Azərbaycan
Müəllimlər İnstitutunun Şamaxı filialında Novruz bayramı
ilə əlaqədar təntənəli bayram şənliyi keçirildi.
Tədbiri giriş sözü ilə açan filialın direktoru Tünzalə
Yusifova bayram iştirakçılarını salamlayaraq qeyd etdi
ki, bu günlər milli müstəqilliyinə qovuşmuş vətənimizin
hər bir guşəsində bayram əhvali-ruhiyyəsi duyulmaqdadır.
Ümummilli liderimiz Heydər Əliyevin memarı olduğu
müstəqil Azərbaycan Respublikası bu gün dünyanın inkişaf
etməkdə olan ölkələri cərgəsindədir. İqtisadiyyatı
güclənən dövlətimizin hərbi qüdrəti, beynəlxalq aləmdə
siyasi nüfuzu durmadan artır. Milli adət-ənənələrimiz,
milli mənəvi dəyərlərimiz dövlət tərəfindən qorunur,
yaşadılır. Xalqımızın özü qədər qədim olan Novruz sülh,
əmin-amanlıq, bolluq, xeyir-bərəkət bayramıdır. Bu
bayramın bir özəlliyi də vardır ki, gənclər yaşlıların,
tənha insanların ziyarətinə gedir, küsülülər barışır,
hamı bir-birinə xoşbəxtlik diləyir.
Bayram tədbirində vurğulandı ki, Azərbaycan xalqını
bayram münasibəti ilə təbrik edən ölkə başçısı cənab
İlham Əliyev xalqımızı əmin edir ki, müstəqil Azərbaycan
Respublikası öz suverenliyini qorumaq əzmindədir, biz
tezliklə işğal altında olan torpaqlarımızı azad edəcək,
Novruz tonqallarını Şuşada alovlandıracağıq.
Sonra T.Yusifova Azərbaycan Müəllimlər İnstitutunun
rektoru, professor, Milli Məclisin deputatı Aqiyə xanım
Naxçıvanlının adından da tədbir iştirakçılarını təbrik
etdi və onun bayram münasibəti ilə xoş arzularını,
səmimi salamlarını çatdırdı. O, hər kəsə bu əziz
günlərdə bol ruzi, bərəkət, bolluq, əmin-amanlıq
arzuladı.
Tədbirdə Şamaxı Rayon İcra Hakimiyyətinin
İctimai-siyasi və humanitar şöbə üzrə müavini Əşrəf
Şükürov, baş məsləhətçi İsmayıl Manafov, filialın
dosenti Mayıl Alıcanov, dosent Eyvaz Eminalıyev,
Şasəddin Mikayılov çıxış edərək pedaqoji kollektivi,
tələbələri bayram münasibəti ilə təbrik edib onlara
yeni-yeni uğurlar dilədilər.
Filialın özfəaliyyət kollektivi öz rəngarəng ifaları ilə
tədbiri şənləndirdi.
Bayram şənliyinə xüsusi ovqat bəxş edən Kosa və Keçəl
tələbələrin alqış sədaları altında Bahar qızı məclisə
dəvət etdilər. Hamıya sülh, əmin-amanlıq arzulayan Bahar
qız dilədi ki, növbəti dəfə tədbir iştirakçılarını
Şuşada, Cıdır düzündə salamlasın, qalib ordumuz üçrəngli
bayrağımızı Şuşa qalasında dalğalandırsın.
Bahar qız hamını çatılan tonqalın ətrafında rəqsə dəvət
etdi. Daha sonra "Ən yaxşı Novruz xonçası" müsabiqəsi
keçirildi və qaliblər elan olundu.
Novruz şənliyinin sonunda filialın bir qrup müəllim və
tələbələri bayram hədiyyələri ilə Şamaxı şəhər 1 saylı
ixtisaslaşdırılmış internat evinə görüşə getdilər. |