Javascript DHTML Drop Down Menu Powered by dhtml-menu-builder.com

ARXİV

12 Aprel 2013 - №13

 

Azərbaycan təhsilinin uğurları

 

Beynəlxalq riyaziyyat olimpiadalarının 1 gümüş, 3 bürünc mükafatçısı 

Əliyev İzmir Yalçın oğlu 5 mart  1997-ci ildə Şəmkirdə dünyaya göz açıb. Altı il Şəmkir rayonunun Morul kənd orta məktəbində təhsil alıb. Hazırda Mingəçevir Özəl Türk Liseyinin 11-ci sinif şagirdidir. Gəlin, İzmirin həyat tarixçəsini öz dilindən dinləyək: 

- Altıncı sinfin axırında imtahan verib Mingəçevir Özəl Türk Liseyinə qəbul oldum, VII-VIII sinifləri Mingəçevirdə oxudum. Yeddinci sinfin ikinci yarımilliyində məktəblilər arasında olimpiadalarda iştirak etmək üçün seçimlər oldu. Mən öz dərslərimi oxuya-oxuya həm də iki il fənn olimpiadalarına hazırlaşdım. Doqquzuncu sinfin əvvəllərində Bakı Özəl Türk Liseyində axırıncı seçim imtahanları keçirildi. Adətən bu imtahanlarda altı-yeddi nəfər uşaq seçilir və onları dünya olimpiadalarında iştirak etmək üçün hazırlaşdırırlar. Seçilən şagirdlərin biri də mən oldum.

Doqquzuncu sinfin sonlarında iştirak etdiyim ilk olimpiada Cənubi Kipr Respublikasında keçirilən Beynəlxalq  Balkan Riyaziyyat  Olimpiadası olub. Mən oradan bürünc medalla qayıtdım. Onuncu sinifdə oxuyanda Qazaxıstanda Jautıkov olimpiadasında iştirak etdim, orada həvəsləndirici medal aldım. Daha sonra  aprel ayının sonunda Türkiyənin Antalya şəhərində keçirilən Beynəlxalq Balkan Riyaziyyat Olimpiadasında bürünc medal əldə etdim.

2012-ci ilin iyun ayında isə Yunanıstanda keçirilən Beynəlxalq Balkan Riyaziyyat Olimpiadasında gümüş medal qazandım. Sonuncu dəfə Argentinada keçirilən 53-cü Beynəlxalq riyaziyyat olimpiadasında bürünc medal əldə etdim.

Mənə riyaziyyata həvəs nənəmdən keçib. Ailəmizdə nənəm riyaziyyat müəllimi olub. Anam isə musiqi müəllimidir.

Mənim adımı da  nənəm qoyub. Deyilənə görə, bizim tərəflərdə İzmir adında  çox xeyirxah bir insan varmış. Onun xatirəsinə ehtiram əlaməti olaraq mənim adımı İzmir  qoyublar.

Xarici ölkələrə olimpiadalara gedəndə keçirdiyim hissləri sözlə ifadə edə bilmirəm. İnsan gərək o hissləri özü yaşaya. Əslində heç bir olimpiadada elə də güclü həyəcan keçirməmişəm. Ona görə ki, həmişə ciddi hazırlaşmışam və özümə çox  güvənmişəm. Medallar qazananda keçirdiyim fəxr hissi, Azərbaycan bayrağının qaldırılması, tribunaya Azərbaycanın təmsilçisi kimi mənim çağırılmağım - bütün bunlar qürur gətirən yaşantılardır. Təsəvvür edin ki, hər bir ölkədən  medal alanlar bir-bir tribunaya dəvət olunur, kimin hansı ölkədən gəldiyi də elan edilir. Qaliblərin sırasında Azərbaycanın da adının  çəkilməsi bizim üçün böyük uğurdur. İştirak etdiyim ən axırıncı olimpiadada 100 ölkənin nümayəndələri iştirak edirdi.

