Azərbaycan Respublikasının Prezidenti yanında Dövlət
İdarəçilik Akademiyası Beynəlxalq İdarəetmə İnstitutuna
üzv qəbul edilib. Bu barədə qərar 2013-cü ilin mart
ayında qurumun Brüsseldə yerləşən baş qərargahında qəbul
olunub və baş direktor Rolet Loretanın imzası ilə Dövlət
İdarəçilik Akademiyasına rəsmi məktub ünvanlanıb.
Dünyanın bir çox nüfuzlu dövlət idarəetmə akademiya və
institutlarını birləşdirən adıçəkilən qurum idarəçilik
sahəsində çevik mexanizmin yaranması, idarəetmədə
innovativ metodların işlənməsi, demokratik dəyərlər,
sivil-hüquqi dövlət quruculuğu, qloballaşma dövründə
inteqrasiya prosesinin inkişafında elm və təhsil
qurumlarının rolunun daha da gücləndirilməsi və digər
mühüm missiyanı həyata keçirir. Azərbaycandan bu
beynəlxalq quruma ilk dəfə Dövlət İdarəçilik Akademiyası
üzv qəbul olunub.
Respublikamızda təhsil, elm sahəsində qarşılıqlı
təcrübə, ikitərəfli və çoxtərəfli əlaqələrin inkişafı
istiqamətində dövlət tərəfindən həyata keçirilən siyasət
və ardıcıl tədbirlərin əhəmiyyətini nəzərə alaraq Dövlət
İdarəçilik Akademiyasında da bu sahədə bir sıra
tədbirlər reallaşdırılmaqdadır.
Azərbaycan Respublikasının Prezidenti cənab İlham
Əliyevin rəhbərliyi ilə ölkəmizdə sürətli tərəqqinin baş
verdiyi hazırkı vaxtda cəmiyyətin sosial-iqtisadi
tərəqqisində, rəqabətə davamlı insan potensialının,
inkişafa zəmin yaradan biliyin formalaşmasında elmin,
təhsilin roluna göstərilən diqqət Azərbaycanın müasir
dünyaya inteqrasiya prosesinin tərkib hissəsidir.
Bu prioritetləri nəzərə alaraq Dövlət İdarəçilik
Akademiyasının tərəfdaşlıq əlaqələrinin
genişləndirilməsindəki məqsədi elmə söykənən, bilik
iqtisadiyyatının idarə edilməsi istiqamətində təcrübə
mübadilələrini genişləndirmək, innovasiyaları təbliğ
etmək, yeni nəsil tərəfdaşlıq modelini hazırlamaqdır.
Samirə KƏRİMOVA |