Fevralın
20-də Bakıdakı 204 nömrəli tam orta məktəbdə 21 fevral
- Beynəlxalq Ana Dili Gününə həsr olunmuş "Mənim ana
dilim, mənim varlığım" mövzusunda ədəbi-musiqili tədbir
keçirildi.
Məktəbin təlim-tərbiyə işləri üzrə direktor müavini
Əntiqə Qasımovanın təşkilatçılığı ilə müxtəlif
siniflərdə oxuyan istedadlı və fəal şagirdlərin
hazırladıqları tədbirdə müəllim və şagird kollektivi ilə
yanaşı, qonaqlar - Təhsil Problemləri İnstitutu
Kurikulum Mərkəzinin Humanitar fənlər bölməsinin müdiri
Ramiz Hüseynov, həmin bölmənin elmi işçisi Günay
Mirzəzadə, metodist Lətafət Məmmədova, 264 nömrəli
məktəb-liseyin direktoru Sevda Qocayeva da iştirak
edirdilər.
Aparıcılar - IX "c" sinif şagirdi Ayşən İmanova və X "b"
sinif şagirdi Eyyub Cabbarlı Azərbaycana həsr olunmuş
şeirlə tədbiri açıb qonaqları salamladılar. Məktəbin
laborantı Səmra Quliyeva və VIII "a" sinif şagirdi
Rəşad Cəlilov "Azərbaycan" mahnılarını ifa etdilər.
Beynəlxalq Ana Dili Gününün tarixi barədə danışan
aparıcılar onun YUNESKO-nun Baş konfransının 1999-cu
ilin noyabrında keçirilmiş 30-cu sessiyasında təsis
olunduğunu bildirdilər. Sonra meydan yenidən şeirə,
mahnıya verildi. VI "b" sinif şagirdləri Günel Qasımova
"Ana dilim", Aysu Hacızadə "Dilimə dəymə", IX "a" sinif
şagirdi Səmayə Ramazanova "Mənim dilim" şeirlərini
söylədilər, V "a" sinif şagirdi Ayşə Məmmədova sazda
"Yanıq Kərəm"i ifa etdi.
Dil haqqında məlumatlarını davam etdirən aparıcılar
dilimizin tarixindən, türk dilləri arasındakı
mövqeyindən, inkişafına göstərilən diqqət və qayğıdan
söz açdılar. Bildirdilər ki, dilimizin inkişafı,
qorunması, dövlət dili kimi təsbit olunması və
fəaliyyət dairəsinin genişlənməsində ulu öndər Heydər
Əliyevin müstəsna xidmətləri olmuşdur. Azərbaycan
Prezidenti İlham Əliyevin dilimizin inkişafı ilə
bağlı imzaladığı sərəncamlar diqqətə çatdırıldı.
Sonra Bəxtiyar Vahabzadənin "Gülüstan" poemasından bir
parça təqdim olundu, Səməd Vurğunun "Vaqif" dramından
səhnə nümayiş etdirildi. İbtidai sinif şagirdləri
dilə, sözə aid atalar sözləri dedilər.
Şagirdlərin təqdim etdikləri proqram başa çatdıqdan
sonra söz alan məktəbin direktoru Ziba Rzayeva onların
dilimizə sevgi dolu çıxışlarını yüksək qiymətləndirdi.
Dilimizin zəngin imkanlara malik olduğunu deyən
Z.Rzayeva onun inkişafına göstərilən dövlət qayğısından
danışdı, dilimizi qorumağın hər kəsin şərəf işi olduğunu
söylədi. Direktor tədbiri yüksək səviyyədə hazırlayıb
təqdim etdiklərinə görə müəllim və şagirdlərə təşəkkür
etdi. Qonaqlar da çıxış edib ədəbi-bədii tədbirdən böyük
zövq aldıqlarını söylədilər və məktəbin kollektivinə
uğurlar arzuladılar.
Yusif ƏLİYEV |