Azərbaycan Dövlət İqtisad Universiteti (ADİU) və YAP
Gənclər Birliyinin təşkilatçılığı ilə xalqımızın
ümummilli lideri Heydər Əliyevin 90 illik yubileyinə
həsr olunmuş müsabiqə keçirilmişdir.
ADİU-dan AzərTAc-a bildirmişlər ki, ekoloji problemlərə
dair müsabiqədə tələbələr tərəfindən 200-dən çox referat
və elmi iş təqdim olunmuş və münsiflər heyəti tərəfindən
qaliblər müəyyən edilmişdir.
Yekun iclasda universitetin elm və innovasiya
texnologiyaları üzrə prorektoru Əvəz Bayramov, ekologiya
və təbii sərvətlər nazirinin müavini Firdovsi Əliyev və
YAP Gənclər Birliyinin sədri Seymur Orucov ekoloji
problemlərin və onların həlli yollarının aktuallığından,
flora və faunanın qorunması, ekoloji tarazlığın bərpa
edilməsi, ekoloji mədəniyyət və maarifləndirmə sahəsində
gənclərin fəal iştirakının vacibliyini vurğulamışlar.
Bildirilmişdir ki, məhz ulu öndərin təşəbbüsü və
rəhbərliyi ilə respublikamızda yaşıllaşdırma kampaniyası
geniş vüsət almış, ətraf mühitin mühafizəsi üzrə Milli
Fəaliyyət Proqramı və "Ətraf mühitin mühafizəsi
haqqında" Qanun qəbul edilmişdir.
Diqqətə çatdırılmışdır ki, bu gün ölkəmizin ekoloji
problemlərinin həlli istiqamətində əhəmiyyətli
nailiyyətlər əldə edilmişdir. Son zamanlar çoxlu sayda
yeni parkların, istirahət zonalarının yaradılması,
abadlaşdırılması və əhalinin ixtiyarına verilməsi buna
əyani sübutdur.
Sonda qalib tələbələrə müvafiq diplomlar və mükafatlar
təqdim edilmişdir. |