Qadınların
cəmiyyətin inkişafında əməyi danılmazdır. Hansı sahəyə
baxırsan, orada qadın əməyini, qadın zəhmətini görürsən.
Mən də sizlərə belə qadınlardan biri haqqında danışmaq
istəyirəm.
Sədaqət Səmədova əslən Masallıdan olsa da, çoxları onu
Astaralı kimi tanıyır. Özü söhbətlərinin birində deyirdi
ki, "Masallı torpağı, o məkanda sayılıb-seçilən
İsmayılovlar ailəsi məni dünyaya gətirdi, məni yüksək
əxlaqi təməl üzərində tərbiyə etdi. Astara isə mənə
xoşbəxt ailə, taleyimə yazılmış dostlar, müəllimlik
peşəsinin sirlərinə yiyələnmək və yaxşı ad qazanmaq
imkanı verdi. İki gül balam Astarada doğulub ömrümə ömür
caladı və sonra şirin-şirin nəvələrim dünyaya gəldi".
Allah-təala hər kəsə bir ömür yazısı, bir həyat tarixi
nəsib edir. Sədaqətə də sədaqətli ömür yolu bəxş edib.
Sədaqət müəllim bu yolu üzüağ, alnıaçıq yaşaya bilib. Öz
əməli ilə başqalarına nümunə olub, müəllim kimi
seçilməyi bacarıb, ətrafındakılara lazım olanda
köməklik göstərə bilib. Məhz bütün bunlar onu hamıya
sevdirə bilmiş və yaşadığı yerdə xüsusi hörmət sahibi
etmişdir. Sədaqət Səmədova 60 illik ömrünü bu gün də
mənalı və dəyərli yaşayır, tərbiyə verdiyi yüzlərlə
şagird və tələbələr müstəqil Azərbaycana ləyaqətlə
xidmət edir, dövlətimizin daha da çiçəklənməsi naminə
ölkədə gedən quruculuq işlərində fəal iştirak edirlər.
Keçmiş şagirdləri bu gün də onunla əlaqə saxlayır, ona
öz minnətdarlıqlarını bildirirlər.
Ömürdən səhifələr: O, 1960-cı ildə Masallı şəhər 1 saylı
orta məktəbin 1-ci sinfinə daxil olub. Oxuduğu illərdə
dərslərə yüksək səviyyədə hazırlığı, bacarıq və
qabiliyyəti ilə yaşıdlarından fərqlənə bilirdi. 1970-ci
ildə məktəbi bitirdi. Valideynləri hələ uşaqlıqda onda
musiqiyə olan sonsuz həvəsi və istəyi hiss etmişdilər.
Bunu nəzərə alaraq onu Masallıda açılmış yeddiillik
musiqi məktəbinə qoyurlar. Musiqi məktəbini yüksək
qiymətlərlə bitirdiyinə görə bacarığını nəzərə alaraq
onu burada müəllim işləməyə dəvət edirlər. O, kiçikyaşlı
uşaqlara musiqi öyrətməklə yanaşı, daim öz təhsilini
artırmaq barədə də düşünürdü. 1972-ci ildə Azərbaycan
Dövlət Univerisitetinin tarix fakültəsinə daxil olub
tələbə adını qazandı. 1974-1984-cü illərdən Astara
şəhərinin 1, 3 və 4 nömrəli orta məktəblərində ixtisası
üzrə müəllim işləməklə yanaşı, rayonun ictimai-mədəni
həyatında fəal iştirak edirdi.
1991-ci ildə Sədaqət müəllimin həyatında daha bir mühüm
hadisə baş verdi. Lənkəran Məktəbəqədər Pedaqoji
Texnikumun filialı Astarada açılanda ilk təcrübəli tarix
müəllimi kimi filiala işləməyə dəvət alanda başa düşdü
ki, çəkdiyi əməyi və zəhməti hədər getməyib. Bu etimadı
doğrultmaq lazım idi. İndi əminliklə demək olar ki,
Sədaqət müəllim adına layiq olaraq sədaqətlilik nümunəsi
göstərərək Astara Pedaqoji Kollecində işlədiyi 20 ildən
artıq müddətdə özünü təkcə yüksək pedaqoji ustalığa
malik və tarix elminin, xüsusilə Azərbaycan tarixinin
əsaslarını öyrədən bir müəllim kimi deyil, həm də bir
qayğıkeş bacı, bir fədakar ana kimi təqdim etdi.
Sədaqət müəllimin əməyi rəhbərlik tərəfindən daim
qiymətləndirilmişdir. Kollec rəhbərliyi səmərəli
fəaliyyətinə və təlim-tərbiyə prosesində qazandığı
müvəffəqiyyətlərə görə onu Fəxri fərmanlarla təltif
etmiş, ona dəfələrlə təşəkkür elan olunmuşdur.
Azərbaycan Respublikası Təhsil Nazirliyinin Fəxri
fərmanına layiq görülən Sədaqət müəllim qazandığı
uğurları təkcə öz adına deyil, həm də kollecə verilən
qiymət kimi qəbul edir.
Kollecin direktoru, fəlsəfə doktoru, əməkdar müəllim
Əlihəsən Həmzəyev Sədaqət müəllim haqqında belə deyir:
"Sədaqət müəllim haqqında yalnız xoş sözlər demək olar.
Sədaqət müəllim çox sadə, savadlı və səmimi insandır. O
elə insanlardandır ki, onunla ünsiyyət qurmaq adamda xoş
təəssürat oyadır. 20 ildən artıqdır ki, bir təhsil
ocağında işləyirik. Kollecdə mən qarışıq hamı ona "böyük
bacı" deyə müraciət edir. Bu da təsadüfi deyil.
Ətrafında olanlara qarşı çox həssas və diqqətlidir.
Dostlarına qarşı qayğılı münasibətin nəticəsidir ki,
daim kimsə nə üçünsə ona müraciət edir. Bütün bu
müraciətlər də diqqətdən kənarda qalmır. Tələbələr ondan
razıdır. Tarix elminin sirlərini yeni və müasir tələblər
çərçivəsində tələbələrə öyrədir. Azərbaycan tarixində
xalqımızın başına gəlmiş faciələrin əsas mahiyyətini
onlara başa salmaqla yanaşı həm də böyük uğurlarımız və
nailiyyətlərimiz barədə də geniş və müfəssəl məlumat
verir. Sədaqət müəllim öz adına layiq olduğunu əməlləri
ilə sübut edib. Mən ona gələcəkdə daha böyük uğurlar
arzu edirəm".
Sədaqət müəllimin gözəl ailəsi var. Mehriban ana,
xanım-xatun nənə, qayğıkeş qayınana, həm də ləyaqətli
ömür-gün yoldaşıdır. O, öz sədaqətli ömür yolunu davam
etdirir.
Son olaraq Sədaqət müəllimin timsalında bütün qadınları
qarşıdan gələn bayram münasibətilə ürəkdən təbrik edir,
onlara uzun ömür, səadət, xoşbəxtlik və firavanlıq
arzulayır, işlərində yeni-yeni uğurlar diləyirəm.
Azad ABDULLAYEV |