Aprelin
20-də Bakıdakı M.Müşfiq adına 18 nömrəli tam orta
məktəbdə ümummilli lider Heydər Əliyevin anadan
olmasının 90 illiyinə həsr olunmuş "Bahar təravətli
ömür" adlı tədbir keçirilmişdir.
Tədbirdə Yasamal Rayon İcra Hakimiyyəti başçısının
müavini Şahin Məmmədov, Təhsil Problemləri İnstitutunun
direktor müavini Ənvər Abbasov və şöbə müdiri Vidadi
Xəlilov, Bakı Şəhəri üzrə Təhsil İdarəsi ümumtəhsil
sektorunun müdiri Firudin Həmzəyev, məktəbdənkənar
təhsil sektorunun müdiri Qənirə Sultanova, şair Oqtay
Rza və digərləri iştirak etmişdir. İlk öncə Dövlət himni
səsləndirilmişdir.
Sonra şagirdlərin ifasında Heydər Əliyevə həsr olunmuş
şeirlər, bayatılar, mahnılar səsləndirilmiş, milli
rəqslərimiz məharətlə ifa edilmiş və ulu öndərin
zəngin həyat yolunu əks etdirən film nümayiş olunmuşdur.
Tədbiri davam etdirən aparıcılar çıxışlarında qeyd
etmişlər ki, hər bir xalqın tarixində elə parlaq,
taleyüklü hadisələr var ki, nəinki aylar, illər, hətta
bir neçə onilliklər, yüzilliklər keçdikdən sonra o
hadisələr unudulmur və xalqın yaddaşında, tarixində ən
şərəfli, ən müqəddəs məqam kimi əbədiləşir. Xalqımız
üçün, dövlətimizin taleyi üçün ağır məqamda dünya
şöhrətli siyasətçi, uzun illər dövlət idarəçiliyində
zəngin təcrübə toplamış Heydər Əliyevin öz xilaskarlıq
missiyasını yerinə yetirərək xalqın tələbi ilə yenidən
siyasi hakimiyyətə gəlişi tarixin məhz bu cür
məqamlarındandır. Dahi şəxsiyyət öz qayıdışı ilə
Azərbaycanda illər uzunu davam edən xaos və anarxiyaya
son qoymuş, vətəndaş müharibəsinin qarşısını almışdır.
Məhz ulu öndərin siyasi iradəsi və qətiyyəti sayəsində
xalq rahat və firavan həyata qədəm qoymuş, dövlət
müstəqilliyimiz və suverenliyimiz məhv olmaq
təhlükəsindən qurtulmuşdur.
Tədbirin sonunda məktəbin direktoru Vaqif Hüseynov
ümummilli lider Heydər Əliyevin 1997-ci ildə "Bilik
günü"ndə rəhbərlik etdiyi 18 nömrəli məktəbə gəlişini
xatırlatmışdır. Demişdir ki, o tarixi gün pedaqoji
kollektivin yaddaşından heç vaxt silinən deyil. Çünki
bu, böyük rəhbər tərəfindən təhsil ocağımıza verilən
dəyərli qiymət idi. Direktor bildirmişdir ki, ölkə
həyatının elə sahəsi yoxdur ki, Heydər Əliyev orada
iştirak etməsin. Ümummilli lider dövlət quruculuğu,
xarici siyasət, iqtisadiyyatın inkişafı kimi ən zəruri
məsələlərdən tutmuş elm, mədəniyyət, təhsil, idman kimi
məsələlərin inkişafına, gənclərin və veteranların,
əlillərin, məcburi köçkünlərin, uşaqların, bir sözlə
cəmiyyətin bütün sahələri və bütün təbəqələrinin
problemlərinə eyni həssaslıq, eyni diqqətlə
yanaşmışdır.
Sifai SƏFƏROVA |