Təhsil aldığım liseydə yüksək səviyyədə bilik qazanmaq üçün hər cür şərait var. Bizi ən çox fərqləndirən cəhət olimpiadalarda iştirak etməyimizdir. Müəllimlərimiz hər bir işdə bizə kömək edirlər. Mən əslində Mingəçevir Özəl Türk Liseyinin şagirdi sayılıram, Bakı Özəl Türk Liseyinə isə olimpiadaçı kimi gəlmişəm. İştirak etdiyim beynəlxalq riyaziyyat olimpiadalarında  seçilən uşaqlara adətən  sertifikat, diplom, medal və bir qayda olaraq pul mükafatı verilir. Dünya olimpiadalarında iştirak etmək, istənilən xarici ölkənin ali məktəbində oxuya bilmək  barədə şagirdə həm də seçim etmək hüququ verir.

Riyaziyyat fənnini çox sevdiyimdən ən çox riyaziyyat olimpiadalarına gedirəm.

Azərbaycan dilindən başqa ingilis dilində yazıb-oxumağı  sərbəst bacarıram. İngilis dilini həm liseydə öyrənmişəm, həm də sərbəst məşğul olmuşam. Çünki xarici ölkələrdəki olimpiadalarda iştirak etmək üçün gərək ingilis dilindən imtahan verib bal toplayaq. Liseyin ən özəl xüsusiyyətlərindən biri də odur ki, fizika, kimya, biologiya, informatika - bunlar hamısı ingilis dilində tədris olunur. Bir neçə aydan sonra artıq 11-ci sinfi başa vururam, orta təhsillə vidalaşıram.

Ali təhsilimi Kanadadakı universitetlərdən birində davam etdirəcəyəm. İngilis dilindən səviyyə ölçmə imtahanına xarici universitetlərdə çox böyük önəm verirlər. Olimpiadalarda fərqlənən uşaqları ali məktəblərə orada imtahansız qəbul edirlər. Qayda belədir ki , olimpiada iştirakçısı olan şagird özünün diplomunu, sertifikatını oxumaq istədiyi xarici ölkədəki ali məktəbə göndərir və onu oraya qəbul edirlər. Kanadada Toronto, Waterloo universitetləri var. Mən hər ikisinə sənədlərimi göndərmişəm.

Ailədən kənarda oxumağın bir məktəbli üçün müəyyən çətinlikləri də var. Belə ki, valideynlərdən kənarda yaşayırsan, doğmalarını tez-tez görə bilmirsən. Valideynlərim Şəmkirdə yaşayır. Biz hər gün bir-birimizlə telefon əlaqəsi saxlayır, hal-əhval tuturuq. Mənim Tahir adında bir qardaşım var. Hazırda ADNA-da neft mühəndisliyi fakültəsində 1-ci  kursda oxuyur. Hər iki-üç gündən bir mənə baş çəkir. O da vaxtilə liseydə oxuyub, xarici ölkələrdə keçirilən olimpiadalarda iki il iştirakçı olub.

Mən hansı xarici ölkədə oxuyacağamsa, fərqi yoxdur, sonunda yenə də vətənimə qayıdacağam. Birinci o səbəbdən ki, biz xarici ölkədə oxumağa dövlət xətti ilə gedirik. Odur ki, bütün hallarda biz ali məktəbi başa vurandan sonra geriyə qayıdıb vətənimizə xeyir verməliyik. İkincisi də ki, ana vətəndən kənarda necə qərar tutmaq olar? Şəxsən mən xarici ölkələrə olimpiada yarışmalarına gedəndə belə bir an da olsun öz yerimi-yurdumu yadımdan çıxarmamışam. Yəni dediyim odur ki, haraya getsəm də qayıdacağım məkan vətəndir. Mənim üçün ən müqəddəs  varlıq vətənim və valideynlərimdir. Onlar mənə hər şeydə hər zaman dayaq olublar.

Ən böyük hobbim isə futbol oynamaq, İnternetdən istifadə etməkdir. Daha sonra tennisi sevirəm. Burada boş vaxtlarımızda hamımız  tennis oynamağı xoşlayırıq.

