|
Martın 15-də Bakının Balaxanı qəsəbəsindəki 69 nömrəli
tam orta məktəbdə riyaziyyat müəllimlərinin təşəbbüsü
ilə "Riyaziyat gecəsi - Bahar bayramı" adlı tədbir
keçirildi. Məktəbin akt zalı bayramsayağı bəzədilmişdi.
Tədbiri açıq elan edən aparıcılar riyaziyyat fənninin
əhəmiyyətindən danışdılar, iştirakçıları Novruz bayramı
münasibəti ilə təbrik etdilər. Onlar Novruz bayramının
tarixi köklərindən, adət-ənənələrindən, mərasimlərindən
söz açdılar.
Söz şagirdlərə verildi. Yuxarı sinif şagirdlərinin bir-birindən
maraqlı layihələri, musiqi nömrələri, rəqsləri,
viktorinaları maraq doğurdu. Şagirdlər riyazi
layihələrini təqdim etdilər. Keçəllə Kosanın riyaziyyat
kraliçası ilə təsadüfi görüşü, kraliçanın onları riyazi
suallarla çətinə salması, sonra Keçəllə Kosanın
kraliçanı Novruz şənliyinə dəvət etməsi səhnələri
tədbiri daha da rəngarəng etdi. Proqramın bütün
nömrələri, xüsusən də Bahar qızın meydana gəlişi, təmsil
etdiyi fəslin şəninə söylədiyi şeir və mahnılar, Keçəllə
Kosanın məzəli dialoqu, maraqlı idman nömrələri bayram
iştirakçılarında xoş ovqat yaratdı.
Tonqala od vuruldu. Şagirdlər Kosa ilə Keçəlin, Bahar
qızının və riyaziyyat kraliçasının iştirakı ilə
tonqaldan hoppandılar.
Tədbirin sonunda məktəbin direktoru Xalıqverdi Abbasov
iştirakçıları Novruz bayramı münasibəti ilə təbrik etdi.
Rəşad ZİYADOV |
