Javascript DHTML Drop Down Menu Powered by dhtml-menu-builder.com

ARXİV

1 mart 2013 - №8

 

Uşaqların məktəbə müsabiqə yolu ilə qəbulu probleminin tədqiqinin nəticələri müzakirə olunub

 

Fevralın 23-də Təhsil Nazirliyində  "Uşaqların məktəbə müsabiqə yolu ilə (testlərlə) qəbulu  probleminin tədqiqi" mövzusunda Təhsil Problemləri İnstitutunda  aparılmış araşdırmaların nəticələrinin müzakirəsinə həsr olunmuş növbəti seminar keçirilib. Seminarda təhsil naziri Misir Mərdanov, Təhsil Nazirliyinin struktur bölmə rəhbərləri, Təhsil Problemləri İnstitutunun rəhbər işçiləri və əməkdaşları, bir sıra ümumi təhsil müəssisələrinin direktorları iştirak ediblər. Təhsil Problemləri İnstitutu Sosioloji tədqiqatlar şöbəsinin müdiri, biologiya üzrə fəlsəfə doktoru Bibixanım Ağayeva mövzu üzrə aparılmış araşdırmaların nəticələrinə dair geniş məruzə-təqdimat edib.

Təqdimatında öncə müzakirə olunan mövzunun Təhsil Nazirliyinin sifarişi əsasında  tədqiq edildiyini deyən B.Ağayeva işin yerinə yetirilməsi məqsədilə işçi qrupu yaradıldığını, onun məktəblərdə bu sahədə mövcud vəziyyəti araşdırdığını bildirib. Sonra məruzəçi araşdırmanın nəticələrini və mövcud problemin həllinə istiqamətlənmiş təklifləri diqqətə çatdırıb.

Təhsil naziri Misir Mərdanov seminarda çıxış edərək müzakirə olunan məsələ ilə bağlı fikirlərini bildirib. Nazir qeyd edib ki, ərazi üzrə bütün məktəb, lisey və gimnaziyaların siyahısı tutulmalı, cəmiyyət hansı məktəbin nə kimi səlahiyyəti olduğunu bilməlidir. Əgər uşaq məktəbə və ya liseyə qəbul olunmayıbsa, valideyn onun hansı səbəbdən qəbul olunmadığını bilməlidir. Bu işdə məktəb direktorlarının bir çoxunun neqativ hallara yol verdiklərini deyən nazir bu məsələnin onu narahat etdiyini, qəbul zamanı birinci növbədə təhsil alanın taleyinin nəzərə alınmalı olduğunu, məktəb direktorlarının ərazidə yaşayan uşaqları məktəbə qəbul etməməyə haqqı çatmadığını diqqətə çatdırıb.

Seminarda Təhsil Nazirliyinin şöbə müdirləri Bayram Hüseynzadə, Ağababa İbrahimov, TPİ-nin direktor müavinləri, professor Yəhya Kərimov, Kurikulum Mərkəzinin direktoru Ənvər Abbasov, Bakı Avropa Liseyinin direktoru Zülfiyyə Veysova söz alaraq mövzu ilə bağlı bəzi məsələlərə toxunub, təkliflər səsləndiriblər. Çıxışlarda liseylərə qəbul zamanı xüsusilə narahatlıq doğuran hallara yol verildiyi, bu zaman ən məsuliyyətli işin məktəb psixoloqunun üzərinə düşdüyü, müəllimlə ünsiyyət vacib amil olduğundan testlərin nəticələri ilə yanaşı müəllimin də rəyini nəzərə almağın zəruriliyi qeyd olunub. 

Yusif ƏLİYEV

 
 
 
Səhifənin başına qalx "Təhsil nazirliyində" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov