Müəllim
özünün obrazını sinifdə, auditoriyada, tələbələri ilə
təmasda yaradır. Zaman keçdikcə bu obraz kamilləşir,
yaddaşlara köçür, həkk olunur. Belə müəllimlərin əziz
xatirəsi heç vaxt unudulmur, xatırlanır. Məcid müəllim
kimi. Məcid Bağırovu tanıyanlar yaxşı xatırlayırlar ki,
o, hər dəfə auditoriyaya girəndə özünün nurlu çöhrəsi,
səliqə-sahmanı, ağır yerişi ilə tələbələrin diqqətini
cəlb edərdi. Danışığının ahəngdar və tələbkar tonu,
kəlmələrinin qətiyyəti onun nitqinə xüsusi bəlağət və
cazibədarlıq gətirərdi.
Bağırov Məcid Heydər oğlu 1944-cü ildə Gədəbəy rayonunun
Əli-İsmayıl kəndində anadan olmuşdur. 1961-ci ildə
Gədəbəy rayonu Əli-İsmayıl kənd orta məktəbini bitirmiş,
1962-ci ildə Azərbaycan Dövlət Pedaqoji Universitetinin
fizika-riyaziyyat fakültəsinə daxil olmuş və 1967-ci
ildə ali təhsilini başa vurmuşdur.
O, gənc mütəxəssis kimi 1967-ci ildə Salyan rayonunun
Neftçala şəhərindəki (indiki Neftçala rayonunun inzibati
mərkəzi) internat-məktəbdə fəaliyyətə başlamış və
1970-1971-ci illərdə isə Bakıdakı 29 nömrəli orta
məktəbdə riyaziyyat müəllimi işləmişdir. Çox keçmədi
ki, Məcid müəllim pedaqoji fəaliyyətini ali məktəblə
bağladı. O, 1971-1986-ci illərdə Azərbaycan Dövlət Neft
Akademiyasında ali riyaziyyat kafedrasında baş
laborant, assistent, baş müəllim, 1986-2006-cı illərdə
tətbiqi riyaziyyat kafedrasında dosent və kafedra müdiri
vəzifələrində işləmişdir. 2006-2007-ci illərdə
Azərbaycan Respublikası Prezidenti yanında Dövlət
İdarəçilik Akademiyasında dosent və dekan müavini
vəzifələrində çalışmışdır.
Dosent Məcid Bağırov iqtisadiyyat sahəsində fəlsəfə
doktoru kimi 35-dən çox elmi, metodiki və ali məktəblər
üçün dərs vəsaitlərinin müəllifi olmuşdur.
Məcid müəllim 2007-2008-ci dərs ilindən ömrünün sonuna
kimi Azərbaycan Universitetində tədris işləri üzrə
prorektor vəzifəsində çalışırdı. İşlədiyi müddətdə
tədris prosesinin idarə olunmasında müasir üsullardan
istifadə etmiş, auditoriya məşğələlərini və semestr
imtahanlarının İKT ilə həyata keçirilməsini təşkil
etmişdir.
Məcid müəllim öz nurlu sifəti, nəzakətli danışığı ilə
həmsöhbəti olduğu hər kəsə müsbət emosiyalar bəxş
edirdi. Kollektiv üzvləri və tələbələr arasında dərin
hörməti var idi. Sözün əsl mənasında, saf insan idi.
Hamıya xeyirxahlıq etməyi çox sevirdi. Onu çoxlarından
fərqləndirən cəhətlərdən biri həmsöhbətlərini,
tabeliyində olan işçiləri və tələbələri səbrlə, diqqətlə
dinləmək qabiliyyəti idi. Məcid Bağırov halallığı,
düzlüyü, xeyirxahlığı, mənəvi saflığı həyatının mənası
hesab edərdi. O, insanlara qarşı həmişə ədalətli olmağa
çalışardı, heç kimdən köməyini əsirgəməzdi. Başqalarının
səhv işini görəndə əsəbiləşdiyi vaxtlar da olardı, amma
heç vaxt insanların qəlbinə toxunan hərəkətə yol
verməzdi. Şübhəsiz ki, onun səmimi, qayğıkeş, təvazökar,
xeyirxah insan, ciddi, bacarıqlı rəhbər işçi kimi
formalaşmasında aldığı tərbiyə, keçdiyi həyat yolu böyük
rol oynamışdır.
Məcid müəllim həm də mehriban ailə başçısı olmuşdur.
Onun üç övladı var. Tanrı elə bil bu şəxsiyyəti
xeyirxahlıq üçün yaratmışdı. Təəssüf ki, aramızdan tez
getdi. Məcid müəllimin işıqlı xatirəsi onu tanıyanların
qəlbində həmişə yaşayacaqdır. Bu il martın 10-da ömrünün
69-cu ilində dünyasını dəyişdi.
Ağamalı AĞAMALIYEV,
Azərbaycan Universitetinin prorektoru |