Javascript DHTML Drop Down Menu Powered by dhtml-menu-builder.com

ARXİV

3 May 2013 - №16

 

BDU-da "Heydər Əliyev irsi elmimizin qarantıdır" mövzusunda Respublika şagird konfransı keçirilmişdir

 

 Aprelin 26-da Bakı Dövlət Universitetində (BDU) ümummilli lider Heydər Əliyevin anadan olmasının 90 illik yubileyinə həsr olunmuş "Heydər Əliyev irsi elmimizin qarantıdır" mövzusunda Respublika şagird konfransı keçirilmişdir. Tədbirin təşkilatçıları Azərbaycan Respublikasının Təhsil Nazirliyi, BDU və onun nəzdində fəaliyyət göstərən "Gənc istedadlar" liseyidir. Konfransda BDU-nun və "Gənc istedadlar" liseyinin professor-müəllim heyəti, respublikanın müxtəlif bölgələrindən gələn müəllim və şagirdlər, KİV nümayəndələri və digər şəxslər iştirak etmişlər.

Konfransın plenar iclasını giriş sözü ilə açan BDU-nun rektoru, akademik Abel Məhərrəmov tədbirin əhəmiyyətindən danışmışdır. Ulu öndər Heydər Əliyevin tarixi xidmətlərindən danışan rektor, xüsusilə onun elm və təhsilə olan münasibətindən bəhs etmişdir. Rektor dünyada ümummilli lideri olan xalqların sayının az olduğunu və Azərbaycan xalqının belə xalqlardan olduğunu diqqətə çatdırmışdır. Son illər respublikamızın dinamik və sürətli inkişaf etdiyini bildirən A.Məhərrəmov ulu öndər Heydər Əliyevin siyasi kursunu uğurla davam etdirən ölkə Prezidenti İlham Əliyevin xidmətlərindən söz açmışdır.  Rektor "Gənc istedadlar" liseyinin qısa müddət ərzində fəaliyyət göstərməsinə baxmayaraq böyük uğurlara imza atdığını nəzərə çatdırmışdır.

Tədbirdə Təhsil Nazirliyinin Elm şöbəsinin müdiri Gültəkin Hüseynova "Elm və təhsilin vəhdəti müasir cəmiyyətin inkişafına xidmət edir" mövzusunda məruzə ilə çıxış edərək ümummilli lider Heydər Əliyevin Azərbaycan elminə və elm adamlarına göstərdiyi diqqət və qayğıdan söz açmışdır. Ulu öndərin bu sahəni daim diqqət mərkəzində saxladığını bildirən G.Hüseynova belə konfransların keçirilməsini təqdirəlayiq hal kimi qiymətləndirmişdir.

Konfransda "Gənc istedadlar" liseyinin şagirdi Aytəkin Murtuzovanın "Heydər Əliyev və Azərbaycan dili" mövzusunda məruzəsi, həmçinin Tovuz rayonundan gəlmiş müəllim Talıb Mahmudovun çıxışı  maraqla qarşılanmışdır. Digər çıxış edənlər konfransın əhəmiyyətindən söz açmışlar.

Sonra "Gənc istedadlar" liseyinin fəaliyyətini əks etdirən videoçarx nümayiş etdirilmişdir.

Konfrans plenar iclasdan sonra bölmə iclasları ilə davam etdirilmişdir. "Gənc istedadlar" liseyində keçirilən bölmə iclasları ana dili və ədəbiyyat, tarix və coğrafiya, fizika, riyaziyyat və informatika, kimya, biologiya və ekologiya, xarici dillər (rus, ingilis) bölmələrində aparılmışdır. Ümumilikdə konfransda  127 məruzə dinlənilmişdir.  

Niyazi RƏHİMOV

 
 
 
Səhifənin başına qalx "Xəbərlər" bölməsinə get Nömrənin müdəricatına dön Səhifənin başına qalx
 

AZƏRBAYCANIN TƏHSİL NAZİRLƏRİ

 

DÜNYA UNİVERSİTETLƏRİ

 

DÜNYA TƏHSİLİ

 

DÜNYA ÖLKƏLƏRİNDƏ ALİ MƏKTƏBLƏRƏ QƏBUL

 
 
 

Copyright  ©  All Rights Reserved.
Created and supported by Mehman Shafagatov