iki dövlət" müdrik kəlamını
xatırladan rektor Səməd Seyidov keçən il ADU-da
keçirilən konfransı xatırladaraq universitetin TİKA ilə
əməkdaşlığa əhəmiyyət verdiyini bildirdi. Səməd Seyidov
Azərbaycanda bu ilin informasiya-kommunikasiya
texnologiyaları ili elan olunduğunu xatırlatdı və bu
baxımdan elektron universitetin yaradılmasının aktuallıq
kəsb etdiyini dedi. Təhsil sistemində İKT-nin inkişafını
vacib sayan rektor Səməd Seyidov ADU-da bu məsələyə
böyük diqqət olduğunu vurğuladı və İnternet
layihələrinin həyata keçirilməsini böyük bir addım
adlandırdı.
Səfir Alper Coşkun ADU-da olmaqdan məmnunluğunu dilə
gətirdi. O, Türkiyə səfirliyi olaraq ADU ilə əməkdaşlığa
maraq göstərdiklərini bildirdi. Səfir Türkiyə-Azərbaycan
dostluğunun iki ölkə arasında mühüm əhəmiyyət kəsb
etdiyini dedi.
Görüşdə Azərbaycan-Türkiyə münasibətləri,
universitetlərarası gələcək əməkdaşlıq perspektivləri,
birgə konfransların təşkili haqqında fikir mübadiləsi
aparıldı.
ADU-nun Mətbuat xidməti |