|
 Fevralın
8-də Bakıdakı Heydər Əliyev adına liseydə
yazıçı-dramaturq, "Ulduz" jurnalının baş redaktoru Elçin
Hüseynbəyli ilə görüş keçirilib. Tədbirdə təhsil
ocağının 5-ci sinif şagirdləri ilə birgə liseyin
direktoru Fikrət Xəlilov, müəllimlər və digər şəxslər
iştirak edib. Tədbirdə yazıçının V sinif "Ədəbiyyat"
dərsliyində yer almış "Firuzə qaşlı xəncər" hekayəsi
əsas müzakirə mövzusu olub. Qeyd edək ki, hekayə Xocalı
qətliamından bəhs edir. Əsərdə Zeynəb adlı bir gəlinin
körpə balasını erməni qəsbkarlarından qoruması, qarlı
meşələrdən keçərək öz yaxınlarına qovuşması təsvir
olunur.
Tədbirdə çıxış edən yazıçı-dramaturq Elçin Hüseynbəyli
əsərin mahiyyətindən söz açıb. Bildirib ki, Qarabağ
onun ən həssas və ağrılı yeridir, ona görə də bu mövzuya
tez-tez müraciət edir. Xocalı soyqırımı haqqında söhbət
açan E.Hüseynbəyli bu faciənin ötən əsrin ən qanlı
faciələrindən biri olduğunu iştirakçıların nəzərinə
çatdırıb.
Tədbirdə liseyin direktoru, əməkdar müəllim Fikrət
Xəlilov çıxış edərək "Firuzə qaşlı xəncər" hekayəsinə öz
münasibətini bildirib. Hekayənin dərin məzmuna malik
olduğunu diqqətə çatdıran F.Xəlilov belə görüşlərin
şagirdlərin həyatına müsbət təsir etdiyini və onların
gələcəkdə vətənpərvər şəxsiyyət kimi böyümələrinə stimul
verdiyini qeyd edib.
 Tədbirdə
liseyin direktor müavini İradə Əsgərova, dil-ədəbiyyat
müəllimi Gülarə Həmidova, Xocalı qaçqını, dil-ədəbiyyat
müəllimi Zülfüqar Qəribov çıxış edərək sözügedən
hekayədən və yazıçının yaradıcılığından söhbət açıblar.
Onlar əsərin rəvan təhkiyə üstündə qurulduğunu, zəngin
ədəbi dilə malik olduğunu və Xocalı faciəsini tam
gerçəkliyilə əks etdirdiyini deyiblər.
Sonra yazıçı-dramaturq E.Hüseynbəyli ilə şagirdlər
arasında gedən dialoqda yazıçının həyat və yaradıcılığı,
uşaqlıq illəri hərtərəfli işıqlandırılıb. E.Hüseynbəyli
şagirdləri maraqlandıran sualları cavablandırıb.
Sonda yazıçı şagirdlərlə xatirə şəkli çəkdirib.
Niyazi RƏHİMOV |
