|
Bakıdakı 30 nömrəli tam orta məktəbdə ümummilli lider
Heydər Əliyevin anadan olmasının 90 illik yubileyinə
həsr olunmuş tədbir keçirilmişdir. Tədbirdə məktəbin
müəllim-şagird kollektivi ilə birgə Binəqədi Rayon İcra
Hakimiyyəti başçısının müavini Vüsal İsmayılov, KİV
nümayəndələri və digər şəxslər iştirak etmişlər.
Azərbaycan Respublikasının Dövlət himni səsləndikdən
sonra iştirakçılar ulu öndər Heydər Əliyevin əziz
xatirəsini bir dəqiqəlik sükutla yad etmişlər.
Tədbiri giriş sözü ilə açan məktəbin tarix müəllimi
Ziyadxan Budaqov bildirmişdir ki, dərin zəkası, zəngin
biliyi, qətiyyəti, ciddiliyi, daxili və xarici
siyasətdəki uğurları, Azərbaycanın müstəqilliyi və
bütövlüyünü qorumaq məharəti, elm, mədəniyyət, incəsənət
və təhsilə göstərdiyi diqqət, qayğı Heydər Əliyevi
ictimai xadim, müdrik bir şəxsiyyət kimi ürəklərdə
yaşadır. Bu gün ümummilli liderin siyasəti onun layiqli
davamçısı möhtərəm Prezident cənab İlham Əliyev
tərəfindən uğurla davam etdirilir. Son illər təhsilə
göstərilən diqqət və qayğıdan danışan Z.Budaqov bu işdə
Heydər Əliyev Fondunun prezidenti, Milli Məclisin
deputatı Mehriban xanım Əliyevanın rolunu yüksək
qiymətləndirmişdir.
Təhsilimizin dünya təhsil sisteminə sürətli
inteqrasiyasından söz açan tədbirin aparıcıları ulu
öndər Heydər Əliyevin hamıya örnək olan həyat yolunu,
ümummilli lider haqqında fikir və düşüncələrini uşaq (yeniyetmə)
təbiətinə xas olan səmimi, ülvi hisslərlə dahi
şəxsiyyətə dərin hörmət, sonsuz ehtiram duyğularını
söyləmişlər. Ulu öndərin hər zaman uşaqları sevdiyini,
onlara qayğı ilə yanaşdığını deyən şagirdlər ölməz
şəxsiyyətin təhsillə bağlı dediyi qiymətli fikirləri bir
daha mərasim iştirakçılarının diqqətinə çatdıraraq
əbədiyaşar liderin hər zaman müəllimlərə yüksək
ehtiramla yanaşdığını bildirmişlər. Onlar ümummilli
liderimiz Heydər Əliyevin ölməz ideyalarının onun
layiqli davamçısı ölkə başçısı cənab İlham Əliyev
tərəfindən uğurla həyata keçirildiyini vurğulamışlar.
Heydər Əliyev Fondunun təhsillə bağlı gördüyü işlərdən
də ətraflı söz açan aparıcılar Fondun prezidenti,
YUNESKO-nun və İSESKO-nun xoşməramlı səfiri, Milli
Məclisin deputatı Mehriban xanım Əliyevanın təhsilimizin
inkişafındakı əvəzsiz xidmətlərini yüksək
dəyərləndirmişlər.
Sonra Binəqədi Rayon İcra Hakimiyyəti başçısının
müavini Vüsal İsmayılov çıxış edərək ömrünü, taleyini,
bütün varlığını xalqına bağışlayan əvəzolunmaz şəxsiyyət,
xalqımızın ümummilli lideri Heydər Əliyevin həyat yolu,
misilsiz xidmətləri haqqında tədbir iştirakçılarına
geniş məlumat vermişdir. Qeyd olunmuşdur ki, əsası ulu
öndərimiz Heydər Əliyev tərəfindən qoyulmuş siyasi və
iqtisadi kursun möhtərəm Prezidentimiz cənab İlham
Əliyev tərəfindən uğurla davam etdirilməsi nəticəsində
son illər Azərbaycan dünyada siyasi cəhətdən ən stabil
ölkələr sırasına çıxmış, iqtisadi inkişaf tempinə görə
lider ölkəyə çevrilmişdir. Digər çıxış edənlər
ümummilli lider, görkəmli dövlət xadimi Heydər
Əliyevin həyat və fəaliyyətindən, zəngin irsindən söz
açmışlar.
Sonra ümummilli lider Heydər Əliyevə aid film nümayiş
olunmuşdur. Şagirdlər ulu öndərə həsr olunmuş mahnılar
oxumuş, şeirlər söyləmiş, rəqslər ifa etmişlər.
Rəşad ZİYADOV |
