Məlum
olduğu kimi, ölkə başçısı İlham Əliyev Azərbaycanın
görkəmli alimi, tibb elmləri doktoru, professor, əməkdar
elm xadimi Zərifə xanım Əliyevanın anadan olmasının 90
illik yubileyinin keçirilməsi ilə bağlı sərəncam
imzalamışdır.
Həmin sərəncamdan irəli gələrək Naxçıvan Muxtar
Respublikası Göz Xəstəxanasının və Naxçıvan Özəl
Universitetinin birgə təşkilatçılığı ilə "Böyük alim,
qayğıkeş insan" mövzusunda elmi-praktik konfrans
keçirilmişdir. Konfransda universitetin tədris və elmi
işlər üzrə prorektoru, tarix üzrə fəlsəfə doktoru,
dosent İbrahim Kazımbəyli çıxış edərək görkəmli alimin
keçdiyi mənalı həyat yoluna nəzər salmış, onun yüksək
ixtisaslı kadrların hazırlanmasında və göz
xəstəliklərinin müalicəsində göstərdiyi misilsiz
xidmətlərindən danışmışdır.
Humanitar işlər üzrə prorektor Əli Yusifov "Akademik
Zərifə xanım Əliyevanın həyat və yaradıcılığı"
mövzusunda çıxış etmişdir. Qeyd olunmuşdur ki, görkəmli
oftalmoloq-alim, əməkdar elm xadimi, akademik Zərifə
xanım Əliyeva yüksək mədəniyyəti, zərif qəlbi, elmə
sədaqəti, insanlara səmimi münasibəti ilə xalqımızın
qəlbində həmişə yaşayır, parlaq xatirəsi daim böyük
ehtiramla anılır. Geniş dünyagörüşü, dərin tədqiqatçılıq
bacarığı, yüksək ziyalılığı ilə hamının rəğbətini
qazanmış bu fədakar alimin həyat və yaradıcılığı hər bir
Azərbaycan vətəndaşı, hər bir elm adamı və tibb işçisi
üçün həyat və mənəviyyat, kamillik və müdriklik
məktəbidir.
Sonra Naxçıvan Muxtar Respublikası Göz Xəstəxanasının
həkimi Rəhmiyyə Əliyeva "Akademik Zərifə xanım
Əliyevanın oftalmologiya elmində əldə etdiyi böyük
nailiyyətlər" mövzusunda çıxış etmişdir. Bildirilmişdir
ki, Zərifə xanım Əliyevanın həyat fəlsəfəsi, mənəvi
dünyası, oftalmologiya elminin inkişafındakı xidmətləri
zəngin və çoxcəhətlidir, onun fəaliyyətinə nəzər
salarkən görünür ki, bu dahi insan dünya şöhrətli böyük
şəxsiyyətdir. Zərifə xanım Əliyevanın zəngin elmi irsi,
oftalmologiyanın müxtəlif sahələri üzrə apardığı
tədqiqatlar, qazandığı nailiyyətlər, yaratdığı
fundamental əsərlər Azərbaycan tibb elminin parlaq
səhifəsini təşkil edir. Akademik Zərifə xanım Əliyeva
oftalmologiyanın aktual mövzularına həsr edilmiş
çoxprofilli tədqiqatlar aparmış, fədakar həkim kimi bir
sıra göz xəstəliklərinin müalicəsində, o cümlədən
Azərbaycanda traxomanın kökünün kəsilməsində böyük əmək
sərf etmiş, xəstəliyin müxtəlif mərhələlərinin
öyrənilməsi və müalicəsi metodlarının axtarılması
yollarında dəyərli elmi tədqiqatlar aparmışdır.
Sonda görkəmli oftalmoloq alimə həsr olunmuş slayd
nümayiş etdirilmişdir.
Nuray ƏSGƏROVA |