|
 Mən
də səni sevdim, ey əziz diyar,
Sevgidə Məcnunla yarışmaq üçün.
Bir gün qucağında olub bəxtiyar,
Əziz torpağına qovuşmaq üçün...
Bu misralar böyük vətənpərvər alim Xudu Məmmədova
məxsusdur.
Bəli, vətəni sevməyin Xudu Məmmədov düsturu belə idi.
Ümumiyyətlə, Ağdam rayonunun Mərzili kəndi ziyalı
potensialına görə ölkəmizin qabaqcıl kəndlərindən
olmuşdur. Bilmirəm coğrafi, yoxsa sosial səbəbiyyət
qanunauyğunluğudur, bu yurdun sakinləri üçün ümumi
portret cizgiləri aydın görsənir: qürur, təvazökarlıq,
eldostluq, vətən daşı olmağı vəzifə saymaq,
dövlətsevərlik, yüksək pasionarlıq. Xudu müəllim həmişə
belə bir düşüncədə idi ki, vətən sevgisi aşılamaq vətəni
vətəndaşa tanıtmaqdan başlayır. Mənim tanıdığım Mərzili
camaatında bəlkə elə buna görədir ki, vətən sevgisi
heyrətamizdir.
Bakı Dövlət Universitetinin dosenti İ.M.Bayramov da
məhz 50 il bundan öncə,1963-cu ildə Ağdam rayonunun
Mərzili kəndidə dünyaya gəlmişdir. Orta məktəbi
bitirdikdən sonra Mərzili kəndində fəhlə işləmişdir.
1981-1983-cü illərdə hərbi xidmətdə olmuşdur. 1988-ci
ildə Leninqrad (indiki Sankt-Peterburq) Dövlət
Universitetinin psixologiya fakültəsini bitirmişdir.
1988-ci ildə Bakı Dövlət Universitetinin psixologiya
kafedrasına baş laborant vəzifəsinə qəbul olunmuşdur.
1991-ci ildən müəllim, 1993-cü ildən baş müəllim
işləmişdir. Elmə olan marağı millət, vətən sevgisi ilə
kökləndiyindən o, həmişə yaradıcılıq axtarışlarında
milli identiklik məsələlərinə xüsusi önəm vermişdir.
1996-cı ildə "Kitabi-Dədə Qorqud dastanlarında
Azərbaycan xalqının etnik-psixoloji xüsusiyyətlərinin
inikası" mövzusunda namizədlik dissertasiyası müdafiə
edərək psixologiya elmləri namizədi alimlik dərəcəsi
adını alması bunun bariz nümunəsidir. 2006-cı ildən
həmin kafedranın dosenti kimi çalışan İmdad müəllim
2008-ci ildən kafedranın doktorantıdır. Milli
təhlükəsizliyin psixoloji aspektləri,vətənpərvərlik
ruhunun təlqini məsələləri bu vətənpərvər alimin
tədqiqat marağında dominant yer tutur. Hazırda o,
qloballaşma şəraitində separatizmin sosial-psixoloji
problematikası üzrə elmi tədqiqat işini bitirmiş və
müdafiəyə təqdim etmişdir. 1 monoqrafiyanın, 50
məqalənin və bir neçə proqramın müəllifidir. İmdad
müəllim ictimai işlərdə fəallığı, təşkilati bacarığı,
menecer qabiliyyəti ilə də işlədiyi müəssisədə və ölkə
səviyyəsində müsbət imicə malikdir.
İmdad müəllim bütöv bir şəxsiyyətdir. O, təkcə görkəmli
alim deyil, həm də saf, mötəbər ailə ocağının başçısı,
böyük bir nəslin körpüsüdür. Üzərinə düşən ata
missiyasını şərəflə yerinə yetirən İmdad müəllim
övladlarının tərbiyə və təhsilində çox ciddi uğurlara
nail olmuş, vətənə layiq övladlar yetirmişdir.
Bizim tanıdığımız İmdad müəllim arxalıya arxa duraraq
yamaq olmadı, onu arxasıza arxa duran dayaq və böyük
vicdan adamı kimi qəbul edirik. 50 illik ömür yolçusu
üçün belə bir ictimai rəy və düşüncə mövcuddursa, onda
mütləq yolçu yolda gərək.
İmdad müəllimə cansağlığı, xoşbəxtlik və bol-bol
yaradıcılıq sevinci arzulayıram.
Üzeyir ŞƏFİYEV,
BDU-nun dosenti, sosiologiya üzrə fəlsəfə doktoru |