Axırıncı dəfə xarici ölkədə keçirilən olimpiadada iştirak edərkən sosial şəbəkə vasitəsilə hər gün qardaşımla əlaqə yaradırdım. Qalib olanda da ilk sevincimi qardaşımla bölüşürdüm. O da öz növbəsində mənim qələbə sorağımı valideynlərimlə paylaşırdı. Bakıya qayıdanda valideynlərim məni çox böyük fərəh hissi ilə qarşıladılar. Mənim medalla qayıtmağıma bütün qohumlarım sevinirdi. Mən hər iki liseydəki bütün müəllimlərimi çox istəyirəm və onları bir-birindən fərqləndirmirəm. Çünki onlar bütün vaxtlarını bizə sərf edirlər. Hər hansı bir dərslə bağlı problemimizi çəkinmədən müəllimlərimizlə paylaşırıq və onlar bizə yaxından kömək edirlər.

Biz yaşda gənclərin ən birinci vəzifəsi oxumaq, yüksək səviyyədə təhsil almaqdır. İndi hansı sənəti seçsəm, deməli həyatımı da o səmtə yönəltmiş oluram. Mənim gələcək arzularımdan biri də odur ki, öz elmimlə, bacarığımla Azərbaycanı bütün dünyaya daha yaxından tanıdım. Azərbaycan gənclərinin dövlət hesabına xarici ölkələrdə təhsil alması üçün Dövlət Proqramı qəbul olunub. Mən də həmin proqram çərçivəsində kompüter mühəndisliyini öyrənmək arzusundayam. Sonra isə qayıdıb hərbi xidmətimi yerinə yetirmək, daha sonra da magistraturada oxumaq istəyirəm. Bir amalım var: o da yorulmadan çalışmaq və dövlətə xidmət etməkdir.

Şəmkir özü elə bir bölgədə yerləşir ki, orada təlim meydançaları da var, hərbi hissələr də. Təbii ki, Qarabağ problemi bütövlükdə bütün Azərbaycan əhalisinin normal həyat tərzinə mane olur. Biz düşmənin ölkəmizə qarşı bütün vəhşi hərəkətlərini pisləyir, ümid edirik ki, bizim nəsil inşallah bir gün bu problemi yoluna qoyacaq.

Atam-anam, orta məktəb və liseydəki  müəllimlərim hər zaman mənə böyük ümidlər bəsləyiblər. Əlbəttə, mən onları doğrultmalıyam. Arzum budur ki, mükəmməl ali təhsil alım,  vətənə xeyirli övlad olum, Azərbaycanı bütün dünya miqyasında tanıda bilim, respublikamın xoş sədalarını həmişə dünyaya yayım.  


Beynəlxalq olimpiadaların 1 qızıl, 1 gümüş, 3 bürünc medalının sahibi 

Balaqardaş Cəbrayıl oğlu Bəşirov 19 avqust 1996-cı ildə Salyanda anadan olub. Birinci sinifdən altıncı sinfədək Salyandakı 1 nömrəli orta məktəbdə oxuyub. Hazırda Şirvan Özəl Türk Liseyində 11-ci sinifdə təhsil alır.  Balaqardaşın söylədikləri: 

- Ailədə iki uşağıq. Mən və məndən dörd yaş kiçik bacım. O, hazırda 6-cı sinifdə oxuyur. Anam evdar qadın, atam isə qaynaqçıdır.

Mən birinci sinfə Salyanda getmişəm. İlk sinif müəllimim Həqiqət xanım olub. Mənə qələm tutmağı o öyrədib. Elmə, təhsilə olan  marağım isə ancaq məktəbdə oyanıb. Üçüncü, dördüncü siniflərdə oxuyarkən riyaziyyata daha çox marağım vardı. Məsələləri, misalları həll etməyi çox xoşlayırdım. Ondan da qaynaqlanaraq dəqiq elmləri seçdim. İki sinif, yəni yeddinci və səkkizinci sinifləri Şirvan Özəl Türk Liseyində oxudum. Sonra olimpiadalar haqqında məlumat aldım və beynəlxalq  olimpiadalara hazırlaşmağa başladım. Bu işdə  müəllimlərim də mənə kömək etdilər. Doqquzuncu sinifdən Bakı Özəl Türk Liseyinə gəlirəm.

2008-ci ildə ilk dəfə Şirvan Özəl Türk Liseyinə oxumağa gələndə təhsil üçün ödənişim 50 faizə düşdü. Çünki imtahanda birincilik qazanmışdım.

Liseyə gəldiyim ilk günlər həm şagird, həm də müəllim kollektivini tanımadığımdan  mənim üçün  çox cansıxıcı keçirdi. Get-gedə uşaqlarla ünsiyyətdə olduq, bir-birimizi yaxından tanıdıq, sonra lisey həyatına alışdım.

Onuncu sinifdə oxuyanda tam olaraq qarşıma  məqsəd qoydum ki, mən həyatımı elmə həsr edəcəyəm. Əslində 8-ci sinifdən olimpiadalara  hazırlaşırdım, özümü elmə həsr eləmək fikrim tam olaraq onuncu sinifdə formalaşdı.

İlk dəfə 2010-cu ilin dekabrında olimpiada qalibi oldum.

Təyyarəyə ilk dəfə minirdim. Xarici ölkəyə də gedişim  ilk dəfə olduğundan həyəcanlı idim. Biz oraya çatanda qalmağa yer verdilər. Müxtəlif ölkələrdən gələn uşaqlar bir-biri ilə tanış olur, bir-birinin haqqında bilgilər almağa maraq göstərirdilər. Azərbaycanı çox ölkə tanıyırdı. 2009-cu ildə 40-dan çox ölkənin iştirak etdiyi  Beynəlxalq Təbiət Elmləri Olimpiadası Azərbaycanda keçirildiyinə  görə iştirakçıların çoxunun Azərbaycan barədə təsəvvürü vardı.

Müqəddəs kitabımız olan Qurani-Kərimin ilk əmri "Oxu"dur. Elm öyrənmək, savad ardınca getmək çox gərəkli və vacib bir işdir. Elm öyrənib onu həyata, insanlara tətbiq etmək, insan rifahı üçün çalışmaq necə də dəyərli bir vəzifədir.

Təbii ki, bütün həmyaşıdlarım kimi mən də idmana, xüsusilə futbola həvəs göstərirəm. Stolüstü tennis də mənim maraq dairəmdə olan oyundur. Hərdən musiqiyə də qulaq asıram. İngilis dilində danışmağı və yazıb-oxumağı bacarıram.

Mən kimya sahəsində mühəndislik peşəsi üzrə ixtisas almaq istəyirəm. Kanadanın  Toronto Universitetində oxumaq mənim ən böyük arzumdur.

Təbii ki, mənim bu planımla bağlı bəzən hərə bir fikir söyləyir. Amma sonunda  hamı yekdilliklə  mənə deyir ki, məsləhət sənin özünündü.

Yeddinci sinifdə mənim Öndər Şəntürk adında bir müəllimim  vardı. O özü də ali təhsilini Azərbaycanda almışdı. Mən bəlkə də nə vaxtsa Azərbaycandan kənarda qala bilərəm, ancaq bunu qətiyyən arzulamıram.

Ən böyük arzum kimya mühəndisi ixtisası üzrə təhsil almaq, xalqımın xeyirli övladı olmaqdır. İstəyirəm Azərbaycan adına çox böyük bir layihəm olsun və o layihəm respublikama çox böyük xeyir gətirsin.

Bu gün Azərbaycanın əzəli və qədim torpaqları işğal altındadır. Mən ali təhsilimi bitirdikdən sonra ürəkdən istəyirəm ki, hərbi xidmətə yollanım, elm sahəsində olduğu kimi, bu sahədə də vətənimə olan övladlıq borcumu yerinə yetirim.

Düşmənlə üzbəüz səngərdə mərd-mərdanə dayanmaq ər kişinin hünəridir. Mən Laçının, Şuşanın, Kəlbəcərin  həsrətini daşıyıram. 

Məsələn, deyirlər ki,Yaponiyada insanların 80 faizi kitab oxumaqları ilə məşhurdur. Mən istəyirəm ki, Azərbaycan da elə olsun. Gəncliyin borcu oxuyub təhsil almaqdır.

Mən 5 dəfə müxtəlif xarici ölkələrdə keçirilən beynəlxalq fənn olimpiadalarında iştirakçı olmuşam. Doqquzuncu sinifdə oxuyarkən ilk dəfə Nigeriyada  keçirilən Beynəlxalq Təbiət Elmləri Olimpiadasında iştirak etdim. Bürünc medal qazandım. Onuncu sinifdə oxuyanda yenə də eyniadlı beynəlxalq olimpiadada iştirak edib gümüş medal aldım. Növbəti olimpiadada yenə bürünc medala layiq görüldüm. Daha sonra Nigeriyada dəqiq fənlər üzrə beynəlxalq olimpiadada iştirak etdim və qızıl medal aldım. Daha sonra Amerikada keçirilən beynəlxalq kimya olimpiadasında iştirak etdim. Onda da bürünc medal aldım.

Hər qələbə qazananda sevincimi ilk əvvəl müəllimlərimlə bölüşürdüm. Getdiyim ölkələrdə müəllimlərim valideynlərimlə də danışmaq üçün şərait yaradırdı. Çalışırdım ki, bütün nəticələrimdən valideynlərim  tez xəbərdar olsunlar. Beş səfərimdən ən çox yadımda qalan gümüş medal almağımdır. O səfərdə çox dostlar qazandım, evdəkilər  də  "davamlı olsun" qəbilindən gözəl sözlər dedilər.

Gəncliyin hər dəqiqəsi qızıldır. Bu qızılı səmərəsiz yerə sərf etmək olmaz. 

Qarayev Fuad Abdurəhman oğlu: - Bakı Özəl Türk Liseyində riyaziyyat müəllimi işləyirəm, həm də bununla bərabər "Çağ" Öyrətim İşlətmələri  Şirkətinin Azərbaycan-Türkiyə  Özəl liseylərinin  fənn olimpiadaları koordinatoruyam. Riyaziyyat fənni üzrə respublika fənn olimpiadalarının münsiflər heyətinin məsul katibiyəm.

1996-cı ildən bəri biz  beynəlxalq olimpiadalarda iştirak edirik. Bu günə qədər iştirak etdiyimiz olimpiadalarda tam olaraq 537 medal almışıq. Rayonlarımızda və Bakıdakı məktəblərimizdə  yeddinci sinifdən etibarən uşaqları olimpiadalarda iştirak etmək üçün seçirik. Daha sonra bu uşaqlar olimpiadalara hazırlıq üzrə çalışmalara başlayır. Biz hər ayın sonunda məktəblərə aylıq olimpiada sınaq imtahanları göndəririk, orada olimpiadalara hazırlaşan uşaqları imtahan edir, ümumi siyahılar çıxarır, nəticələri elan edirik. Uşaqlar doqquzuncu sinfə gəldikdə isə imtahan verirlər, dünya olimpiadalarında iştirak edə biləcək uşaqları seçirik. Onlar yenə də öz məktəblərində oxumağa davam edirlər. Amma ara-sıra onları on beş günlük, iyirmi günlük, bir aylıq olimpiada kursları üzrə toplantılara  dəvət edir, burada uşaqlara mütəmadi dərslər keçirik. Bu dərsləri keçmək üçün həm bizim öz müəllimlərimizi, bəzən də universitetlərdən, xarici ölkələrdən olimpiada işini bilən professorları  dəvət edirik. Bu uşaqlar olimpiadalarda iştirak etmək üçün hazırlaşdırılır. Şagirdlərin olimpiadalara hazırlanmasında hər fənn üzrə respublika fənn olimpiadaları münsiflər heyətinin sədrləri (Rafiq Quliyev - riyaziyyat, Mirzəli Murğuzov - fizika, Vaqif Abbasov - kimya) fəaliyyət göstərirlər.  Uşaqların üzərində onların qayğısı, əməyi  çoxdur.

Şagirdlərimiz  günortaya qədər öz dərsləri ilə, dərsdənkənar olaraq olimpiada işləri ilə məşğul olurlar. İzmir Əliyev, Balaqardaş Bəşirov bizim ən yaxşı şagirdlərimizdəndir. Biri kimyaçı, o biri riyaziyyatçıdır. İndiyə kimi  iştirak etdikləri  fənn olimpiadalarından  hər zaman müvəffəqiyyətlə geri dönüblər. Qızıl, gümüş, bürünc medal qazanıblar.

Bu il olimpiadaçılarımız Rusiya, Kolumbiya, İsveçrə, Avstraliya və Albaniyada  keçiriləcək müxtəlif fənn olimpiadalarında  Azərbaycanı təmsil edəcəklər. İzmir ötən il Argentinada keçirilən olimpiadadan bürünc medalla,  Türkiyədən - Balkan Olimpiadasından isə gümüş müdalla qayıtdı. Sonra Yunanıstanda gümüş medal qazandı. Balaqardaş Bəşirov da  həm qızıl, həm gümüş, həm də bürünc medalla təltif olunub. Təbii ki, bu uşaqların arzuları, hədəfləri böyükdür. Biz hər zaman onlara aşılayırıq ki, əsas hədəfiniz qızıl medal əldə etmək olsun. Əslində məqsəd sadəcə medal almaq da deyil. 100-dən çox ölkənin iştirak etdiyi olimpiadada uşaqlarımızın Azərbaycan bayrağı ilə səhnəyə çıxması, Azərbaycanı təmsil etməsi, Azərbaycanın adının orada yaxşı mənada hallandırılması bizi ayrıca duyğulandırır, fəxarət hissləri yaşadır. Biz öz şagirdlərimizdən çox razıyıq.

Ancaq əldə edilən nailiyyətlərlə təbii ki, özləri də, biz də kifayətlənmirik. Çünki Azərbaycan xalqı səviyyəsinə görə seçilən xalqdır. Millətimizin elmdə də, idmanda da müvəffəqiyyətləri çoxdur.

Mən burada bir haşıyə çıxmaq istəyirəm. Bilirik ki, universitetlərə qəbul olmaq heç də asan iş deyil. Məsələn, Azərbaycanda 700 və ya 650 bal toplayan tələbələr haqqında mediada - qəzet və jurnallarda daha çox müsahibələr gedir, onlar haqqında daha çox danışılır. Ancaq beynəlxalq olimpiadaların iştirakçısı olmaq qəbul imtahanlarından daha fərqli və daha çətindir. Bu uşaqların əldə etdikləri nailiyyətlər heç də kiçik nailiyyətlər deyil. Təhsil Nazirliyi  belə uşaqları hər zaman dəstəkləyir. Bildiyiniz kimi, keçən ay təhsil naziri cənab Misir Mərdanov özü şagirdlərlə görüşdü, söhbət apardı, nailiyyətlərinə görə onları müxtəlif  hədiyyələrlə təbrik edərək gələcəkdə də müvəffəqiyyətlər arzuladı. "Çağ" Öyrətim İşlətmələri Şirkətinin rəhbərliyindən də bizə hər cür maddi və mənəvi dəstək verirlər. İl ərzində ən azı 10-15 dəfə olimpiadalara gedirik. Buna da aydındır ki, maddi dəstək tələb olunur. Bu problemin həllində ARDNŞ-ın da mühüm rolu var.

Şagirdlərimiz onlara göstərilən hər bir etimadı doğruldurlar. Qələbələrimiz davam edir. Olimpiadalarda qazandığımız  537 medaldan 104-ü qızıl, 170-i gümüş, 263-ü bürüncdür. Amma yenə də "Azərbaycanımızı daha çox tanıdaq" deyirik. Biz bundan sonrakı fəaliyyətimizi də hər zaman bu şəkildə davam etdirəcəyik.

Gənclik özü ağ vərəqdir. Mən 1999-cu ildən etibarən Azərbaycan məktəblərində respublikamızı xarici ölkələrdə təmsil edən çox savadlı, istedadlı şagirdlərlə işləyirəm. Bu gün Azərbaycan gəncləri iştirak etdikləri təhsil üzrə beynəlxalq fənn  və layihə olimpiadalarında Azərbaycanı layiqincə təmsil edirlər.  2010-cu ildə 108 ölkənin iştitak etdiyi  51-ci Beynəlxalq Riyaziyyat Olimpiadasında iştirak edən bizim uşaqlar həndəsə sualları üzrə göstərdikləri nəticələrə görə illərcə  olimpiadalarda seçilmiş Rusiya Federasiyasının, Türkiyə Respublikasının şagirdlərindən qat-qat üstün oldular. Rusiya Federasiyasında riyaziyyat fənni üzrə olimpiadanın sədri Nazar Aqaxanov bizim nümayəndələrimizi çağırıb: "Sizin çox güclü həndəsəniz var" deyib təbrik elədi, öz kitablarına avtoqraf yazaraq bizə hədiyyə etdi.

Qazaxıstanda Beynəlxalq Jautıkov olimpiadasında iştirak edərkən bizim şagirdimiz Cəfər Cəfərov orada iki dəfə birincilər birincisi olanda təhsil nazirimiz cənab Misir Mərdanovun  adına xüsusi təşəkkürnamə sertifikatı vermişdilər ki, sağ olun ki, sizin məktəblərinizdə belə gəncləriniz yetişir.

Medallardan başqa, bu şagirdlərimiz orta məktəblərdə məzun olduqdan sonra  dünyanın Oksford, Stanford, Miçiqan, Toronto, Boğaziçi kimi nüfuzlu  universitetlərində təhsil alırlar. Bütün bunlar Azərbaycan təhsilinin səviyyəsinin göstəricisidir. Bu şagirdlər Azərbaycan təhsilinin, Azərbaycan məktəblərinin yetirmələridir.

Gənclik millətimizin gələcəyidir. Sadəcə, riyaziyyat, fizika, kimya, biologiya, tarix və coğrafiyanı mükəmməl bilmək  hələ hər şey demək deyil. Hər şeydən vacib şagirdləri vətəndaş kimi yetişdirmək lazımdır. Dövlət belə gəncliklə daha da yüksələcək.

Məşhur bir deyim var: "Əgər bir il sonranı düşünürsənsə, çiçək yetişdir, on il sonranı düşünürsənsə, ağac yetişdir, əgər yüz il sonranı düşünürsənsə, insan yetişdir". Mənim də bir pedaqoq, bir Azərbaycan müəllimi olaraq ən böyük vəzifəm Azərbaycanı gələcəkdə təmsil edəcək savadlı şəxsiyyətlər yetişdirməkdir. Şagirdlərimə ən çox nəyi arzulayıram?

Heç vaxt əldə etdikləri nailiyyətlərlə kifayətlənməsinlər, hər zaman hər şeyin yaxşısını fikirləşsinlər. Dünyanın ən yaxşı universitetlərinin tələbəsi olmağı, sonsuz başarılar, müvəffəqiyyətlər, cansağlığı arzulayıram şagirdlərimə.

Onlar heç vaxt unutmamalıdırlar ki, vətən, millət, bayraq, xalq, dövlət hər şeydən öncədir. Bunların  yolunda çalışmaq lazımsa çalışmaq, vuruşmaq lazımsa vuruşmaq, oxumaq lazımsa oxumaq tələb olunur. Mənim şagirdlərimin boynuna nə düşürsə, onu edəcəklərinə, dürüst, pak, təmiz, ata-analarına, millətinə, dövlətinə sadiq olacaqlarına ürəkdən inanıram. Gələcək belə gənclərin çiynindədir. 

Səhifəni hazırladı: Ellada UMUDLU

 
 
 
Səhifənin başına qalx Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov