Javascript DHTML Drop Down Menu Powered by dhtml-menu-builder.com

ARXİV

22 Fevral 2013 - №7

 

"Azərbaycanda rus dili və ədəbiyyatı" jurnalının son saylarının təqdimatı oldu

 

Bakı Slavyan Universitetinin Məktəb-Lisey Kompleksində təşkil olunmuş Rus dili həftəsi maraqlı və rəngarəng tədbirlərlə yadda qaldı: Vısotskinin xatirəsinə həsr edilmiş ədəbi-musiqi gecə, təmsil gecəsi, "Ən yaxşı şeir ifaçısı" və inşa  müsabiqələri və s.

Kompleksin rus dili və ədəbiyyat kafedrasında 1 və 5-ci siniflər üçün  dərsliklərin müzakirəsi  zamanı dərsliklərin orijinal xüsusiyyətləri və çatışmazlıqlar göstərilməklə yanaşı, rus bölməsi üçün mövcud "Rus dili" və "Ədəbiyyat" və Azərbaycan bölməsi üçün "Rus dili" dərsliklərinə alternativ dərsliklərin yaradılmasının vacibliyi vurğulandı.

Bu məsələ "Azərbaycanda rus dili və ədəbiyyatı" jurnalının son saylarının Məktəb-Lisey Kompleksinin oxu zalında baş tutan müzakirəsi zamanı bir daha vurğulandı. Milli Kurikulumun tələbləri əsasında yazılmış və məktəblilərin istifadəsinə verilmiş yeni "Rus dili" və "Ədəbiyyat" dərsliklərinin jurnal səhifələrində geniş müzakirəsinə ehtiyac olduğu qabardırıldı.

Artıq 2003-cü ildən etibarən rektor, AMEA-nın müxbir üzvü, professor K.M.Abdullayevin təşəbbüsü ilə Bakı Slavyan Universiteti tərəfindən yeni formatda və məzmunda nəşr olunan və 2010-cu ildən tam rəngli və fərqli poliqrafik icrada oxuculara təqdim edilən "Azərbaycanda rus dili və ədəbiyyatı" jurnalı elmi-metodiki əhəmiyyətini saxlamaqla, həm də mədəni-ictimai nəşr kimi böyük maraq doğurur. Jurnal ölkəmizdə rus dilinin istifadəsi və işlənməsi dairəsini, rus ədəbiyyatı və mədəniyyətinin xalqımızın ictimai-mədəni həyatı və şüurunda yerini, xalqlarımız arasında tarixi və müasir əlaqələri və s. məsələləri əhatə edir və gündəmdə saxlayır. Təsadüfi deyil ki, yüksək elmi səviyyəyə malik bu dövri nəşr Azərbaycan və Rusiyanın elm və təhsil mərkəzlərinə, dövlət orqanlarına, elm və mədəniyyət xadimlərinə, slavyan ölkələrinin universitetlərinə göndərilir.      

Jurnalın 2012-ci il nömrələrinin prezentasiyasına dəvət olunan Bakı şəhəri məktəblərinin rus dili və ədəbiyyatı müəllimləri, Bakı Şəhəri üzrə Təhsil İdarəsi Metodiki mərkəzinin əməkdaşları, Rusiya Mədəniyyət-İnformasiya Mərkəzinin nümayəndələri, universitetin uyğun kafedralarının müəllimləri, təcrübə rəhbərləri son üç nömrənin geniş müzakirəsi zamanı ayrı-ayrı məqalə və materiallarla, jurnal müəllifləri ilə yaxından tanış olmaq imkanı əldə etdilər. Kompleksin rus dili və ədəbiyyatı müəllimləri Rəna Babayeva, Gülarə Hacıyeva, Reyhan Hüseynova, Adilə Güləhmədova, ibtidai sinif müəllimləri Danya Altunbəyova, Diana Karatayeva ayrı-ayrı saylarda getmiş maraqlı məqalə və materialları təhlil etməklə yanaşı, təkliflər də irəli sürdülər. Pedaqoji kollektiv adından jurnalın baş redaktoru, professor Flora Naciyevaya və nəşrin icraçı direktoru, dosent Güney Məhərrəmovaya minnətdarlıq edən BSU Məktəb-Lisey Kompleksinin direktoru, professor Telman Cəfərov jurnal səhifələrində kurikulum tələbləri əsasında tərtib olunmuş dərs icmallarına, yeni təlim texnologiyaları və interaktiv dərs modellərinin tətbiqi ilə bağlı metodiki məqalələrə geniş yer verməyi xahiş etdi.

Qeyd edək ki, dövri elmi-metodiki nəşrlərin kompleksdə təqdimatı artıq ənənə halına düşməkdədir. Yanvar ayının pedaqoji şura iclasında "Kurikulum" jurnalının son (2012-ci il, № 4) sayının materialları geniş müzakirə olunmuşdu. 

İlahə CARÇIYEVA,
BSU Məktəb-Lisey Kompleksi rus dili və ədəbiyyatı kafedrasının müdiri,
dosent, "Ən yaxşı müəllim" müsabiqəsinin qalibi

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov