|
 ADU-nun
rektoru, professor Səməd Seyidovun rəhbərlik etdiyi
nümayəndə heyəti Böyük Britaniyanın Esseks
Universitetində olmuşdur.
Albert Solman kitabxanası ilə tanışlıqdan sonra
universitetin Beynəlxalq Akademiyasının rəhbəri,
professor Riçard Barnard və Beynəlxalq Akademiyanın
Müəllim hazırlığı proqramının və magistratura şöbəsinin
rəhbəri, professor Nilufer Demirkan-Jons, Bakalavr
təhsili şöbəsinin direktoru Mayk Cons və baş müəllim
Culian Qud ilə Esseks Universiteti və Azərbaycan Dillər
Universiteti arasında olan 2+2 layihəsinin gedişi haqda
müzakirələr aparılmışdır.
Esseks Universitetinin Tələbə Qeydiyyatı Departamentinin
rəhbəri Stefen McAuliffe Esseks Universitetində tələbə
qeydiyyatının, tələbələrin göstərdikləri nəticələrin
qeydiyyata alınması, imtahan və testlərin təşkili
qaydaları və təcrübəsi haqda geniş məlumat vermişdir.
Esseks Universitetinin akademik standartlar üzrə
prorektoru, professor Jeyn Rayt 12 min tələbəsi olan
Esseks Universitetinin Böyük Britaniya universitetləri
sırasında 9-cu yeri tutduğunu bildirmiş və ADU ilə
əməkdaşlığa mühüm əhəmiyyət verdiklərini demişdir.
Rektor Səməd Seyidov ADU-nun Azərbaycan universitetləri
içərisində Boloniya prosesinin icrasında aparıcı
rolundan, beynəlxalq əlaqələri, o cümlədən Böyük
Britaniya, Norveç, İtaliya, Fransa və digər Avropa
universitetləri ilə əməkdaşlığı haqqında geniş məlumat
vermişdir.
Esseks Universitetinin tələbələrinin təxminən 30
faizinin xarici tələbələr olduğunu bildirən beynəlxalq
əlaqələr üzrə dekan, professor Martin Henson
Azərbaycandan olan tələbələrin sayının artmasında
maraqlı olduqlarını bildirmişdir.
Rektor Səməd Seyidov Esseks Universitetinin yeni təyin
edilmiş rektoru, professor Antoni Forster ilə
görüşmüşdür. Görüş zamanı iki universitet arasında
münasibətlər, gələcək əməkdaşlıqla bağlı müzakirələr
olmuş, təhsilin bakalavr, magistr və doktorantura
pillələrində əlaqələrin genişləndirilməsi haqda fikir
mübadiləsi aparılmışdır.
ADU-nun Mətbuat xidməti |
