|
 Yanvarın
31-də Naxçıvan MR Təhsil Nazirliyi və Naxçıvan
Müəllimlər İnstitutu Şərur Rayon Təhsil Şöbəsi ilə
birlikdə rayonun Tumaslı kənd tam orta məktəbində
"Kurikulumun öyrənilməsi, tətbiqi və məktəbdə psixoloji
xidmətin aktual problemləri" mövzusunda elmi-praktik
konfrans keçirmişlər.
Konfransı giriş sözü ilə açan Şərur Rayon Təhsil
Şöbəsinin müdiri Yaqub Tağıyev bildirmişdir ki, son dörd
il rayonumuzun ümumtəhsil məktəblərində kurikulumun
tətbiqi ilə bağlı bir çox mühüm hadisələrlə zəngin
olmuşdur. Kurikulumlarla dərslərin tədrisi sahəsində
hazırda özünü göstərən irəliləyişlər həm müəllimlərin,
məktəb rəhbərlərinin, həm də şöbəmizin və Təhsil
Nazirliyi işçilərinin birgə əməyinin nəticəsidir. Onu da
qeyd etmək istəyirəm ki, təhsil islahatlarının
tələblərinə cavab verən yeni baxışlı müəllimlərin
hazırlanmasında Naxçıvan Müəllimlər İnstitutunun da
böyük rolu vardır. Məktəb psixoloqlarının kurslara cəlb
edilməsi, onlarla aparılan işlər mahiyyət etibarı ilə
yenidir. Onlar kurslarda öyrəndiklərindən, əldə
etdikləri vəsaitləri işlərində istifadə edirlər.
Ümumiyyətlə, tədbirlərin keçirilməsi, qarşılıqlı fikir
mübadilələri, yerlərdə keçirilən görüşlər məktəb işinin
düzgün qurulmasına, dövlətimizin təhsillə bağlı qarşıya
qoyduğu tələblərin həyata keçirilməsinə xidmət edir.
"Məktəbdə psixoloji xidmətin aktual problemləri"
mövzusunda çıxış edən Naxçıvan Müəllimlər İnstitutunun
rektoru, professor Oruc Həsənli qeyd etdi ki, ümumtəhsil
məktəblərinin vəzifəsi və məqsədi təhsil alanların
ayrı-ayrı fənlər üzrə bilik və bacarıqlarının
formalaşmasını, idrak fəallığının və məntiqi
təfəkkürünün inkişafını təmin etməkdən və onları
psixoloji baxımdan gələcəyin əsl vətəndaşı kimi
hazırlamaqdan ibarətdir. Bu gün yetişməkdə olan nəslin
inkişafını, tərbiyəsini düzgün təşkil etmək, sürətlə
artan elmi-texniki yeniliklərin əsaslarını onlara
mənimsətmək üçün uşaqların dərketmə imkanlarını, idrak
proseslərinin inkişaf qanunauyğunluqlarını və bu
prosesin necə aşılanması və tərbiyə edilməsini bilmək
zəruridir.
 Təhsil
islahatının həyata keçirilməsində məktəb psixoloqlarının
da üzərinə böyük və məsuliyyətli vəzifə düşür. Əsl
vətəndaş yetirmək, cəmiyyətimizin gələcək qurucularını
düzgün formalaşdırmaq üçün Naxçıvan Müəllimlər
İnstitutunun əməkdaşları olaraq məktəblərimizə,
müəllimlərimizə, eləcə də məktəb psixoloqlarına
hərtərəfli kömək göstərməyə daim hazırıq.
Naxçıvan MR Təhsil Nazirliyinin sektor müdiri Rəşad
Əlizadə çıxışında kurikulum və məktəbdə psixoloji
xidmət işinin təşkili ilə bağlı görülən işlərdən,
qarşıda duran vəzifələrdən danışdı.
Sonra elmi-praktik konfrans öz işini iki bölmədə davam
etdirdi.
Naxçıvan Müəllimlər İnstitutunun xarici əlaqələr
şöbəsinin müdiri, filologiya üzrə fəlsəfə doktoru
Həsənəli Eyvazlı, institutun metodisti Məsim
Tarverdiyev, Kurikulum Mərkəzinin müdiri Rafiq Hüseynov
və Şərur Rayon Təhsil Şöbəsinin metodisti Çinarə
Məmmədova bölmələrdə çıxış edərək problemlərin həlli
yollarından danışmışlar. Sonda elmi-praktik konfrans
iştirakçılarına kurikulumun öyrənilməsi, tətbiqi və
məktəbdə psixoloji xidmətin təşkili ilə bağlı yazılı
materiallar və elektron SD-lər verilmişdir.
Naxçıvan Müəllimlər İnstitutunun Mətbuat xidməti
|
